_ ספר/י לנו מה שגוי

דואל:

זכרו שאין משמעות למספרי שורה או עמוד בטקסט רציף באינטרנט. אנא ציינו מספר פסקה, ו/או העתיקו כמה מלים סביב כל שגיאה, כדי להקל עלינו למצוא את הטעון תיקון.

רשימת הגהות:

נודיע לך בדואל כשנעיין בהגהות ונתקן את הטקסט.

_ נשמע לשמוע מה אהבת!

דואל:

ההמלצה שלך:

(אנו מפרסמים המלצות ביומן הרשת שלנו)
פרויקט בן-יהודה: בפייסבוק | ב-YouTube
יומן הרשת של פרויקט בן-יהודה

תחכמוני – שַׁעַר תְּשִׁיעִי

יהודה אלחריזי

לתוכן הענינים

 

בִּשְׁלֹשִׁים מְשׁוֹרְרִים מִתְהַלְּלִים, מִי יַעֲשֶׂה שִׁירִים יוֹתֵר מְעֻלִּים

 

נְאֻם הֵימָן הָאֶזְרָחִי: פָּנִיתִי מִכָּל מַעֲשַׂי לָשֶׁבֶת עִם הַמְּבִינִים בְּבָתֵּי יְשִׁיבָתָם .  וְלִשְׁמֹע דִּבְרֵי חֲכָמִים וְחִידוֹתָם .  וַיְהִי הַיּוֹם וַאֲנִי עִם חֲבֵרִים .  אֲצִילִים וּגְבִירִים .  לְמַעֲרֶכֶת הַשִּׁיר נִגָּשִׁים . וְהָיָה מִסְפָּרָם שְׁלֹשִׁים . וַיַּעַן אִישֹ מֵהֶם וַיֹּאמַר: מִי הָעוֹלֶה בְּמַעֲלוֹת הַשִּׁירִים הַגְּבוֹהִים .  וּבוֹקֵעַ מִשְּׁחָרָיו נְגוֹהִים .  יְגַלֶּה הַיּוֹם לְעֵינֵינוּ מַעֲלָתוֹ .  וְיֶחֱשׂף אֶת זְרוֹעַ מְלִיצָתוֹ .  וְאֶת יְקָר תִּפְאֶרֶת גְדֻלָּתוֹ .  אָמְרוּ לוֹ הָעָם: בַּמֶּה יִבָּחֵן הַמְשׁוֹרֵר וְכֹחוֹ .  וְאֵיך נוּכַל לָדַעַת אֶת הָאִישׁ וְאֶת שִׂיחוֹ .  אָמַר לָהֶם: דְּעוּ כִּי יֵשׁ לַשִּׁירִים דְּרָכִים .  וְלַחֲרוּזִים נְתִיבוֹת וּמַהְלְכִים .  וְלָהֶם מְלָאכוֹת נְסוּכוֹת .  שְׁמוּרוֹת וַעֲרוּכוֹת .  וּמִבְחַר הַמְּלָאכוֹת .  לָקַחַת מִסִּפְרֵי הַנְּבִיאִים פָּסוּק .  וְלִבְנוֹת עָלָיו עִנְיָן נֶחְמָד וְחָשׁוּק .  וְהָיָה בְתֹוךְ הַקְּרוּאִים אִישׁ זָקֵן מַרְאֵהוּ נוֹרָא .  וְהוּא יוֹשֵׁב לְבַדּוֹ רָחוֹק מִן הַחֲבוּרָה .  אֲבָל הָיָה מְבַקֵּע הַלְּבָבוֹת בְּפַטִּישׁ מִלָּיו .  וּמַחְפִּיר הַפְּנִינִים בִּפְנִינֵי מְשָׁלָיו  .  וְהָיוּ מְכֻסִּים פָּנָיו .  וְלֹא יָכֹלְתִּי לִרְאוֹת כִּי אִם עֵינָיו. וַיַּעַן וַיּאמַר: שִׁמְעוּ אֵלַי אַנְשֵׁי לבָב .  וְאַל יֵלֵךְ  לְבַבְכֶם שׁוֹבָב .  כִּי אִם הַדֶּרֶךְ הַזֶּה תְבַקֵּשׁוּ .  וְלָבוֹא בַּשַּׁעַר הַזֶּה תִּדְרֹשׁוּ .  קְחוּ מאִתְּכֶם מְחַזֵּק הַבֶּדֶק .  וּמוֹרֶה הַצֶּדֶק .  וְעַתָּה בַּחֲרוּ לָכֶם אִישׁ וְיֵרֵד אֵלַי .  עַד תַּכִּירוּ מְשָׁלַי .  וְתִבְחֲנוּ מִלָּי .  וַיִּגַּשׁ אֵלָיו אִישׁ מִן הַחֲבוּרָה וַיּאמֶר לוֹ: אִם רְצוֹנְךָ אֵשׁ הַשֵּׂכֶל לִקְדֹּחַ . עֲשֵׂה שִׁיר יְהִי סוֹפוֹ: וְקֹוֵי ה' יַחֲלִיפוּ כֹחַ.

 

            וַיִּשָּׂא מְשָׁלוֹ וַיֹּאמַר:

            בֶּן אִישׁ בְּטַח עַל צוּרְךָ יוֹם צִירְךָ

                   כִּי בוֹ יְגֵעִים יִמְצְאוּ מָנוֹחַ

הַבּוטְחִים עַל רִיק לְרִיק יָגְעוּ, אֲבָל

       קֹוֵי אֲדנָי יַחֲלִיפוּ כֹחַ.

 

וַיַּעַן הַשֵּׁנִי מִן הַחֲבוּרָה וַיּאמֶר לוֹ: אִם רְצוֹנְךָ לְהָעִיר יְשֵׁנֵי זְמָמֶיךָ .  עֲשֵׂה שִׁיר יְהִי סוֹפוֹ: וּבְרֹב גְּאוֹנְךָ תַהֲרֹס קָמֶיךָ.

 

וַיִּשָּׂא מְשָׁלוֹ וַיֹּאמַר:

אִם בַּעֲבוֹדַת אֵל תְּכַל יָמֶיךָ

      תִּהְיֶה פְאֵר עַל רֹאשׁ בְּנֵי עַמֶּךָ.

כִּי אָז מְשַׂנְאֶיךָ לְךָ יִכָּחְשׁוּ

      וּבְרֹב גְּאוֹנְךָ תַּהֲרֹס קָמֶיךָ.

 

וַיַּעַן הַשְּׁלִישִׁי וַיּאמֶר לוֹ: אִם תַּחְפֹּץ לְנַקּוֹת שִׁירְךָ מִכָּל שֶׁמֶץ וָחֶרֶץ .  עֲשֵׂה שִׁיר יְהִי סוֹפוֹ: וְלֹא לָאֱמוּנָה גָבְרוּ בָאָרֶץ.

 

            וַיִּשָּׂא מְשָׁלוֹ וַיֹּאמַר:

אַבִּיט לְצַד יָמִין וְאֶפְנֶה עַל שְׂמֹאל

לֹא אֶחֱזֶה יָשָׁר וְגוֹדֵר פָּרֶץ.

כִּי אִם מְתֵי רֶשַׁע וְאַנְשֵׁי שָׁוְא אֲשֶׁר

      לֹא לָאֱמוּנָה גָבְרוּ בָאָרֶץ.

 

וַיַּעַן הָרְבִיעִי וַיּאמֶר לוֹ: אִם תִּרְצֶה לְבָרֵר שִׁירְךָ מחֵטְא וְאָוֶן. עֲשֵׂה שִׁיר יְהִי סוֹפוֹ: שְׁלַח אֶצְבַּע וְדַבֵּר אָוֶן.

 

וַיִּשָּׂא מְשָׁלוֹ וַיֹּאמַר:

שׁוּבָה אֱנוֹשׂ אֶל אֵל בְּטֶרֶם מוֹתְךָ

      כִּי טָבְעָה רַגְלָךְ בְּטִיט הַיָּוֶן.

תִּצְלַח בְעֵת תָּסִיר לְךָ מִתּוֹכְךָ

      מוֹטָה שְׂלַח אֶצְבַּע וְדַבֵּר אָוֶן.

 

וַיַּעַן הַחֲמִישִׁי וַיּאמֶר לוֹ: אִם תְּאַוֶּה לְהַרְאוֹת לָנוּ חָכְמָתְךָ אֲשֶׁר חָכָמְתָּ .  עֲשֵׂה שִׁיר יְהִי סוֹפוֹ: מַה הַחֲלוֹם הַזֶּה אֲשֶׂר חָלָמְתָּ.

 

וַיִּשָּׂא מְשָׁלוֹ וַיֹּאמַר:

בֶּן אִישׁ לְמָתַי עֵינְךָ עָצַמְתָּ

         אוֹי כִּי בְּחֵק הַתַּאֲוָה נִרְדָּמְתָּ.

הַבְלֵי חֲלוֹמֶיךָ לְבָבָךְ לִבְּבוּ

         מַה הַחֲלוֹם הַזֶּה אֲשֶׁר חָלָמְתָּ.

 

וַיַּעַן הַשִּׁשִׁי וַיּאמַר:  אִם תִּרְצֶה אַדְנֵי שִׂכְלְךָ לְיַסֵּד .  עֲשֵׂה שִׁיר יְהִי סוֹפוֹ: כִּי אִם עֲשׂוֹת מִשְׁפָּט וְאַהֲבַת חֶסֶד.

 

וַיִּשָּׂא מְשָׁלוֹ וַיֹּאמַר:

הִכּוֹן אֱנוֹשׁ לִקְרַאת אֱלֹהֶיךָ אֲשֶׁר

         נָטָה כְדֹק שַׁחַק וְאֶרֶץ יִסֵּד.

כִּי מָה אֱלֹהֶיךָ מְבַקֵּשׁ מִמְּךָ

         כִּי אִם עֲשׂוֹת מִשְׁפָּט וְאַהְבַת חֶסֶד.

 

וַיַּעַן הַשְּׁבִיעִי וַיּאמֶר לוֹ: אִם חָכְמָתְךָ כְּכַלָּה יְפַת לֶחִי .  עֲשֵׂה שִׁיר יְהִי סוֹפוֹ:  וַיִּמְרְחוּ עַל הַשְּׁחִין וַיֶּחִי.

 

וַיִּשָּׂא מְשָׁלוֹ וַיֹּאמַר:

שַׁדַּי, שְׁחִין חֶטְאִי לְבָבִי הֶחֱלָה

         וּשְׁמָךְ רְפוּאָתִי וְחַיֵּי רוּחִי

לָקְחוּ סְעִפַּי מֶרְקְחוֹת טוּב זִכְרְךָ

וַיִּמְרְחוּ עַל הַשְּׁחִין וַיֶּחִי.

 

וַיַּעַן הָשְּׁמִינִי וַיּאמֶר לוֹ: אִם לְגַלּוֹת שִׂכְלְךָ אַתָּה בוֹחֵר .  עֲשֵׂה שִׁיר יְהִי סוֹפוֹ: מְלֵאָתְךָ וְדִמְעֲךָ לֹא תְאַחֵר.

 

וַיִּשָּׂא מְשָׁלוֹ וַיֹּאמַר:

אֱנוֹשׁ חָלְפוּ יְמוֹתֶיךָ בְּהֶבֶל

וְעַד מָתַי פְּנֵי אֵל לֹא תְשַׁחֵר.

וְעֵינָךְ מָלְאָה דֶמַע וְעַל כֵּן

מְלֵאָתָךְ וְדִמְעָךְ לֹא תְאַחֵר.

 

וַיַּעַן הַתְּשִׁיעִי וַיּאמֶר לוֹ: אִם תַּשְׂכִּיל הַסּוֹד אֲשֶׁר בְּלִבִּי עָרַכְתִּי .  עֲשֵׂה שִׁיר יְהִי סוֹפוֹ: אִם תֵּלְכִי עִמִּי וְהָלַכְתִּי.

 

וַיִּשָּׂא מְשָׁלוֹ וַיֹּאמַר:

עוּרִי יְמִין הָאֵל הֲכִי לִבִּי

נָמֵס כְּמַיִם בִּי וְנִשְׁפַּכְתִּי.

אִם תַּעְזְרִי אוֹתִי אֱהִי נֶעְזָר

אוֹ תִּסְמְכִי יָדִי וְנִסְמָכְתִּי.

וּבְעֵת בְּדֶרֶךְ אֶפְחֲדָה מִצָּר

אִם תֵּלְכִי עִמִּי וְהָלָכְתִּי.

 

וַיַּעַן הָעֲשִׂירִי וַיּאמֶר לוֹ: אִם תִּרְצֶה לְהָעִיר שִׂכְלְךָ עַד יֵצֵא כַנֹּגַהּ צִדְקוֹ .  עֲשֵׂה שִׁיר יְהִי סוֹפוֹ: וְנָחַל ה' אֶת יְהוּדָה חֶלְקוֹ.

 

וַיִּשָּׂא מְשָׁלוֹ וַיֹּאמַר:

עֵת כָּל אֱנוֹשׁ יָשִׂים בְּתֵבֵל סִפְקוֹ

אָשִׂים בְּאֵל חִשְׁקִי וְאֶשְׁמֹר חֻקּוֹ.

וּבְעֵת בְּנֵי אִישׁ יִנְחֲלוּ נַחְלַת יְקָר

נָחַל אֲדֹנָי אֶת יְהוּדָה חֶלְקוֹ.

 

וַיַּעַן הָאַחַד עָשָׂר וַיּאמֶר לוֹ: אִם תִּכְסֹף לְהָפִיץ מִשִּׂכְלְךָ טוּב רִקְחוֹ .  עֲשֵׂה שִׁיר יְהִי סוֹפוֹ: לֹא כָהֲתָה עֵינוֹ וְלֹא נָס לֵחֹה.

 

וַיִּשָּׂא מְשָׁלוֹ וַיֹּאמַר:

בֶּן-אִישׁ עֲצֵי יֹשֶׁר נְטַע בִּלְבָבְךָ

יִצְמַח פְּרִי צִדְקָךְ וְיִתֵּן רֵיחוֹ.

וּבְמוֹתְךָ צוּר יַחֲלִיץ אֶת גּוּפְךָ

לֹא כָהֲתָה עֵינוֹ וְלֹא נָס לֵחֹה.

 

וַיַּעַן הַשְּׁנֵים עָשָׂר וַיֹּאמֶר לוֹ: אִם תִּכְסֹף לְהַלְבִּישׁ שִׁירְךָ סוּת נֹעַם כְּמַדּוֹ .  עֲשֵׂה שִׁיר יְהִי סוֹפוֹ: לֹא טוֹב הֱיוֹת הָאָדָם לְבַדּוֹ.

 

וַיִּשָּׂא מְשָׁלוֹ וַיֹּאמַר:

חָכְמָה לְרֹאשׂ אַנְשֵׂי יְקָר הִיא נֵזֶר

הַרְחֵק יְקַר תֵּבֵל וּבָה תֵּעָזֵר.

בָּחַר אֱלֹהִים בָּה וְשָׂח: לֹא טוֹב הֱיוֹת

אָדָם לְבַדּוֹ אֶעֱשֶׂה לוֹ עֵזֶר.

 

וַיַּעַן הַשְּׂלֹשָׂה עָשָׂר וַיּאמֶר לוֹ: אִם תִּרְצֶה לְהַעֲצִיב כָּל מְקַנְאֶיךָ וּלְהַחֲלִי . עֲשֵׂה שִׁיר יְהִי סוֹפוֹ: וְהֵסִיר ה' מִמְּךָ כָּל חֹלִי.

 

וַיִּשָּׂא מְשָׁלוֹ וַיֹּאמַר:

לִבִּי לְאֵל שׁוּבָה בְּעֵת יֵצַר לְךָ

כִּי בוֹ צֳרִי צִירִי וּמַרְפֵּא חִילִי.

אִלּוּ בְעֵת צִירָךְ בְּצוּרָּךְ תִּבְטְחָה

הֵסִיר ייָ מִמִּךָ כָּל חֹלִי.

 

וַיַּעַן הָאַרְבָּעָה עָשָׂר וַיּאמֶר לוֹ: אִם מַעֲלַת שִׁירְךָ נִשְׂגָּבָה .  עֲשֵׂה שִׁיר יְהִי סוֹפוֹ: קָמָה אֲלֻמָּתִי וְגַם נִצָּבָה.

 

וַיִּשָּׂא מְשָׁלוֹ וַיֹּאמַר:

אָמְנָם לְשׂוֹנִי יוֹם קְרָבוֹת נֶחְשְׁבָה

חֶרֶב וְאָחוֹר לֹא לְעוֹלָם שָׁבָה.

וּבְעֵת אֲלֻמּוֹת בַּעֲלֵי שִׁיר אִלְּמוּ

קָמָה אֲלֻמָּתִי וְגַם נִצָּבָה.

 

וַיַּעַן הַחֲמִשָּׁה עָשָׂר וַיּאמֶר לוֹ: אִם תִּרְצֶה לְהַכְנִיעַ כָּל עוֹזְרֵי רַהַב .  עֲשֵׂה שִׁיר יְהִי סוֹפוֹ: וַיַּעֲשׂוּ לָהֶם אֱלֹהֵי זָהָב.

 

וַיִּשָּׂא מְשָׁלוֹ וַיֹּאמַר:

הַקֹּפְצִים יָדָם וְהוֹנָם יִמְנְעוּ

יוֹם דִּין הֲלֹא יִשָּׂרְפוּ בַלַּהַב.

עָזְבוּ אֱלֹהֵיהֶם וְכַסְפָּם עָבְדוּ

וַיַּעֲשׂוּ לָהֶם אֱלֹהֵי זָהָב.

 

וַיַּעַן הַשִּׁשָׁה עָשָׂר וַיּאמֶר לוֹ: אם תִּרְצֶה לִהְיוֹת רֵיחַ שִׁירְךָ כְּרָאשֵׁי בְשָׂמִים .  עֲשֵׂה שִׁיר יְהִי סוֹפוֹ: חֲבָלִים נָפְלוּ לִי בַנְּעִימִים.

 

וַיִּשָּׂא מְשָׁלוֹ וַיֹּאמַר:

בּעֵת כָל אִישׁ יְהִי חוֹשֵׁק בְּתֵבֵל

אֲנִי אֶחְשֹׁק בְּצוּר שׁוֹכֵן מְרוֹמִים.

וְאֹמַר עֵת יְהִי חֶלְקִי בְדָתוֹ

חֲבָלִים נָפְלוּ לִי בַנְּעִימִים.

 

וַיַּעַן הַשִּׁבְעָה עָשָׂר וַיּאמֶר לוֹ: אִם תְּבַקֵשׁ לְחַבֵּר נִיב כְּנַפְשִׂי וּלְבָבִי .  עֲשֵׂה שִׁיר יְהִי סוֹפוֹ: וְאֶקְרַא סְגוֹר לִבָּם וְאֹכְלֵם שָׁם כְּלָבִיא.

 

וַיִּשָּׂא מְשָׁלוֹ וַיֹּאמַר:

לְשִׁירִי נוֹזְלֵי שִׁיר נִצְּבוּ נֵד

בְּעֵת אֹמַר לְצוּלָתָם חֳרָבִי.

וְאִם אֶקְדַּח יְקֹד הַשִּׁיר בְּמִזְרָח

יְלַהֵט שׁוֹכְנֵי מַעְרָב לְהָבִי

וְאַכְנִיעַ מְתֵי שֵׂכֶל וְאֶקְרַע

סְגוֹר לִבָּם וְאֹכְלֵם שָׁם כְּלָבִיא.

 

וַיַּעַן הַשְּׁמֹנָה עָשָׂר וַיּאמֶר לוֹ: אִם תִּרְצֶה לְנַקּוֹת שִׁירְךָ מִכָּל מוּם וְכַחַשׁ.  עֲשֵׂה שִׁיר יְהִי סוֹפוֹ: וְהַמַּטֶּה אֲשֶׁר נֶהְפַּךְ לְנָחָשׁ.

 

וַיִּשָּׂא מְשָׁלוֹ וַיֹּאמַר:

נְעִים שִׁירִי בְלִי רֶגֶל יְשוֹטֵט

וְיַבִּיעַ בְּלִי לָשׁוֹן וְרַחַשׁ

וְלִי הָעֵט אֲשֶׁר יִטְרֹף כְּאַרְיֵה

וְהַמַּטֶּה אֲשֶׁר נֶהְפַּךְ לְנָחָשׁ.

 

וַיַּעַן הַתִּשְׁעָה עָשָׂר וַיּאמֶר לוֹ: אִם תָּבִין סוֹד הַשִּׁיר וְרָזָיו .  עֲשֵׂה שִׁיר יְהִי סוֹפוֹ: נָקַבְתָּ בְּמַטָּיו רֹאשׂ פּרָזָיו.

 

וַיִּשָּׂא מְשָׁלוֹ וַיֹּאמַר:

נְטֵה הָעֵט כְּמוֹ מַטֶּה עֲלֵי יַם

תְּעוּדָה, עַד תְּגַל סוֹדוֹ וְרָזָיו.

וְהַךְ בּוֹ רֹאשׂ מְקַנֵּא עַד כְּלוֹתוֹ

וְנָקַבְתָּ בְמַטָּיו רֹאשׁ פְּרָזָיו.

 

וַיַּעַן הָעֶשְׂרִים וַיּאמֶר לוֹ:  אִם תִּרְצֶה לְהַרְאוֹת בּשִׁירֶיךָ יְפִי מִלֵּיהֶם .  עֲשֵׂה שִׁיר יְהִי סוֹפוֹ: כִּי בַדָּבָר אֲשֶׁר זָדוּ עלֵיהֶם.

 

וַיִּשָּׂא מְשָׁלוֹ וַיֹּאמַר:

לְבָבִי פָצְעוּ עֵינֵי צְבִי חֵן

בְּקַשְׁתָּם כִּי כְלֵי חָמָס כְּלֵיהֶם.

וְעַל כֵּן פָּצְעוּ עֵינֵי לְחָיָיו

וּבַדָּבָר אֲשֶׁר זָדוּ עֲלֵיהֶם.

 

וַיַּעַן הָאֶחָד וְעֶשְׂרִים וַיּאמֶר לוֹ: תִּרְצֶה לְהָפִיץ מֵי שִׂכְלְךָ כַּנָּהָר .  עֲשֵׂה שִׁיר יְהִי סוֹפוֹ: הִשָּׂמְרוּ לָכֶם עֲלוֹת בָּהָר.

 

וַיִּשָּׂא מְשָׁלוֹ וַיֹּאמַר:

הַגַּאֲוָה כָּהָר וְעוֹלֶה בָּהּ

יִפֹּל וּפִתְאֹם אַרְצָה יִגְהָר.

לָכֵן מְתֵי שֵׂכֶל וְאַנְשֵׁי לֵב

הִשָּׁמְרוּ לָכֶם עֲלֹות בָּהָר.

 

וַיַּעַן הַשְּׁנַיִם וְעֶשְׂרִים וַיּאמֶר לוֹ: אִם תִּרְצֶה לִהְיוֹת שִׁירְךָ עָרֵב לְכָל אָזְנַיִם .  עֲשֵׂה שִׁיר יְהִי סוֹפוֹ: עֵינָיו כְּיוֹנִים עַל אֲפִיקֵי מָיִם.

 

וַיִּשָּׂא מְשָׁלוֹ וַיֹּאמַר:

עֹפֶר יְפֵה מַרְאֶה יְפֵה עֵינַיִם

יִקְרַע לְבַב הַחֹשְׁקִים לִשְׁנַיִם.

לֶחְיוֹ אֲפִיקֵי נַחֲלֵי עֵדֶן, אֲבָל

עֵינָיו כְּיוֹנִים עַל אֲפִיקֵי מָיִם.

 

וַיַּעַן הַשְּׁלשָׁה וְעֶשְׂרִים וַיּאמֶר לוֹ: אִם עַל מְלֶאכֶת הַשִּׁיר יָכוֹל תּוּכַל .  עֲשֵׂה שִׁיר יְהִי סוֹפוֹ: וְהֵבֵאתָ לְאָבִיךָ וְאָכָל.

 

וַיִּשָּׂא מְשָׁלוֹ וַיֹּאמַר:

בְּכָל-לִבְּךָ יְרָא הוֹרָךְ וּמוֹרָךְ

וְאָז תֶּחְכַּם בְּמַעְשֶׂיךָ וְתִשְׂכָּל.

וְלַקֶּט-נָא בְּגַן שִׂכְלָךְ פְּרִי בִין

וְהֵבֵאתָ לְאָבִיךָ וְאָכָל.

 

וַיַּעַן הָאַרְבָּעָה וְעֶשְׂרִים וַיּאמֶר לוֹ: אִם תֶּאֱהַב לְהַחֲרִיד בְּשִׂירֶיךָ לֵב שׂוֹמְעֵיהֶן .  עֲשֵׂה שִׁיר יְהִי סוֹפוֹ: וּבָאֵשׁ יִשְׂרְפוּ אוֹתוֹ וְאֶתְהֶן.

 

וַיִּשָּׂא מְשָׁלוֹ וַיֹּאמַר:

אֱנוֹשׁ נִלְכַּד בְּרֶשֶׁת תַּאֲוֹתָיו

לְמַעַן כִּי כְלֵי חָמָס כְּלֵיהֶן

וּבַסוֹף תֶּאֱבַל נַפְשׁוֹ וְרוּחוֹ

וּבָאֵשׁ יִשְׂרְפוּ אֹתוֹ וְאֶתְהֶן.

 

וַיַּעַן הַחֲמִשָּׁה וְעֶשְׂרִים וַיּאמֶר לוֹ: אִם תְּסַקֵּל לִמְלֶאכֶת הַשִּׁיר נְתִיבָה .  עֲשֵׂה שִׁיר יְהִי סוֹפוֹ: מִכָּל אֲשֶׁר יַעֲשֶׂה לְאַשְׁמָה בָהּ.

 

וַיִּשָּׂא מְשָׁלוֹ וַיֹּאמַר:

כָּל-אִישׁ אֲשֶׁר יַעְזֹב רְצוֹן צוּרוֹ

נַפְשׁוֹ תְּהִי דָוָה עֲלֵי חוֹבָה.

וּגְמוּל יְהִי מוֹצֵא עֲלֵי אַחַת

מִכֹּל אֲשֶׁר יַעֲשֶׂה לְאַשְׁמָה בָהּ.

 

וַיַּעַן הַשִּׁשָׁה וְעֶשְׂרִים וַיּאמֶר לוֹ: אִם תִּתְאַו לְהָעִיר לְשִׁירֶיךָ זְמָמָי .  עֲשֵׂה שִׁיר יְהִי סוֹפוֹ: אַל תַּעֲלֵנִי בַחֲצִי יָמָי.

 

וַיִּשָּׂא מְשָׁלוֹ וַיֹּאמַר:

רוּחַ אֲנָחוֹת נָשְׁבָה בִי עַד 

הִתְקַדְּרוּ בַעְנַן בְּכִי שָׁמָי.

צוּרִי רְפָא צִירִי וְעַל חֶטְאִי

אַל תַּעֲלֵנִי בַחֲצִי יָמָי.

 

וַיַּעַן הַשִּׁבְעָה וְעֶשְׂרִים וַיּאמֶר לוֹ: אִם תַּחְפֹּץ לְהַלְאוֹת בְּשִׁירֶיךָ כָל מִי יְנַסֵּם .  עֲשֵׂה שִׁיר יְהִי סוֹפוֹ: יִשְׁלַח דְּבָרוֹ וְיַמְסֵם.

 

וַיִּשָּׂא מְשָׁלוֹ וַיֹּאמַר:

עַל רֹב פְּשָׂעַי דְּמָעַי

גָּבְרוּ וְאֵידִי יְכַסֵּם

קָפְאוּ אֲבָל אֵשׁ לְבָבִי

יִשְׁלַח דְּבָרוֹ וְיַמְסֵם

 

וַיַּעַן הַשְּׁמוֹנָה וְעֶשְׂרִים וַיֹּאמֶר לוֹ: אִם תִּרְצֶה לִהְיוֹת סוֹד שִׂכְלְךָ מְפֹרָשׁ .  עֲשֵׂה שִׁיר יְהִי סוֹפוֹ: יָבוֹא אֱלֹהֵינוּ וְאַל יֶחֱרַשׁ.

 

וַיִּשָּׂא מְשָׁלוֹ וַיֹּאמַר:

הָאֵל אֲשֶׁר אֶל שׁוֹאֲלוֹ נִדְרָשׁ

עַמָּךְ דְּלֵה מִיָּם עֳנִי נִגְרָשׁ.

לַעְשׂוֹת בְּאוֹיְבִים מִשְׁפְּטֵי נָקָם

יָבוֹא אֱלֹהֵינוּ וְעַל יֶחְרָשׁ.

 

וַיַּעַן הַתִּשְׁעָה וְעֶשְׂרִים וַיּאמֶר לוֹ: אִם תִּתְאַו לִהְיוֹת מַעֲלָתְךָ נְסוּכָה . עֲשֵׂה שִׁיר יְהִי בְּסוֹפוֹ: וְהָיְתָה לַה' הַמְּלוּכָה.

 

וַיִּשָּׂא מְשָׁלוֹ וַיֹּאמַר:

חֲמֹל שַׁדַּי עֲלֵי עֵדָה נְבוּכָה

גְּבֶרֶת אַךְ לְכָל-רֶגֶל דְרוּכָה.

גְּאַל מַלְכוּתְךָ מִיַּד עֲבָדִים

וְהָיְתָה לַאדנָי הַמְּלוּכָה.

 

וַיַּעַן הַשְּׁלוֹשִׁים וַיֹּאמֶר לוֹ: אִם תִּרְצֶה לִהְיוֹת שִׁירְךָ נֶחְמָד לְכָל לֵב .  עֲשֵׂה שִׁיר וּבְסוֹפוֹ: מְשׁוֹךְ חַסְדְּךָ לְיוֹדְעֶיךָ וְצִדְקָתְךָ לְיִשְׁרֵי לֵב.

 

וַיִּשָּׂא מְשָׁלוֹ וַיֹּאמַר:

רְאֵה שַׁדַּי הֲכִי שַׁחְתִּי

וְנִשְׁכַּחְתִּי כְּמֵת מִלֵּב.

מְשֹׁךְ חַסְדָּךְ לְיוֹדְעֶיךָ

וְצִדְקָתָךְ לְיִשְרֵי לֵב.

 

אָמַר הַמַּגִּיד: וְכַאֲשֶׁר שָׁמְעָה מְלִיצָתוֹ אָזְנִי .  נִבְהַל לְבָבִי וְרַעְיוֹנִי .  וְשַׂמְתִּי עָלָיו עֵינִי .  וְהִנֵה הוּא חֶבֶר הַקֵּינִי .  אֲבִי כָּל יוֹשֵׁב אָהֳלֵי תוּשִׁיּוֹת .  וּמַפְלִיא פְלִילִיּוֹת .  וּבִרְאוֹתִי זִיו פָּנָיו נִגְלוּ פָּנָי .  וְנָגֹלּוּ שְׁמֵי יְגוֹנָי .  וְשָׂמַח לְבָבִי עִמּוֹ .  וְסָר יְגוֹנוֹ וְזַעְמוֹ .  עֵקֶב הָיְתָה רוּחַ אַחֶרֶת עִמּוֹ .  וְעָמַדְנוּ בְחֶבְרָה נְעִימָה שְׁנֵינוּ .  עַד עָבְרָה רוּחַ קִנְאָה עַל זְמַנֵּנוּ .  וְהִפְרִיד בֵּינֵינוּ.

 

לתוכן הענינים

לדף הראשי של פרויקט בן-יהודה