קין על שפת הים/ מאיר הלוי לטריס
אוֹיָה אוֹיָה לִי! נַפְשִׁי אָבָלָה
עַד מָה תְנִידֵנִי רוּחַ חֻבָּלָה!
פַּלְגֵי אֱלֹהִים יֶהֱמוּ יֶחְמָרוּ
בְּדָכְיָם דְּמֵי הֶבֶל כַּשּׁחַל יִנְעָרוּ.
עַד אַפְסֵי אֶרֶץ כַּנְפוֹת אֲדָמָה
תִּרְדְּפֵנִי עַל צַוָּאר תִּגרַת נְקָמָה
לִמְקוֹם לֹא יִלְלָה עוֹד הָאֲנָחָה
מֵחֲתַת דְּמֵי הֶבֶל נַפְשִׁי בְרָחָה.
אוֹיָה לִי! דְמֵי אָחִי בְּרוֹגֶז יִנְהָמוּ
מִמִּשְבְּרֵי הַיָּם בְּאָזְנַי יִנְאָקוּ
מִנְּקִיקֵי סֶלַע מָרָה יִזְעָקוּ!
כְּעַל חַלְמִישׁ צוּר גַּלִּים יִשְׂתָּעָרוּ
שִׂיחִי וִיגוֹנִי סְבִיבִי נִשְׂעָרוּ
בִּעוּתֵי-יָהּ רֶגַע לֹא יַרְפּוּנִי
וּדְמֵי אָחִי עַד נֶצַח יִדְלְקוּנִי
פְּצוּ לוֹעַ גַּלִּים! אֱהִי לָכֶם חֶבֶל
פִּי הָאֲדָמָה בָּלְעָה דְּמֵי הֶבֶל
עֵת קְשִׁי זְרוֹעִי מְקוֹר חַיָּיו הֶחְרִיבָה
וַיָּאוֹר אֵל נֹקֵם! וְהִיא הִקְשִׁיבָה!
פְּצוּ לוֹעַ גַּלִּים! אֱהִי לָכֶם חֶבֶל
נִבְכֵי יָם כַּסּוּנִי מֵחֲמַת דְּמֵי הֶבֶל!
הוֹי לַשּׁוְא! גַּם בָּאָרֶץ הַנְּשִׁיָּה
לֹא תֶשִׁי נְקָמָה! זְרוֹעַ הַנְטוּיָה!
כִּי אָבוֹא בְּאֹפֶל וְחֹשֶׁךְ יְשׁוּפֵנִי
בַּלְהוֹת אָחִי לִרְאוֹת אוֹר בַּעֲדֵנִי;
אַרְקִיעַ לִשְׁחָקִים לְסֵתֶר עָבִים
וְאָחִי יֹאחֵז דַּרְכִּי בִּפְנֵי לְהָבִים.
עֲפַר בֵּית-חָמְרִי רוּחַ יִדְפֶנּוּ
לְאַרְבַּע רוּחוֹת שָׁמַיִם יְזָרֶנּוּ
וַחֲמַת אֵלִי יָדוֹ כִּי קָשָׁתָה
לְהָלְמֵנִי נְטוּיָה עוֹד לִי נִגְלָתָה.
הוֹי צָרוֹת לְבָבִי אֵין סְפוֹרוֹת לָמוֹ!
הִרְחִיבוּ בְתוֹכִי מִי יִמְשׁוֹל בָּמוֹ?
מִי זֶה יַצֵּב גְּבוּלוֹת לִמְרִי יְגוֹנִי?
פִּידִי יִמָּשֵׁךְ עַד כְּגֹדֶל זְדוֹנִי.
כִּי אֻמְלַל אָנִי אֱלֹהִים אַרְרַנִי
עֵת לְדַכֵּא אָחִי הָרֶצַח קְרָאַנִי
אוֹיָה אוֹיָה לִי אֻמְלַל הִנֵּנִי!
אַרְחִיק נְדוֹד – וְאָחִי בְעָקֵב יאֹחֲזֵנִי!
-
(Nach Stollberg's: “Kain am Ufer des Meeres.” ↩