וְאוֹמֵר "אַל תִּישַׁן! / שְׁתֵה יַיִן יָשָׁן–

וְכֹפֶר עִם שׁוֹשָׁן / וּמֹר עִם אֲהָלִים

בְּפַרְדֵּס רִמּוֹנִים / וְתָמָר וּגְפָנִים

וְנִטְעֵי נַעְמָנִים / וּמִינֵי הָאְשָׁלִים,

וְרֶגֶשׁ צִנּוֹרִים / וְהֶמְיַת כִּנּוֹרִים

עֲלֵי פֶה הַשָּׁרִים / בְּמִנִּים וּנְבָלִים,

וְשָׁם כָּל עֵץ מוּנָף / יְפֵה פֶרִי עָנָף

וְצִפּוֹר כָּל כָּנָף / יְרַנֵּן בֵּין עָלִים,

וְיֶהְגּוּ הַיּוֹנִים / כְּהוֹגִים נִגּוּנִים,

וְהַתּוֹרִים עוֹנִים / וְהוֹמִים כַּחְלִילִים.

וְנִשְׁתֶּה בַעְרוּגוֹת / בְּשׁוֹשַׁנִּים סוּגוֹת,

וְנָנִיס הַתּוּגוֹת / בְּמִינֵי הִלּוּלִים,

וְנֹאכַל מַמְתַקִּים / וְנִשְׁתֶּה מִזְרָקִים

וְנִנְהַג כַּעְנָקִים / וְנִשְׁתֶּה בִסְפָלִים,

וְאָקוּם בִּבְקָרִים / אֲנִי לִשְׁחֹט פָּרִים

בְּרִיאִים נִבְחָרִים / וְאֵילִים וַעְגָלִים,

וְנִמְשַׁח שֶׁמֶן טוֹב / וְנַקְטִיר עֵץ רָטֹב

בְּטֶרֶם יוֹם קָטוֹב / יְבוֹאֵנוּ נַשְׁלִים".

גְּעַרְתִּיהוּ "דֹּם,דֹּם, / עֲלֵי זֹאת אֵיךְ תִּקְדֹּם–

וּבֵית קֹדֶשׁ וַהְדוֹם / אֱלֹהִים לָעְרֵלִים!

בְּכִסְלָה דִבַּרְתָּ / וְעַצְלָה בָחַרְתָּ

וְהֶבֶל אָמַרְתָּ / כְּלֵצִים וּכְסִילִים,

וְעָזַבְתָּ הֶגְיוֹן / בְּתוֹרַת אֵל עֶלְיוֹן

וְתָגִיל– וּבְצִיּוֹן / יְרוּצוּן שׁוּעָלִים.

וְאֵיךְ נִשְׁתֶּה יַיִן / וְאֵיךְ נָרִים עַיִן–

וְהָיִינוּ אַיִן / מְאוּסִים וּגְעוּלִים!"