[הֲרֵיחַ מֹר מְאַחֵז הָאֲפָסִים] / ר' משה אבן-עזרא
הֲרֵיחַ מֹר מְאַחֵז הָאֲפָסִים / וְאִם־רוּחַ תְּנֹפֵף הַהֲדַסִּים
וְעָנָן אוֹ עֲתַר קָנֶה וְקִדָּה / וּבָרָק אוֹ בְרַק כֹּסוֹת עֲסִיסִים
וְהֶעָבִים יְרִיקוּן הַבְּשָׂמִים / וּמֵרָאשֵׁי הֲדַסִּים הָֽרְסִיסִים
וְהָרִים יִפְצְחוּ רִנָּה בְּלִי־פֶה / וְאִם תֹּרִים עֲלֵי בַדִּים וְסִיסִים
וְאֶרֶץ מִשְׁבְּצוֹת זָהָב לְבוּשָׁהּ / וּמֶשִׁי כֻתֳּנוֹתֶיהָ וּפַסִּים
וְיָשְׁרוּ כָל־נְתִיבֶיהָ לְצֹעֵד / וְשָׁבוּ כַבְּקָעוֹת הָֽרְכָסִים
וְהַבָּתִּים יְרַנֵּנוּ וּמִקִּיר / צְרוֹר יַעַן וּמֵעֵצִים כְּפִיסִים
וּפָנִים זֹעֲפִים לָבְשׁוּ עֲלִיצוּת / וְעַלִּיזִים מְתֵי יָגוֹן וְשָׂשִׂים
וְשִׂפְתֵי עִלְּגִים צַחוֹת יְנוּבוּן / לְקוֹמֵם בִּנְיְנֵי גִיל הַהֲרוּסִים
הֲכִי נִרְאוּ פְלָאִים הַצְּפוּנִים / אֲשֶׁר הָיוּ בְּלֵב יָמִים כְּמֻסִים
וְאֹהֶל הַֽיְקָר חֻבַּר וְלֻלְאוֹת / תְּהִלּוֹת הֽוּבְאוּ בָהֶם קְרָסִים
וְיָמִים קֵֽרְבוּ עֶצֶם לְעַצְמוֹ / וְדֻבָּקוּ בְּשָׂרִים הַפְּרוּשִׂים
שְׂמָחוֹת נַעֲלוּ עַל־הַרֲרֵי מֹר / וְעַל־גִּבְעוֹת לְבוֹנָה הֵם כְּנִסִּים
וְעַל־כַּנְפֵי שְׁחָרִים קוֹל מְבַשֵּׂר / בְּתֵבֵל לֹא עֲלֵי כָרִים וְסוּסִים
שְׁלֹמֹה אֵֽרְשׂוּ דֹדָיו כְּבוּדָּה / וְאִם־סַהַר וְחַמָּה הָאֲרוּשִׂים
אֲשֶׁר אָשְׁרוּ נְתִיב־שֵׂכֶל פְּעָמָיו / וְרַגְלָיו דֹּֽרְכִים מוּסָר וּבוֹסִים
וּמִנֹּעַר שְׂעִפָּיו עַל־שְׁחָקִים / וְרַעְיוֹנָיו עֲלֵי־עַיִשׁ עֲמֻסִים
וְגָבַהּ מִבְּנֵי גִילוֹ כְּגֹבַהּ / בְּנֵי אִישׁ מִבְּהֵמוֹת אוֹ רְמָשִׂים
וְיָקְרוּ מַעֲלָלָיו מֵעֲלֵיהֶם / כְּמוֹ יָקְרוּ פְנִינִים מֵחֲרָשִׂים
יְרוֹצֵצוּ אֲבַק רַגְלָיו לְהַשִּׂיג / וְאֵיךְ צִפּוֹר יְהִי רֹדֵף פְּרָסִים
עֱנוּ אֵיכָה כְסִיל נִפְגַּשׁ בְּכִימָה / עֲלֵי־אֶרֶץ בְּלִי דֹרֵשׁ וּמֵשִׂים
וְאִם אֵינָם הֲלֹא כַנְפוֹת הֲדָרָם / עֲלֵי אַפֵּי תְהִלּוֹתָם פְּרֻשִׂים
וְאֵיךְ גָּזְלוּ מְאוֹרֵיהֶם הֲנִרְאוּ / אֲנָשִׁים בֹּזֲזִים אוֹרִים וְשֹׁסִים
יְדִידָיו מַהֲרוּ אֶל־יֵין יְדִידֹת / שְׁתוֹת הַיּוֹם בְּמִזְרַק הַמְּשׂוֹשִׂים
וְעוֹד הִתְעַתְּדוּ לִכְפֹּל שְׂמָחוֹת / וּפִתְחוּ הַהֲנָחוֹת מַאֲבוּסִים
כְּמַיִם קָֽפְאוּ הֵם הַגְּבִיעִים / וְגֶחָלִים בְּתוֹכֵמוֹ נְמַסִּים
שְׁתוּ־נָא כַּאֲשֶׁר יִסַּד בְּבֵיתוֹ / שְׁתוֹת כַּדָּת לְבַל־תִּהְיוּ אֲנוּסִים
וְגִיל בָּחוּר בְּאַיֶּלֶת אֲהָבִים / וְהַרְנִינוּ שְׁנֵיכֶם נֶעֱלָסִים
וְהִתְעַדֵּן בְּקוֹמַת־חֵן כְּתָמָר / אֲבָל תָּנַע כְּבַדֵּי הַהֲדַסִּים
וְאַל־תִּפְחַד לְקוֹל חֶלְיָה בְּצַוָּאר / לְעֵת נֶשֶׁף וְרִגְשַׁת הַשְּׁבִיסִים
וְאַל־תִּרְהֶה לְעֵינַיִם כְּיוֹנִים / אֲשֶׁר שָׁכְרוּ אֲבָל מִיֵּין חֲמָסִים
וְיַעְמֹד לִבְּךָ בַּחְבוֹק זְרֹעוֹת / בְּאֶצְעָדוֹת וְתִפְאֶרֶת עֲכָסִים
וְאַל־תִּבְרַח לְצִפְעֹנֵי קְוֻצּוֹת / עֲלֵי פָנִים בְּמֵי־בֹשֶׁת כְּבוּסִים
הֲכִי לִקְרָֽאתְךָ יֵצְאוּ לְשָׁלוֹם / וְאִם־סֹתְרִים הֲדַר פָּנִים וְכֹסִים
וְרִמּוֹנִים בְּגַן שׁוֹשָׁן וְאָכֵן / בְּרָאשֵׁי מַשְׂמְרוֹת בֹּשֶׂם תְּפוּשִׂים
וְיָדֶיךָ בְּעָבְרָם עַל־פְּנֵיהֶם / לְאִטָּם מֹעֲכִים אֹתָם וְעֹשִׂים
וְדַע כִּי־הַזְּמָן עֶבֶד רְצוֹנְךָ / וּבָנָיו לַעֲשׂוֹת חֶפְצָךְ כְּנוּסִים
לְהַקְרִיב מִשְׁאֲלוֹתֶיךָ יְחִישׁוּן / וְאֶת־כָּל־תַּאֲלַת לִבְּךָ מְנִיסִים
וְהֵא שִׁיר דּוֹד בְּךָ יִשְׂמַח לְבָבוֹ / וּמוֹרָשָׁיו לְךָ פֹּרְחִים וְטָשִׂים
מְעִיל כָּבוֹד לְבַל־יִבְלֶה לְעוֹלָם / עֲדֵי יִהְיוּ יְסוֹדוֹתָיו נְתוּסִים
הֲכִי מֵימֵי יְדִידוּתוֹ כְּשֶׁלֶג / מְאֹד זַכּוּ בְּרֶגֶל לֹא רְפוּשִׂים
וְאִם־יִסָּֽתְרוּ מִמְּךָ בְּלִבִּי / בְּנֵרוֹת דֵּעֲךָ יִהְיוּ חֲפוּשִׂים
לְמַעַן לַמְּבִינִים הַפְּנִינִים / וְלָרֵקִים בְּרִיאֵי הַכְּבָשִׂים
וְתַאְוַת הַגְּבָרִים לַאֲמָרִים / וְהַפֹּתִים לְבַרְבֻּרִים אֲבוּסִים
יְלִיד טוֹבִים חֲיֵה עִם בַּת־נְדִיבִים / בְּצֵל שַׁדַּי שְׁלֵוִים בּוֹ וְחֹסִים.