אֵל, נִכְסַפְתִּי / לִרְאוֹתֶךָ,

עַל כֵּן חַשְׁתִּי / אֶל בֵּיתֶךָ;

לַיְלָה קַמְתִּי / לְחַלּוֹתֶךָ –

אֶשְׂבְּעָה בְהָקִיץ / תְּמוּנָתֶךָ!

בְּשִׁמְךָ קָרְאוּ / אֶבְיוֹנֶיךָ

וְעַיִן נָשְׂאוּ / לִמְעוֹנֶךָ,

נְשׂוֹא עֹל נִלְאוּ / בֵּין מוֹנֶיךָ –

וְהִנָּם שָׁקְדוּ / עַל דְּלָתֶיךָ.

רְצוֹנְךָ יָזְמוּ, / נוֹרָא עֲלִילָה,

וְנֶשֶׁף קִדְּמוּ / לְסַדֵּר תְּפִלָּה,

וּמִמְּךָ נִכְלְמוּ / לְבַקֵּשׁ מְחִילָה

עַל לֹא שָׁמְרוּ / תוֹרָתֶךָ.

הֲגוֹת מַהֲלָלָךְ / בְּפֶה לֹא חָשְׂכוּ

וְעֹצֶם גָּדְלָךְ / בְּקָהָל עָרְכוּ;

חֲקֹר מִפְעָלָךְ / לְשׁוֹנָם דָּרְכוּ –

וּמִי יַשְׁמִיעַ / תְּהִלָּתֶךָ?

מְשֹׁךְ, אֵל, חֶסֶד / אֶל בָּנֶיךָ,

וּמִקְדָּשׁ יַסֵּד / בִּרְצוֹנֶךָ,

וְכַלֵּה כֶּשֶׂד / בַּחֲרוֹנֶךָ

וְשׁוּר, כִּי בָאוּ בְּנַחְלָתֶךָ.

מְחָרְפֵי שִׁמְךָ – / הֲרֹס שִׁנֵּיהֶם

וְנַהֵל עַמְּךָ / מֵאָהֳלֵיהֶם;

וְהַרְאֵם עָצְמְךָ / וּפְנֵה אֲלֵיהֶם

וְלִי, אֲנִי עַבְדְּךָ בֶּן אֲמָתֶךָ.