לוגו
לְךָ אֵלִי תְּשׁוּקָתִי (בקשה ליום הכיפורים)
מיקום ביצירה:
0%

לְךָ אֵלִי תְּשׁוּקָתִי, / בְּךָ חִשְׁקִי וְאַהְבָתִי,

לְךָ לִבִּי וְכִלְיוֹתָי, / לְךָ רוּחִי וְנִשְׁמָתִי.

לְךָ יָדַי, / לְךָ רַגְלָי, / וּמִמָּךְ הִיא תְבוּנָתִי.

לְךָ עַצְמִי, / לְךָ דָּמִי / וְעוֹרִי עִם גְּוִיָּתִי.

לְךָ עֵינַי / וְרַעְיוֹנָי / וְצוּרָתִי וְתַבְנִיתִי.

לְךָ רוּחִי, / לְךָ כֹחִי / וּמִבְטַחִי וְתִקְוָתִי.

לְךָ לִבִּי / וְדַם חֶלְבִּי / כְּשֶׂה אַקְרִיב וְעוֹלָתִי.

לְךָ, יָחִיד בְּלִי שֵׁנִי, / לְךָ תוֹדֶה יְחִידָתִי,

לְךָ מַלְכוּת, / לְךָ גֵאוּת, / לְךָ תֵאוֹת תְּהִלָּתִי.

לְךָ עֶזְרָה / בְּעֵת צָרָה – / הֱיֵה עֶזְרִי בְצָרָתִי!

לְךָ אוֹחִיל / בְּעֵת אָחִיל / כְּיוֹלֵדָה בְּאַנְחָתִי.

לְךָ שִׂבְרִי – / רְפָא שִׁבְרִי / וְאֶת צִירִי וּמַכָּתִי!

לְךָ אֶהְמֶה – / וְלֹא אֶדְמֶה עֲדֵי תָאִיר אֲפֵלָתִי.

לְךָ נֶצַח, / בְּךָ אֶבְטַח, / וְאַתָּה הוּא אֱיָלוּתִי.

לְךָ אֶזְעַק, / בְּךָ אֶדְבָּק / עֲדֵי שׁוּבִי לְאַדְמָתִי.

לְךָ אָנִי בְּעוֹדִי חָי – / וְאַף כִּי אַחֲרֵי מוֹתִי.

לְךָ אוֹדֶה / וְאֶתְוַדֶּה / עֲלֵי חֶטְאִי וְרִשְׁעָתִי.

לְךָ יִשְׁעִי – / סְלַח רִשְׁעִי / וְאֶת פִּשְׁעִי וְאַשְׁמָתִי!

לְךָ אִכַּף / וְאֶפְרֹשׂ כָּף – / שְׁמַע נָא אֶת תְּחִנָּתִי!

לְךָ אֶבְכֶּה / בְּלֵב נִדְכֶּה / בְּרֹב שִׂיחִי וְתוּגָתִי.

לְךָ חֶסֶד, לְךָ חֶמְלָה – / חֲמֹל עַל כָּל תְּלָאָתִי!

וְגָדוֹל מִנְּשֹׂא חֶטְאִי, / וְגָדְלָה יַד מְשׁוּבָתִי –

וְלָכֵן גָדְלוּ צִירַי / וְקָצַרְתִּי זְרִיעָתִי.

וְאוֹי עָלַי וְהָהּ לִי אִם / תְּדִינֵנִי כְּרִשְׁעָתִי!

וְיִצְרִי, צוֹרְרִי תָּמִיד / כְּמוֹ שָטָן לְעֻמָּתִי,

יְעָצַנִי / וּפִתָּנִי / בְּמוֹעֵצוֹת לְרָעָתִי –

וְעָלָיו, לֹא עֲלֵי בִלְתּוֹ, / חֲמָסִי וּתְלוּנָתִי.

וְעֵת יַעֲלוּ עֲלֵי לִבִּי / עֲוֹנוֹתַי בְּמִטָּתִי –

מְאֹד אֶפְחַד / וְגַם אֶרְעָד, / מְאֹד תִּגְדַּל מְהוּמָתִי,

וְאֶרְגַּז עֵת אֱהִי זוֹכֵר / לְפָנֶיךָ מְעֻוָּתִי.

וְאֶעְמֹד נֶגְדְּךָ עֵירֹם – / וּמַה תִּהְיֶה תְּשׁוּבָתִי

בְּיוֹם בּוֹ יַעֲנֶה כַּחְשִׁי / וְאֹכַל מִפְּרִי דָתִי,

וְיָבוֹאוּ יְמֵי שִׁלּוּם / וְתִקְרַב עֵת פְּקֻדָּתִי?

וְשִׁמְעָךְ, עֵת שְׁמַעְתִּיהוּ, / מְאֹד זַעְתִּי וְיָרֵאתִי –

וּמִי יַעְמֹד לְפָנֶיךָ / וּמִי יִהְיֶה תְּמוּרָתִי?

וְאֵי חֶשְׁבּוֹן לְךָ אֶתֵּן / וְאֵיךְ אֶצְדַּק בְּטַעְנָתִי?

וְאָשַׁמְתִּי / וְאָרַבְתִּי / וּבָגַדְתִּי וּבָזִיתִי

וְגָזַלְתִּי / וְגָנַבְתִּי, / הֲרֵעוֹתִי וְהִרְשָׁעְתִּי

וְגַם זַדְתִּי / וְחָמַסְתִּי / וְחָטָאתִי וְהֶחְטֵאתִי

וְטָעִיתִי/ וְיָעַצְתִּי / וְכִזַּבְתִּי וְכָפָרְתִּי

וְלוֹצַצְתִּי / וְגַם לַצְתִּי / וּמָרַדְתִּי וּמָרִיתִי

וְנָאַצְתִּי / וְנָאַפְתִּי / וְסָרַרְתִּי וְסָרָחְתִּי

וְעָוִיתִי / וְהֶעְוֵיתִי / וּפָשַׁעְתִּי וּפָגַמְתִּי

וְצָרַרְתִּי / וְצִעַרְתִּי / וְקִלַּלְתִּי וְקִלְקַלְתִּי

וְרָשַׁעְתִּי / וְשִׁחַתִּי / וְתִעַבְתִּי וְתָעִיתִי.

וְסַרְתִּי מִדְּרָכֶיךָ / וְכִסַּתְנִי כְלִמָּתִי

וְהִגְדַּלְתִּי עֲשׂוֹת רֶשַׁע / וְהֶחְזַקְתִּי בְרִשְׁעָתִי,

וְכִחַשְׁתִּי / וּמָעַלְתִּי / וְעָשַׁקְתִּי וְרַצּוֹתִי.

וְחָטָאתִי / בְּרֵאשִׁיתִי – / וְרָשַׁעְתִּי בְאַחְרִיתִי,

וְאָשַׁמְתִּי / בְיַלְדוּתִי – / וּבָגַדְתִּי בְזִקְנוּתִי,

וּבָחַלְתִּי בְתוֹרָתָךְ – / וּבָחַרְתִּי בְתוֹרָתִי,

וְעָזַבְתִּי רְצוֹנֶךָ – / וְהָלַכְתִּי בְתַאְוָתִי.

וְהִשְׁלַמְתִּי רְצוֹן יִצְרִי / וְלֹא בַנְתִּי לְאַחְרִיתִי

וְהִרְבֵּיתִי לְהוֹסִיף חֵטְא / עֲלֵי רִשְׁעִי וְחוֹבָתִי –

וְלָכֵן כִּסְתָּה פָנַי / כְּלִמָּתִי וְגַם בָּשְׁתִּי.

וְאֵין לִי בִּלְתְּךָ מָנוֹס / וּמִמָּךְ הִיא סְלִיחָתִי.

וְאִם תָּבִיא בְּמִשְׁפָּט עַבְ-/דְּךָ – מַה הִיא גְבוּרָתִי?

וּמָה אָנִי וּמֶה חַיַּי / וּמַה כֹּחִי וְעָצְמָתִי?

כְּקַשׁ נִדָּף, / מְאֹד נֶהְדָּף – / וְאֵיךְ תִּזְכֹּר מְשׁוּגָתִי?

וְנֶאְלַמְתִּי / וְנִכְלַמְתִּי / וְכִסַּתְנִי כְלִמָּתִי.

רְצוֹנָךְ אֶשְׁאֲלָה תָמִיד / לְמַלֹּאת אֶת שְׁאֵלָתִי,

וְהֶרֶב כַּבְּסֵנִי מֵ-/עֲוֹנוֹתַי וְחַטָּאתִי,

וְהַבֵּט רֹב תְּלָאוֹתָי / וְדַלּוּתִי בְגָלוּתִי

וְאַל נָא תַעֲלֵם אָזְנָךְ / לְרַוְחָתִי לְשַׁוְעָתִי!

עֲרֹב עַבְדָּךְ לְטוֹבָה, גַּם / אֱמֹר נָא דַּי לְצָרָתִי

וְהַרְאֵנִי תְּשׁוּעָתָךְ / בְּטֶרֶם יוֹם תְּמוּתָתִי.

וְיוֹם נָפְלִי בְּפַח מוֹקְשִׁי – / סְמֹךְ נָא אֶת נְפִילָתִי!

וְלַעְנָה שָׂבְעָה נַפְשִׁי / עֲדֵי קַצְתִּי בְחַיָּתִי.

עֲשֵׂה עִמִּי לְטוֹבָה אוֹת / וְקוּמָה נָּא לְעֶזְרָתִי!

הֲכִי אַתָּה מְנָת חֶלְקִי / וְרִנָּתִי וְטוֹבָתִי

וְגוֹרָלִי / וּמַהְלָלִי / וְכָל גִּילִי וְשִׂמְחַָתִי;

שְׂשׂוֹן לִבִּי וְאוֹר עֵינַי / וּמָעֻזִּי וְחֶמְדָּתִי

וּמַרְגּוֹעִי / וְשַׁעְשׁוּעִי, / מְנוּחָתִי וְשַׁלְוָתִי.

הֲבִינֵנִי עֲבוֹדָתָךְ – / וְלָךְ תִּהְיֶה עֲבוֹדָתִי!

הֲשִׁיבֵנִי – וְאָשׁוּבָה / וְתִרְצֶה אֶת תְּשׁוּבָתִי.

וְהוֹרֵינִי דְּרָכֶיךָ / וְיַשֵּׁר אֶת נְתִיבָתִי

וְתִשְׁמַע אֶת תְּפִלָּתִי / וְתַעְנֶה אֶת עֲתִירָתִי.

בְּכָל לִבִּי דְרַשְׁתִּיךָ – / עֲנֵנִי, יָהּ, דְּרִישָׁתִי!

אֲנַסֵּךְ אֶת דְּמָעַי לָךְ – / מְחֵה חֶטְאִי בְדִמְעָתִי!

וְנַפְשִׁי אָמְרָה: חֶלְקִי / יְיָ הוּא וְנַחְלָתִי.

אֱסָף נָא אֶת עֲוֹנוֹתָי / בְּחַסְדְּךָ יוֹם אֲסִיפָתִי,

וְיוֹם לֶכְתִּי לְפָנֶיךָ – / רְצֵה נָא אֶת הֲלִיכָתִי

וְעִם עוֹשֵׂי רְצוֹנֶךָ / תְּנָה שָׂכָר פְּעֻלָּתִי.

וְתִשְׁלַח מַלְאֲכֵי הַחֵן – / וְיֵצְאוּ נָא לְעֻמָּתִי

וְ׳שָׁלוֹם בּוֹאֲךָ׳ יֹאמְרוּ / בְּקוֹל אֶחָד בְּבִיאָתִי.

יְבִיאוּנִי לְגַן עֶדְנְךָ / וְשָׁם תִּהְיֶה יְשִׁיבָתִי,

וְאֶתְעַדֵּן בְּאוֹרֶךָ / וְשִׂים כָּבוֹד מְנוּחָתִי;

וְאוֹר גָּנוּז לְפָנֶיךָ / יְהִי סִתְרִי וְסֻכָּתִי

וְתַחַת צֵל כְּנָפֶיךָ / תְּנָה נָּא אֶת מְחִצָּתִי!