קינה לט׳ באב
אַלְלַי אַלְלַי, / צָרִי / סָמַךְ עָלַי!
אַלְלַי אַלְלַי, / צוּרִי / סָר מֵעָלַי!
אָמַר אוֹיֵב לְהָתֵל בִּי: / ׳עַם יְיָ אֵלֶּה –
הֲלֹא פִזַּרְתִּים בְּחַרְבִּי, / לֹא אֲדֹנִים לָאֵלֶּה!׳
אֵיךְ יַעְמֹד לִבִּי / וְתִקְרֶאנָה אֹתִי כָּאֵלֶּה?
הֲלֹא עַל כִּי אֵין אֱלֹהַי בְּקִרְבִּי / מְצָאוּנִי הָרָעוֹת הָאֵלֶּה.
בָּנֶיךָ, אֵיךְ תְּשִׁיתֵמוֹ / כִּכְלִי אֵין חֵפֶץ בּוֹ?
וּבַיִת בָּנוּ אֲבוֹתֵימוֹ, / אֱלֹהֵי יִשְׂרָאֵל בָּא בוֹ –
הֶחְרִיב צַר בְּיוֹם אֵידֵמוֹ, / שׁוּעָלִים הִלְּכוּ בוֹ,
וְאָמַר: ׳אֵי אֱלֹהֵימוֹ / צוּר חָסָיוּ בוֹ?׳
רָדָה הַצַּר וְהֵנִיף חַרְבּוֹ / בְּהֵיכַל קָדְשׁוֹ –
וְשָׁב הַמֶּלֶךְ לִמְסִבּוֹ / בִּמְעוֹן קָדְשׁוֹ.
וְאֵיךְ נָכְרִי כָּל מוּם בּוֹ / יָקוּם בִּמְקוֹם קָדְשׁוֹ?
אַיֵֵּה הַשָּׂם בְּקִרְבּוֹ / אֶת רוּחַ קָדְשׁוֹ?
מַה יַּעֲשׂוּ זְרוּיִם / בְּאֶרֶץ לֹא לָהֶם?
אוֹ מַה יַּעֲנוּ שְׁבוּיִם / לִפְנֵי שׁוֹבֵיהֶם –
וּלְחָרֵף אֱלֹהִים חַיִּים / שַׁתּוּ בַשָּׁמַיִם פִּיהֶם?
לָמָּה יֹאמְרוּ הַגּוֹיִם: / ׳אַיֵּה נָא אֱלֹהֵיהֶם?׳
הַנּוֹתֵן בַּיָּם דָּרֶךְ וּבְמַיִם עַזִּים נְתִיבָה,
נְקֹם אֶת נִקְמָתֵנוּ וְאֶת יְרִיבֵנוּ רִיבָה,
וְאֶת אַחְרִיתֵנוּ מֵרֵאשִׁיתֵנוּ הֵיטִיבָה!
הֲשִׁיבֵנוּ יְיָ אֵלֶיךָ וְנָשׁוּבָה.