סליחה
כָּל בָּשָׂר יָבוֹאוּ יַחַד לְעָבְדֶךָ,
כִּי אֵין בִּלְתֶּךָ וְלֹא יִדַּל כְּבוֹדֶךָ;
שֹׁמֵעַ תְּפִלָּה, עָדֶיךָ / כָּל בָּשָׂר יָבֹאוּ.
אֵל מָרוֹם עַל כֹּל, אֶחָד וְאֵין שֵׁנִי,
בִּיטָה וְאַל תִּבְזֶה הַיּוֹם עֱנוּת עָנִי –
לְמַעַן שִׁמְךָ, יְיָ – וְסָלַחְתָּ לַעֲוֹנִי!
גָּמְלֵנִי חַסְדֶּךָ – / וּמִשִּׁירִי אֲהוֹדֶךָ.
בּוֹנֶה מַעֲלוֹת עֶרֶץ וְגוֹדֵר כָּל פֶּרֶץ,
שְׁעֵה קוֹל עַם מִהֵר לְחַלּוֹתְךָ בְּמֶרֶץ.
׳חַסְדְּךָ, יְיָ, מָלְאָה הָאָרֶץ׳
יַעֲנֶה קוֹל שׁוֹקְדֶיךָ, / וְאַל תֵּט בְּאַף עַבְדֶּךָ.
רַחֲמֶיךָ מֵעוֹלָם, מֵבִין כָּל נֶעְלָם;
עֲוֹנִי אִם גָּדַל – לֹא אָשׁוּב נִכְלָם.
צַדִּיק, צִדְקָתְךָ צֶדֶק לְעוֹלָם,
הָפֵק לַחֲרֵדֶיךָ / גֹּדֶל חַסְדֶּךָ!
הַעֲבֵר חֲרוֹנֶיךָ וְהָסֵר קִצְפֶּךָ
וְלִבְנֵי אוֹהֲבֶיךָ הַאֲרֵךְ אַפֶּךָ,
וְשִׂיחָם יִכּוֹן קְטוֹרָה בְּאַפֶּךָ –
הֵמָּה יְדִידֶיךָ, / זֶרַע מְיַחְדֶיךָ.
מַלְכִּי וְצוּר חֶבְלִי, מוֹשִׁיעַ וְגוֹאֵל,
בִּיטָה בְדַלּוּתִי, כִּי יָדִי אֵין לְאֵל.
קְרָאתִיךָ, יוֹשֵׁב תְּהִלּוֹת יִשְׂרָאֵל,
אֵין בִּלְעָדֶיךָ / וְלֹא יִדַּל כְּבוֹדֶךָ.