סליחה
אֱלֹהִים, חֲסָדֶיךָ מְהֵרָה יְבוֹאוּנִי
וְתָשִׁיב לְבָבִי אֶל רְצוֹנָךְ וְתִרְצֵנִי.
וְעַל מַעְגְּלוֹתֶיךָ תְכוֹנֵן אֲשׁוּרַי, פֶּן
יְמוּטוּן נְתִיבוֹתַי, וְדָתְךָ הֲבִינֵנִי.
וְתִהְיֶה לְמִגְדַּל עֹז לְנַפְשִׁי בְּיוֹם צָרָה
וְתִשְׁבֹּר זְרוֹעַ צָר אֲשֶׁר בָּא לְלָכְדֵנִי.
וְאַל תִּזְכְּרָה לִי עוֹד עֲוֹנוֹת נְעוּרוֹתַי
וְאַל יֶחְפְּרוּ פָנַי בְּפָקְדָם בְּיוֹם דִּינִי.
וְיָדְךָ תְּהִי עִמִּי לְבַל אֶשְׁכְּחָה דָתְךָ
וְהָחִישׁ גְּאֻלָּתִי בְקָרוֹב וְתִפְדֵּנִי.
וְאֶרְאֶה בְּשׁוֹבֶבְךָ לְצִיּוֹן קְהִלּוֹתַי
וְיוֹם בֵּית דְּבִיר קָדְשָׁךְ תְּיַסֵּד וְתִבְנֵנִי.
וְתֹאמַר לְבַת צִיּוֹן: ׳אֲנִי אֶדְרְשָׁה דָמֵךְ
מִיַּד יְרִיבַיִךְ, וְאֶרְעֶה אֶת צֹאנִי.׳