ורתֹאה איצֹא [וקונן עליו עוד]
בְּיוֹם קָצַר אַפִּי / בְּמָשָׁל אֶפְתַּח־פִּי / הֲשַׁחַק עַפְעַפִּי / וְאִם־לֶחְיִי שִׂרְיוֹן
וּמַה־יִּתְאַב תָּאוֹב / לְקוֹל שִׂיחַ כָּאוֹב / לְבָבִי מִמַּכְאוֹב / וְיָדִי מֵרִפְיוֹן
וְיִיגַע וַיָּעַף / מְאֹד מִדְּבַשׁ רָעַף / וְנִשְׁאַר הָעַפְעַף / כְּחוֹמַת בַּת־צִיּוֹן
וְחֵמָה יִמָּלֵא / לְסוֹד לֹא־יִפָּלֵא / וְאֵיךְ לֹא־יִגָּלֶה / וְהוּא עַל־גִּלָּיוֹן
גְּעַרְתִּיו שׁוּב לֵבָב / וְאַל־תֵּלֵךְ שׁוֹבָב / הֲלֹא כִמְעַט סָבַב / לְךָ הַכִּלָּיוֹן
וְאֵיך תֶּאְהַב מֻטֶּה / וּמִדַּעַת תִּשְׂטֶה / וְאֶל־תֵּבֵל תִּטֶּה / וְהִיא כַחְלוֹם חֶזְיוֹן
וְאֵיךְ חַיִּים תִּבְחַר / וְתֵדַע כִּי מָחָר / אֱמֶת יִדְבַּק אַחַר / אֱלִימֶלֶךְ כִּלְיוֹן
וְתִשְׂמַח בִּרְנָנָה / בְּאֶרֶץ כִּמְלוּנָה / כְּמוֹ שִׂמְחַת יוֹנָה / עֲלֵי הַקִּיקָיוֹן
וְהָאָדָם הֵלֶךְ / וּבַחֹשֶׁךְ הוֹלֵךְ / וְהַנֶּפֶשׁ מֶלֶךְ / וְהַגּוּף אַפִּרְיוֹן
וְהַמָּוֶת יִגָּל / וְיִשְׁלַח הַמַּגָּל / וְנָרֹץ הַגַּלְגַּל / אֱלֵי בוֹר הַשְּׁאָיוֹן
וְעֵינֵי גִבּוֹר טַח / וְלַשֶּׁמֶשׁ יִשְׁטַח / וְעַל־קַשְׁתּוֹ יִבְטַח / וְיִתְעַל בַּסִּרְיוֹן
בְּכֹל יִפְנֶה יִרְשָׁע / וְכָל־הַיּוֹם יִפְשָׁע / כְּצַדִּיק עִם־רָשָׁע / וְעָשִׁיר עִם־אֶבְיוֹן
וְחַיִּים בַּהֶרֶג / יְקַפֵּד כָּאֹרֵג / וּבָהֶם יִשְׂתָּרֵג / כְּהִשְׂתָּרֵג שִׁרְיוֹן
וּמֵהֶם לֹא־יִשְׂגֶּה / לְמַלֵּא בָם כָּל־גֵּיא / וְשִׁיתוֹ שַׁח לַגֵּא /וְהַבּוּז לִגְאֵיוֹן
וְיֹאכַל כֶּחָסִיל / בְּנֵי־עַיִשׁ וּכְסִיל / וּכָל־בַּעַר וּכְסִיל / לְשִׁנָּיו נִקָּיוֹן
וְהִרְאַנִי חֶלֶד / בְּעוֹדֶנִּי יֶלֶד / אֲשֶׁר תֵּבֵל תֵּלֵד / בְּטֶרֶם הֵרָיוֹן
וְלֹא מָעַד מָעוֹד / אֲשֻׁרִי בָהּ מֵעוֹד / כְּמוֹ־הוֹד הָיָה עוֹד / לְרֵעִי נִסָּיוֹן
בְּעֵת בָּא בִגְבוּרָה / מְסָעֵף כָּל־פֻּארָה / וְלָקַח הַצּוּרָה / וְעָזַב הַדִּמְיוֹן
וְעֵינוֹ זָב בִּכְיָהּ / וְנַפְשׁוֹ דַּק עָבְיָהּ / וְעָלְתָה־לָּהּ אֶל־יָהּ / לְגֵיא הַחִזָּיוֹן
וְנִשְׁאַרְתִּי חֵרֵשׁ / כְּעֵץ מֵאֵין שֹׁרֶשׁ / וְנִכְרַת הַחֹרֶש / אֲשֶׁר הָיָה חֶבְיוֹן
וְאַנְחָתִי רַבָּה / בְּמוֹט מוֹט הַקֻּבָּה / וְעַל־אָרוֹן נִשְׁבָּה / וְיֵקַר הַפִּדְיוֹן
לְבָבִי הַנִּמְזָח / בְּיָגוֹן לֹא יִזָּח / עֲזֹב שִׁירֵי מִרְזָח / וְהָמֵר שִׁגָּיוֹן
וְכַף אֶל־כַּף הָנִיף / וְיָד עוֹד אַל־תָּנִיף / וְהוֹרֵד הַצָּנִיף / וְהָסֵר הַגִּלְיוֹן
קְרַע וּפְרֹם כָּל־מָד / לְמִקְדָּשׁ כִּי־נִשְׁמָד / וְהָיָה כָל־מַחְמָד / לְעֵינֵינוּ כִּלְיוֹן
וְקוֹנֵן עַל־מַקַּל / פְּאֵר בַּפָּז נִשְׁקַל / וְהַחֶלֶד נָקַל / בְּעֵינָיו מִדִּפְיוֹן
תְּהִי שָׁלוֹם נַפְשׁוֹ / בְּסוּר אֶל־מִקְדָּשׁוֹ / וְיַזְרִיחַ שִׁמְשׁוֹ / כְּדִבְרֵי הִגָּיוֹן
תְּמוֹל הִיא שֹׁכֶבֶת / בְּחִיל וּבְמַעְצֶבֶת / וְהַיּוֹם יֹשֶׁבֶת / בְּצֵל סֵתֶר עֶלְיוֹן.