לוגו
[זְמָמַי הָהּ]
פרק:
מיקום ביצירה:
0%
X
F
U

[לאחד מגדולי הדור]


זְמָמַי הָהּ בְּהַר־כֶּסֶל נְבֻכִים / וְעֵינַי יָֽרְטוּ נֶגְדָּם דְּרָכִים

וּמַה־יִּתְרוֹן בְּאוֹר־שֶׁמֶש בְּעֵינַי / וְלִבִּי יַהֲלֹךְ נֶגְדּוֹ חֲשֵׁכִים

וְאֶדְרֹךְ עֹז בְּנֵי־יָמִים בְּנַפְשִׁי / וּפָנַי בַּחֲמַת יָמִים דְּרֻכִים

וְנִפְתָּה כַּאֲרוּס תֵּבֵל לְבָבִי / וְשָׁדֶיהָ בְּיַד־זָרִים מְעוּכִים

וְרַב־לִי עוֹד רְדֹף הַבְלֵי זְמַנִּים / וְהַלֵּךְ אַחֲרֵי לִבּוֹת הֲפוּכִים

וְהִתְבּוֹסֵס בְּדַם־נֹעַר וּמֵאָז / דְּמֵי־נֹעַר בְּיַד־יָמִים שְׁפוּכִים

נְאֻם צָמֵא לְמֵי חָכְמָה וְהֹמֶה / וְיָמָיו בַּעֲבוֹת עָמָל מְשׁוּכִים

רְדוּף יָגוֹן שְׂבַע קָלוֹן וּמִדַּם / לְבָבוֹ יִסְּכוּ עֵינָיו נְסָכִים

הֲדָפוּהוּ תְלָאוֹת מִנְּעֻרָיו / וְחִצֵּיהֶן בְּצַלְעֹתָיו מְעוּכִים

וְרַעְיוֹנָיו יְעִירוּהוּ וּבִנְאוֹת / מְצוּקִים יֵֽלְכוּ הָלֹךְ וּבֹכִים

וְיִיגַע לַעֲצֹר בָּהֶם וְיַמֵּי / מְזִמָּתָם בְּדַלְתֵי־אַף מְסִיכִים

וְיַעְפִּיל לַעֲלוֹת אֶל־הַר תְּבוּנָה / וְרַגְלָיו מִנְּטוֹת אֵלָיו חֲשׂוּכִים

וּמִי יוֹבִיל לְמִבְצָר יֽוֹרְדֵי־בוֹר / וְיָבִיא בֵּית עֲשִׁירֵי־בִין הֲלָכִים

וּמִילָדִים כְּגִילָם הֵם יְרֵאִים / וְאֵיךְ יִתְיַצְּבוּ לִפְנֵי מְלָכִים

וּבִנְטוֹת אָהֳלֵי־בִין עַל־יְמִינָם / לְשִׂטְנָם נֹֽגְשֵׂי סִכְלוּת עֲרֻכִים

וּמֵהַטּוֹת יְרִיעוֹתָם חֲשׂוּכוֹת / וְהֵמָּה מֵֽיתְרֵיהֶם מַאֲרִיכִים

וְיַחַד יִקְרְאוּ כֻלָּם בְּשֵׁם אֵל / וּפִסְלֵיהֶם בְּבֵית־כֶּסֶל נְסוּכִים

וְאֶדַּדֵּם לְאַט עַד־בֵּית אֱלֹהִים / וְאוֹרֵם לַהֲלֹךְ בִּמְרוֹם הֲלִיכִים

הֲלִיכִים נוֹסְדוּ עַל־קַו אֱמוּנָה / בְּחֻקֵּי אֵל נְתִיבֵיהֶם סְמוּכִים

וְיֶהְמוּן לַהֲגוֹת בָּהֶם וְלִנְוֵה / תְעוּדָה מִקְּצוֹתָם נֶהֱלָכִים

לְאוֹר עוֹלָם אֲשֶׁר הֵאִיר מְכוֹנָה / וּבִימִינוֹ אֱמֻנֶיהָ תְמוּכִים

וְעָלָה מַעֲלוֹת חָכְמָה וְגָבַהּ / וְלִקְרַאת לֹחֲמָיו יָרִיק חֲנִיכִים

לְפָנָיו יִכְרְעוּ אַנְשֵׁי תְבוּנָה / וְתַחְתָּיו כָּל־מְתֵי חָכְמָה הֲדוּכִים

וְהֻקַם עָל לְהוֹרֹת מִשְׁפְּטֵי־אֵל / וְהִצִּיב קַו אֱמֶת לִפְנֵי חֲשֻׁכִּים

עֲטֶרֶת כָּל־מְתֵי חָכְמָה וְנֵזֶר / מְתֵי מִשְׂרָה וְחֶמְדַּת הַנְּסִיכִים

אֲדוֹן נַפְשִׁי רְאֵה כִּי יִחֲלוּ־לָךְ / וְהִנָּם נֹֽשְׂאִים נַפְשָׁם וְחוֹכִים

לְפָנֶיךָ לְלַקֵּט בֵּין עֳמָרִים / לְבַל־יִהְיוּ בְּסִכְלוּתָם סְבֻכִים

וּבֵין הָעֹֽמְדִים לִדְרֹשׁ תְּבוּנָה / יְשַׁו לָהֶם לְפָנָיו מַהֲלָכִים

בְּנָשֹׁךְ נַחֲשֵׁי סִכְלוּת תְּשַׁו נֵס / תְּבוּנָתְךָ לְהַחְיוֹת הַנְּשׁוּכִים

וְיוֹם יוֹם תַּעֲרֹךְ נֵרוֹת תְּבוּנָם / וְאַל־יִהְיוּ כְּאֵשׁ קוֹצִים דְּעוּכִים

וְיֵאוֹרו פְנֵיהֶם בַּהֲדָרְךָ / וּמִבִּרְכָֽתְךָ יִהְיוּ בְרוּכִים.