ולה פי אלאפתכֹאר [ולו בהתפארו]
נְטֹשׁ לוּ וַעֲזֹב אוּלַי / וְהַטֵּה אָזְנְךָ אֵלָי
וְאַל־תֵּט אַחֲרֵי תִקְוָה / וְדַע כִּי־הַזְּמַן כִּילָי
תְּרִיבֵנִי אֲדָמָה כִּי / תְקַנֵּא בִי וּבִמְשָׁלָי
וְתֹרֵנִי וְתַרְאֵנִי / אֲשֶׁר רָאוּ מְהוֹלָלָי
וְשָׂחַקְתִּי לְיַלְדֵי־יוֹם / וְעַתָּה שָׂחֲקוּ עָלָי
וְאֵיךְ אִירָא בְּנוֹת יָמִים / וְהַיָּמִים בְּנוֹת מִלָּי
וְאָמְנָם כִּי אֲנִי נֶפֶשׁ / וְהָאָדָם כְּמַעְלָלָי
וְאָמְנָם כִּי אֲנִי גַלְגַּל / וְהַכֹּוכָב כְּמַזָּלָי
וְהָאָרֶץ כְּמֶרְכַּבְתִּי / וְאֹתָהּ מָלְאוּ שׁוּלָי
וְלֹא־יֵדַע לְבָבִי רָע / וְלֹא־יָגוּר בְּאֹהָלָי
וְלֹא־אֶשֹּׁם וְאִם אֶשֹּׁם / לְבִין בִּכְיִי וְתוֹלָלָי
וְלֹא־אָגִיל וְאִם־אָגִיל / קְנוֹת רֵעַ בְּרֹאשׁ גִּילָי
וּבִלְבָבִי מְדוּרַת אֵשׁ / וּבִכְבֵדִי וּבִכְסָלָי
עֲדֵי אֶתֵּן לְמֵרֵעִי / וְהָאֵל עֵד אֱמֶת עָלָי
נְדִיבָתִי וְלֹא רָעָה / בְזֹאת עֵינִי וְלֹא כֵלָי
וְשַׁתִּיהָ לְעֻמָּתִי / כְּכַף רַגְלַי וּמִנְעָלָי
וְאֶתֵּן אֹֽיְבִי מִרְמַס / פְּעָמַי וַעֲפַר רַגְלָי
וּמַטָּרָה לְחִצֵּי־פִי / וּמַאְכֹלֶת לְגֶחָלָי.