[ו]לה רצֹי אללّה ענה [ולו ירצהו האל]

וְאָהַבְתִּי וְשִׂבְרִי שֶׁבְּלִבִּי / וְעֹצֶם אַהֲבָתִי לִי יְשֻׁלָּם

וְהִנֶּךָּ הֲקִלּוֹתָ אֲהָבַי / וְאֵלַי לֹא־הֱשִׁיבוֹתָ גְמוּלָם

וְשַׁרְתַּנִי בְּעֵין קָלוֹן כְּשׁוּרְךָ / נְמְבְזֶה וַחֲדַל אִישִׁים וְנִפְלָם

אֱמֶת כִּי עֵינְךָ טַח מֵרְאֹתִי / וְאוֹרִי מִמְּךָ נִסְתָּר וְנֶעְלָם

וְאִישׁ עִוֵּר שְׁתֻם־עַיִן הֲיִרְאֶה / מְאוֹר שֶׁמֶשׁ וְיָרֵחַ בְּהִלָּם

הֲלֹא אוֹרִי פְּנֵי־תֵבֵל יְכַסֶּה / וְיַגִּיעַ עֲדֵי שִׁנְעָר וְעֵילָם

וְלִי לֵבָב כְּחוֹל יִכְבַּד בְּיוֹם־בּוּז / וְיֶהְמֶה כַּהֲמוֹת יַמִּים וְגַלָּם

וְלוּ יַקְלוּן כְּבוֹדִי הַמְּאוֹרִים / אֲשֶׁר בִּמְעוֹן שְׁמֵי מָרוֹם זְבֻלָם

גְּעַלְתִּימוֹ וְלָעַד לֹא זְכַרְתִּים / וּפָנַי לֹא הֲסִבֹּתִי לְמוּלָם

אֲנִי אֶרֶץ לְמֹדָעַי אֱמוּנֵי / שְׁלֻמַי וַעֲפַר רַגְלַי לְרַגְלָם

וּמִדְבָּרִי בְּלִבּוֹתָם כְּמַלְקוֹשׁ / וְכִשְׂעִירִים עֲלֵי־דֶשֶׁא בְנָזְלָם

אֲבָל שַׁחַק אֲנִי עַל־רֹאשׁ מְשַׂנְאַי / וְאַמְטִיר אֵשׁ מְלַהֶטֶת יְבוּלָם

וְהֶחָפֵץ לְהַשִּׂיג מַעֲלָתִי / כְּחָפֵץ לַעֲלוֹת שַׁחַק בְּסֻלָּם

אֱמֶת מִנְעָל לְרַגְלִי עָשׁ וְכִימָה / וְאָמְנָם כִּי שְׂרוֹךְ נַעְלִי כְּסִילָם

וְעַתָּה הִֽנְנִי אַתִּיר אֲגֻדּוֹת / אֲהָבֶיךָ וְלֹא אַחְזִיק בְּחֶבְלָם

וְאֶמְחֶה אֶת־שְׁמָךְ מֵעַל לְשׁוֹנִי / וְלֹא־אָשׁוּב לְהַזְכִּירְךָ לְעוֹלָם.