וקאל ימדח אלנגיד רחמה אללّה תעאלי [ואמר מהלל את הנגיד, ירחמהו האל יתעלה]

קוּם הַזְּמָן וּלְבַשׁ עֲדָנֶיךָ / וּקְשֹׁר שְׁבִיסֵי שַׂהֲרֹנֶיךָ

עַד־אָן תְּנַצֵּל עֶדְיְךָ עַד־אָן / תִּפְשַׁט לְפָנֵינוּ סְדִינֶיךָ

אִם־אֵין לְךָ נֵזֶר לְהִתְנוֹסֵס / כִּי חִלְּלוּ נִזְרֵי צְפוּנֶיךָ

מֵעִם שְׁמוּאֵל קַח רְבִידֵי פָז / יִהְיוּ־לְךָ עַל־צַוְּרֹנֶיךָ

יָצִיץ בְּךָ שִׁירוֹ כְּמוֹ אֵטוּן / גִּיל וַעֲלֹז וּמְשֹׁךְ אֲטוּנֶיךָ

דָּרַךְ בְּךָ כוֹכָב צְלַח וּרְכַב / כִּי־בָא אֲשֶׁר יָאִיר אֱשׁוּנֶיךָ

גָּבַהּ בְּרוֹשׁ תִּדְהָר בְּבֵית יִצְהָר / עַל־נַעֲצוּצֵי קִמְּשֹׁנֶיךָ

צָמַח לְךָ חֹרֶשׁ מְאֹד מֵצַל / פַּנֵּה לְפָנָיו קִֽיקְיוֹנֶיךָ

נִקְרָא לְךָ הַיּוֹם יְאוֹר אֵיתָן / רַוֵּה בְמֵימָיו צִמְּאוֹנֶךָ

עוּרָה לְבָבִי מַה־לְּךָ נִרְדָּם / עוּרָה וְהָקֵץ רַעֲיוֹנֶיךָ

כַּמָּה גְעַרְתִּיךָ לְבַל־תּוֹסִיף / דַּעַת לְבַל־יִרְבּוּ יְגוֹנֶיךָ

הָסֵר תְּלוּנָּתְךָ וְאַל־תִּזְכֹּר / הַיּוֹם לְפָנַי עִצְּבוֹנֶיךָ

הִכּוֹן לְךָ כִּי יֵשׁ־לְךָ הַיּוֹם / רִיב עִם־בְּנֵי לֵוִי צְפוּנֶיךָ

הַקְרֵב לְעֻמָּתָם שְׂעִיר חַטָּאת / אוּלַי יְכֻפַּר־בּוֹ עֲוֹנֶךָ

אָנָּא כְרוּב מִמְשַׁח לְאַט עָלַי / עַד־אֶעֱרֹךְ מִשְׁפָּט לְפָנֶיךָ

מַה־סּוֹד מְשׁוּגָתִי וּמַה־פִּשְׁעִי / כִּי תַעֲבִיר עָלַי חֲרוֹנֶיךָ

תִּכְתָּב־לְךָ סֵפֶר כְּאִישׁ מָדוֹן / גַּם־תַּאֲרִיךְ עָלַי לְשׁוֹנֶךָ

תַּרְעֵם בְּקוֹל גָּדוֹל אֲשֶׁר לֹא־כֵן / לִהְיוֹת סְאוֹן רַעַשׁ סְאוֹנֶךָ

אַל־תַּחֲשֹׁב כִּי־צָלֲלוּ אָזְנַי / יוֹם הַעֲלוֹת בָּם שַׁאֲנַנֶּךָ

לוּ רָֽצְתָה נַפְשִׁי לְהִתְבָּאֵשׁ / אָז שָׁחֲקוּ מֵימַי אֲבָנֶיךָ

הִנֵּֽה בְּחַר מִשְׁפָּט וְדַע מַה־טּוֹב / דּוּן כִּי־אֲנִי חָפֵץ בְּדִינֶךָ

עַל־מַה־תְּרִיבֵנִי פְּלִיל צֶדֶק / כִּי־תַאֲרִיךְ בִּי קִלְּשׁוֹנֶךָ

כִּמְעַט חֲשַׁבְתִּיךָ לְמִגְדַּל־עֹז / עַד־נָֽפְלוּ עָלַי אֲבָנֶיךָ

כִּמְעַט קְרָאתִיךָ זְמֹרַת זָר / עַד נֶהְפְּכוּ־לִי נַעֲמָנֶיךָ

תִּצְמָא לְךָ נַפְשִׁי וְתַשְׁקֵנִי / תַּחַת צְמָאִי רֹאשׁ פְּתָנֶיךָ

אֶזְרַע לְפִי־חֶסֶד וְתָשִׂים אֶת־ / רֵאשִׁית תְּבוּאָתִי בְּגָרְנֶךָ

מַה־זֶּה גְּבִיר מַה־זֶּה וְעַל־מַה־זֶּה / תִּצְפֹּן כְּמוֹ־אֵלֶּה לְבָנֶיךָ

תָּרוּץ בְּלִי עָוֹן וְתִכּוֹנֵן / לִקְרַאת שְׁלֻמֶיךָ אֱמוּנֶיךָ

תִּגְאֶה וְכַשַּׁחַל תְּצוּדֵנִי / עַד כִּי־תְכַלֶּה־בִּי שְׁנוּנֶיךָ

אִם־הָאֱלֹהִים הוּא הֱסִיתְךָ בִי / יָרַח קְטֹרֶת עַד־רְצוֹנֶךָ

אוֹ אִם־בְּנֵי אָדָם אֲרוּרִים הֵם / כִּי־גֵֽרְשׁוּנִי מִלְּפָנֶיךָ

יַכְרֵת אֱלֹהִים דֹּֽבְרֵי כָזָב / הַקֹּֽרְצִים בֵּינִי וּבֵינֶךָ

כִּי פָֽרְשׂוּ רֶשֶׁת לְיַד־מַעְגָּל / וַיְבַעֲרוּ עֲלֵי עֲשָׁנֶיךָ

זָדוּ כְּמוֹ צִיבָא בְּבֶן־שָׁאוּל / וַיְדַבְּרוּ שֶׁקֶר בְּאָזְנֶיךָ

מִי זֶה אֲשֶׁר יָרִים בְּךָ יָדוֹ / אֵי־זֶה זְבוּב יַבְאִישׁ שְׁמָנֶיךָ

מֵרִים בְּךָ יָדוֹ כְּמֵרִים יָד / בִּשְׁנֵי בְנֵי עַמְרָם קְצִינֶיךָ

הַשִּׁיר הֲלֹא לָכֶם בְּנֵי לֵוִי / וּלְךָ לְבַד מִתַּחְכְּמֹנֶיךָ

נָפַל לְךָ חֶבֶל בְּסוֹד הֵימָן / וּבְסוֹד בְּנֵי אָסָף מְבִינֶיךָ

אִם־עָֽמְדוּ שָׁרִים בְּמִשְׁמַרְתָּם / הָיוּ נְגִידֵיהֶם סְגָנֶיךָ

יִשְׂכַּל אֲבִי נָבָל אֲשֶׁר יַחְשֹׁב / לַעְקוֹר כְּצִיץ נֹבֵל אֳרָנֶיךָ

אֶשְׁלָף־לְךָ חַרְבִּי וְאֶגְעַר בּוֹ / סוּר פֶּן־תְּגַלֶּה יַד־קְלוֹנֶךָ

תִּפַּח בְּאֵשׁ פֶּחָם וְגַם־תִּזְרֹק / בִּמְקוֹם חֲרֵרִים זֵֽרְעֹנֶיךָ

תִּיגַע וְלֹא־תוּכַל עֲלוֹת אֵלָיו / עַד־תֶּאֱסֹף רוּחַ בְּחָפְנֶיךָ

הִנֵּה לְךָ עָלָיו שְׁנֵי עֵדִים / גַּם־עוֹד שְׁלשָׁה נֶאֱמָנֶיךָ

הַתֹּם וְהַיּשֶׁר וְהַבִּינָה / זֶה מִלְּבַד שֵׁבֶט אֱמוּנֶיךָ

קוּם וַעֲטֵה הַשָּׂר מְעִיל כָּבוֹד / הִנֵּה אֲמָרַי פַּעֲמֹנֶיךָ

הַעַל תְּהִלָּתִי אֲשֶׁר שָׂמָה / רָבִיד מְקֻשָּׁר עַל־גְּרוֹנֶךָ

אַחַת נְשָׂאתִיהָ כְּמוֹ־תֹרֶן / לָשֵׂאת בְּרֹאשׁ כָּל־הַר תְּרָנֶיךָ

קוּם וַעֲדֵה גָאוֹן וְהִנָּשֵׂא / כִּי־עִמְּךָ הִנֵּה בְּמֹאזְנֶיךָ

חֶבְרוֹן וְעֻזִּיאֵל וּמִישָׁאֵל / וּשְׁאָר בְּנֵי לֵוִי זְקֵנֶיךָ

הַנֹּֽשְׂאִים אָרוֹן עֲלֵי כָתֵף / הַשֹּֽׁמְרִים מִקְדַּשׁ אֲדֹנֶיךָ

תָּרוּם בְּךָ קֶרֶן סְפָרַד עוֹד / מִיּוֹם הֱיוֹתְךָ עַד־זְקֻנֶיךָ

תַּרְחִיב בְּךָ פֶה עַל־בְּנֵי שִׁנְעָר / הַשֹּׁאֲבִים מִמַּעֲיָנֶיךָ

מַה־תִּגְבְּהִי בָּבֶל וּמַה־תִּגְאִי / שִׁנְעָר בְּמָעוּזֵּי גְאוֹנֶיךָ

דַּע כִּי־בְאַרְצֵנוּ חֲבַצֶּלֶת / לֹא נִמְצְאָה בִּנְאוֹת שְרוֹנֶךָ

שָׂרֵי פְלִילִיָּה לְךָ עֵד כִּי / פֶה פָעֲרוּ נֶגֶד עֲדָנֶיךָ

אַל־תַּחְשְׁבֵנִי כִּי־בְרֹב תִּקְוָה / אַפִּיל תְּחִנָּתִי לְפָנֶיךָ

לֹא מֵאֲשֶׁר יִירָאֲךָ לִבִּי / לוּ כֽוֹכְבֵי שַׁחַק הֲמוֹנֶיךָ

הָאֵל יְהִי עִמְּךָ וְאַל־יַעְמֹד / שָׂטָן לְעוֹלָם עַל־יְמִינֶךָ

וּמְצָא בְעֵינָיו חֵן וְשֵׂכֶל טוֹב / וּרְאֵה בְנֵי בָנִים לְבָנֶיךָ.