ומן אשרף כלאמה מקטועה פי אלרייס אבי אסחאק אבן אבי חסאן [מדבריו המשובחים ביותר שיר על הראש אבו אסחאק אבן אבי חסאן]
וְאַתְּ יוֹנָה חֲבַצֶּלֶת שְׁרוֹנִים / וְשׁוּלַיִךְ מְלֵאִים פַּעֲמוֹנִים
וְרִמֹּנֵי מְעִילַיִךְ זְהוּבוֹת / אֲשֶׁר יִדְמוּ מְעִילֵי אַהֲרֹנִים
וְעֵת צֵאתֵךְ לְעֻמָּתִי אֲדַמֶּה / הֲלִיכָתֵךְ כְּשֶׁמֶשׁ בַּמְּעוֹנִים
שְׁבִי־פֹה יַעֲלַת הַחֵן לְנֶגְדִּי / וְהָעִירִי לְדוֹדֵךְ הַשְּׂשׂוֹנִים
קְחִי הַתֹּף וְהַנֶּבֶל וְשִׁירִי / בְנִגּוּנֵךְ עֲלֵי עָשׂוֹר וּמִנִּים
וְקוּמִי הַלֲלִי דוֹדֵךְ בְּחִירֵךְ / יְקוּתִיאֵל נְשִׂיא שָׂרִים וְרֹזְנִים
מְאוֹר עוֹלָם יְסוֹד אַדְנֵי מְכוֹנָיו / וְעַמּוּדֵי מְרוֹמִים בּוֹ נְכֹנִים
אֲשֶׁר כָּל־רֹֽזְנִים אֵלָיו מְיַחְלִים / וְלִדְבָרוֹ מְקַוִּים כָּל־סְגָנִים
אֲשֶׁר יִדְרשׁ עֲדֵי יִיגַע בְּחֶפְצָם / כְּאָב יִדְרשׁ מְצֹא טֶרֶף לְבָנִים
אֲשֶׁר פִּיהוּ לְכָל־אָדָם בְּשׂוֹרָה / וְנִדְבָתוֹ יְקָרָה מִפְּנִינִים
בְּרוּחוֹ חֵן וּבִלְבָבוֹ נְדָבָה / וְשִׂפְתוֹתָיו בְּכָל־עֵת נֶאֱמָנִים
גְּבִיר דּוֹמֶה כְּשַׁחַק עַל־אֲדָמָה / וְגַם־כַּפָּיו לְהַמְטִיר כַּעֲנָנִים
בְּהֵעָצְרָם יְמוּתוּן הַנְּפָשׁוֹת / וְיִמָּלְאוּן בְּהַמְטִירָם רְנָנִים
יְמַלֵּא אֵל מְהֵרָה מִשְׁאֲלוֹתָיו / וְיִהְיוּ מִשְׁאֲלוֹתַי לוֹ נְתֻנִים.