וקאל איצ֗א
זְרוֹעִי עַל בְּנוֹת יָמִים חֲשׂוּפָה / וְחֶרֶב הַזְּמַן עָלַי שְׁלוּפָה
וְנִשְׁטַפְתִּי בְּשִׁבֹּלֶת יְגוֹנִים / וְהָיִיתִי כְּשִׁבֹּלֶת שְׁדוּפָה
וְאֶדְאַג מִיְּגֹנוֹתַי וְאֶשֹּׁם / וְאֶשְׁאַף כִּי־שְׁאָפַנִי שְׁאִיפָה
וְיָמִים אַחֲרֵי יָמִים יְרוּצוּן / וְלֵילוֹת אַחֲרֵי לֵילוֹת חֲלִיפָה
וְאֶשְׁתָּאֶה בְעָבְרָם וַאֲיַחֵל / וְעוֹד לֹא־נִמְלְאָה מֵהֶם תְּקוּפָה
וּמָה אָגוּר זְמַנִּי עוֹד הֲיָמוּת / אֱנוֹשׁ מֵת אוֹ הֲיִנָּגֵף נְגִיפָה
לְפֵרוּד הַגְּבִיר אַגִּיר וְאֶעְרֹף / דְּמָעוֹת כַּעֲרֹף יָדָיו עֲרִיפָה
אֲשֶׁר פָּרַח עֲלֵי־אֶרֶץ שְׁמָמָה / כְּצִיץ פָּרַח עֲלֵי־גֶפֶן קְטוּפָה
אֲשֶׁר הֵרִים יְמִין חֶסֶד בְּחַסְדּוֹ / וְגַם־הֵנִיף יְדֵי צֶדֶק תְּנוּפָה
עֲדֵי כִי־יָעֲטוּ יָמִים כְּבוֹדוֹ / וְצָנַף הַזְּמַן הוֹדוֹ צְנֵפָה
נְדִיב רוּחַ וְכָרוּחַ יְרַחֵף / וְכַבָּרָק אֲשֶׁר אֵין־לוֹ שְׁזִיפָה
וְכַשֶּׁמֶשׁ בְּאַפְסֵי הַקְּצָוֹת / אֲשֶׁר תָּאִיר לְכָל־עַיִן מְעִיפָה
אֲשֶׁר כַּפּוֹ תְּחַבֵּר הַנְּדָבוֹת / בְּמַתַּת אַחֲרֵי מַתַּת רְצוּפָה
וְשָׁת חַיִל נְתָן־חַיִל וְרָאָה / יְקָר נַפְשׁוֹ הֱיוֹת נַפְשׁוֹ כְפוּפָה
וְאִם־יָדוֹ תְּפַזֵּר הַחֲסָדִים / הֲלֹא נַפְשׁוֹ תְּאַסֵּף חֵן אֲסֵפָה
בְּפִתְחוֹ אֹֽצְרוֹת מַתָּן יְמַהֵר / כְּמָטָר אַחֲרֵי סַעַר וְסוּפָה
וְאִם־יִכְאַב לְנִקְשֵׁה יוֹם כְּאִלּוּ / נְתֹן חֵילוֹ לְמַכְאֹבוֹ תְרוּפָה
וְעֵת יָשִׂישׂ לְבָבוֹ סִיס יְעוֹפֵף / כְּמוֹ עֵת יֶאֱנַף תֵּבֵל אֲנֵפָה
וְשָׁלַח מַעְיְנֵי יֶשַׁע וְאוּלָם / לְאַט אַל־תִּשְׁטְפֵנִי בָם שְׁטִיפָה
הֲתִדְרֹשׁ לַעֲלוֹת עוֹד בַּתְּהִלָּה / וּמִמָּרוֹם לְךָ פֹנָה וְצֹפָה
וְעָלִיתָ עֲלֵי תֵבֵל כְּאִלּוּ / נְתָנָהּ אֵל לְךָ שִׁפְחָה חֲרוּפָה.