וקאל איצ֗א
מְלִיצָתִי בְּדַאְגָתִי הֲדוּפָה / וְשִׂמְחָתִי בְּאַנְחָתִי דְחוּפָה
וְאִם־אֶרְאֶה שְׂחוֹק יִבְכֶּה לְבָבִי / לְחַיָּתִי שְׁהִיא מִנִּי קְטוּפָה
יְדִידִי הַלְּבֶן־עֶשֶׂר וְשִׁשָּׁה / סְפֹד וּבְכוֹת עֲלֵי יוֹם הָאֲסִיפָה
אֲשֶׁר הָיָה לְהִמָּשֵׁךְ בְּיַלְדוּת / בְּלֶחִי כַּחֲבַצֶּלֶת שְׁזוּפָה
שְׁפָטַנִי לְבָבִי מִנְּעוּרַי / וְעַל־כֵּן הָֽיְתָה נַפְשִׁי כְפוּפָה
וְשָׂם הַבִּין וְהַמּוּסָר מְנָתוֹ / וְנַפְשִׁי הַחֲרוּצָה שָׂם קְצוּפָה
וּמַה־בֶּצַע בְּהִתְקַצֵּף אֲבָל דֹּם / וְקַוֵּה כִּי לְכָל־מַכָּה תְּרוּפָה
וּמַה־יּוֹעִיל בְּכוֹת עַל־הַמְּצוֹקִים / וּמָה־יּוֹעִיל לְדִמְעָה הָעֲרוּפָה
וּמָה אוֹחִיל וְעַד־כַּמָּה אֲיַחֵל / וְהַיּוֹם עוֹד וְלֹא מָלְאָה תְקוּפָה
וְטֶרֶם בּוֹא צְרִי גִלְעָד וְיָמוּת / אֱנוֹשׁ נִכְאָב אֲשֶׁר נַפְשׁוֹ נְגוּפָה.