ולה איצ͘א קצידה למן אסתמרّ ודאדה [ולו גם כן שירה ששלח לאחד שהוא (המשורר) התמיד באהבתו ]

לְאַט עָלַי פְּרִידָתְךָ כְאֵבִי / וְאַל־תֹּאמַר לְצוּלַת יָם חֳרָבִי

וְאִם־אַגִּיד לְךָ דִּבְרֵי מְרִיבוֹת / שְׁפֹט כִּי עִמְּךָ דִּינִי וְרִיבִי

תְּנָה עֵד אִם־הֲרֵעֹתִי תְחִלָּה / וְתָרֹם יָֽדְךָ עַל־יַד נְדִיבִי

יְדִידִי אִם־עֲקַבְתִּיךָ לְעוֹלָם / בְּפָנִים אוֹ בְלֵב יָגֻד עֲקֵבִי

הֲתַחַת אַהֲבָתִי תִשְׂטְמֵנִי / וּבָחְרִי־אַף תְּפַלֵּס אֶת־נְתִיבִי

וְקִנֵּא לִבְּךָ תַּכְלִית קְנָאוֹת / וּמָשַׁכְתָּ זְנַב שִׂנְאָה בְּגַבִּי

וְלוּ הוּשַׂם תְּבוּנָה בַבְּהֵמוֹת / אֲזַי אָמַר חֲמוֹר כִּרְתוּ זְנָבִי

וְתָשִׂים לִבְּךָ אוֹצַר קְנָאוֹת / וְלֹא שָׁמַר לְךָ אַהַב בְּקִרְבִּי

וְתַעְבֹר מִבְּלִי שָׁלוֹם וְתִפְנֶה / וּמַה־בֶּצַע בְּבָרָק יַעֲבָר־בִּי

מְאֹד נִכְאָב לְבָבִי עַל־פְּנוֹתְךָ / וְלָמָּה־זֶּה יְהִי נֶצַח כְּאֵבִי

וְשָׁכַחְתִּי בְּרֹב יָמִים דְּמוּתְךָ / כְּאִלּוּ בַחֲלוֹם רָאךָ לְבָבִי

אֲשֶׁר נִשְׁאַר כְּלֵב חוֹלַת אֲהָבִים / בְּעֵת יִשְׂאוּ גְמַלָּיו הָעֲרָבִי

לְךָ אֶצְמָא וְאֶתְעַלֶּה־בְּךָ לֹא / אֲבָל עַל־זִכְרְךָ קוּמִי וְשִׁכְבִי

וְאֵיךְ אוּכַל לְהִתְאַפֵּק וְהִנֵּה / פְרָת אֵין דֵּי לְכַבּוֹת אֵשׁ שְׁבִיבִי

וְאִם־תִּטְעַם לְךָ מֵרֹאשׁ שְׂפָתַי / הֲלֹא עַל־חִכְּךָ יָזוּב חֲלָבִי

וְנֶאֶמְנוּ לְךָ פִּצְעֵי אֲהוּבְךָ / וְהַמָּשָׁל מְשַׁל חָכָם וְנָבִיא

וְאִם־לֹא אַעֲלֶה נַפְשִׁי לְמַה זֶּה / הֲבִינוֹתִי אֲנִי שַׁחְרִי וְעַרְבִּי

וְאִם־אָרוּץ יְדִידִי בַּקְּרָבוֹת / דְּרֹךְ תַּחַת אֲבַק סוּסִי וְרִכְבִּי

וְאִם תּוּכַל עֲמֹד בַּמַּעֳרָכָה / וְאַל־יַבְרִיחֲךָ קַשְׁתִּי וְחַרְבִּי

וְאִם־תִּקְצַר לְהָכִיל אֶת־דְּבָרַי / וְתֹאמַר כִּי־יְשַׁדֶּדְךָ זְאֵבִי

אֲנִי מִנּֽוּדְךָ אֶחְרַץ לְשׁוֹנִי / וְקָחֶנּוּ לְשָׁלָל עוֹד וְלִשְׁבִי

וְאִם־אָרִיב לְךָ מֵרֹב יְדִידֹת / הֲלֹא עַל־בִּלְתְּךָ אֶשְׁאַג כְּלָבִיא

וְדַע כִּי אַפְּךָ אָחִי אֲכַפֵּר / וְאָשׁוּב אַחֲרֵי מִרְיִי וְשׁוּבִי

וְאִם־תִּסֹּב עֲלֵי צִיר הַכְּסִילוּת / וְלֹא־תִשָּׂא פְּנֵי מַשְׂאַת כְּתָבִי

אֲנִי אֶסֹּב לְהָפֵר אַהֲבָתְךָ / וְאָסִיר מִמְּךָ עֵינַי וְלִבִּי.