סליחה
אֲמָרַי הַקְשֵׁב / וְאַל נָא תָשֵׁב / פָּנַי בְּחַסְדֶךָ,
לְשִׁמְךָ אוֹחִיל / וְלִבִּי יָחִיל / מֵרֹב פְּחָדֶיךָ.
יָהּ, סָמְכֵנִי / גַּם תָּמְכֵנִי / בְּעָמְדִּי לְפָנֶיךָ –
וְאַל תִּשְׁכָּחֵנִי!
עֶזְרָתִי הָיִיתָ, אַל תִּטְּשֵׁנִי / וְאַל תַּעַזְבֵנִי.
בְּנָשְׂאִי עֵינַי / נָפְלוּ פָנַי / מֵרֹב זְדוֹנוֹתַי;
בְּרֹגֶז רַחֵם / תִּזְכּוֹר, וְנַחֵם / לִי מִיגוֹנוֹתַי,
מֵהֶם דְּלֵנִי / וְהַצִּילֵנִי / וּכְבֹשׁ עֲוֹנוֹתַי –
וְאַל תַּדִּיחֵנִי!
רָחֲפוּ עֲצָמַי / מֵרֹב אֲשָׁמַי / וְלִמְאֹד נִכְלַמְתִּי,
וּמֵעַי הָמוּ / לְעֵת בִּי קָמוּ, / דּוּמָם נֶאֱלַמְתִּי,
וְאֵין לִי פֹעַל / לְכַפֵּר מַעַל, / וּמֵרְאוֹת נֶעֱלַמְתִּי
יוֹם תּוֹכִיחֵנִי.
הִנֵּה דְּמָעַי / לְגֹדֶל פְּשָׁעַי / עֵינִי שׁוֹטֶפֶת,
וְנֶפֶשׁ נְמוּכָה / וּבִשְׁמָךְ תְּמוּכָה / בְּשִׂיחָה עוֹטֶפֶת;
סְלַח שִׁגְיוֹנָהּ / בְּחִין הֶגְיוֹנָהּ / לְמוּלָךְ נוֹטֶפֶת –
עֲצָתְךָ תַּנְחֵנִי.
מְחִילָה אֲשַׂבֵּר / וְלָכֵן לְדַבֵּר / הִנֵּה נָא הוֹאַלְתִּי:
תְּמֹךְ לִי פַעַם / אַךְ הַפַּעַם / אוֹתָהּ שָׁאַלְתִּי,
כַּפֵּר פִּשְׁעִי / וְשָׂא אֶת רִשְׁעִי / וַאֲשֶׁר נוֹאַלְתִּי –
וְאַל תִּזְנָחֵנִי!