עוד על נסיעתו מאת אוהביו
אַחַי מְיֻדָּעַי, בְּיוֹם נָסָעוּ / לִבִּי וּבִגְדוֹתַי הֲלֹא קָרָעוּ
רָאוּ דְמָעַי עַל לְחָיַי נוֹזְלִים / יֶחְצוּ כְבֵדִי בִי - וְלֹא יָדָעוּ!
לֹא כִי תְחַלִּי, עַד קְרָאתִים כִּמְעַט - / וַיִּתְנוּ עֹרֶף וְלֹא שָׁמָעוּ
אֶדְרֹשׁ וְאֶמְצָאֵם בְּתוֹךְ לִבִּי, אֲבָל / לֹא אֵדַע אֵי אָהֳלָם תָּקָעוּ
יוֹם עָקְרוּ לֵבָב אֲשֶׁר נִמְשַׁךְ בְּחוּט / הָאַהֲבָה - הָאַהֲבָה נָטָעוּ
יוֹם, רָכְבוּ בוֹ מַרְכְּבוֹת פֵּרוּד, עֲלֵי / סוּסָיו יְרִימוּן שׁוֹט וּבָם נָגָעוּ
לוּ תֶחֱזֵם, יִשְׂתָּרְגוּ עָלַי כְּמוֹ / אַנְשֵׁי נְקִיִּים אַחֲרֵי הָרְשָׁעוּ
אוֹ תֶחֱזוּ רֶדֶת מְטַר קַיִץ עֲלֵי / פִלְחֵי לְחָיֵיהֶם - וְלֹא נִבְצָעוּ!
וּבְעֵת רְאוֹתִי קוֹל בְּכִיתָם אַחֲרַי - / כָּבְדוּ עֲנָנַי, עַד אֲשֶׁר נִבְקָעוּ
כִּמְעַט יְהִי נִסְתָּר כְּבֵדִי מֵאֱנוֹשׁ / לוּלֵי שְׁתֵּי עֵינַי אֲשֶׁר נִדְמָעוּ
אָכֵן, כְּשׁוֹאֵל נִפְלְאוֹתָיו, נִסְתְּרוּ / מֵאוֹהֲבָיו, לוּלֵי אֲשֶׁר נִשְׁמָעוּ
לָמַד לְבָבִי לַהֲלֹךְ תָּמִיד עֲלֵי / הָרֵי מְזִמּוֹתָיו אֲשֶׁר נִרְקָעוּ
אֶזְכֹּר אֲחִי שֶׁמֶשׁ וְסַהַר, אֶזְכְּרָה / כָּל זָרְחוּ עָלַי וְכָל יָפָעוּ
יוֹנַת רְחוֹקִים! שַׁאֲלִי שָׁלוֹם לְאָח / כִּי מַחְשְׁבוֹתַי כָּל יָמַי בּוֹ תָעוּ
כָּלָה לְרֵעִי לֵב, וְנַפְשִׁי נִכְסְפָה / אֵלָיו מְאֹד, עַל כֵּן דְּבָרַי לָעוּ
יוֹם נִשְׁבְּעוּ יָמִים לְהִתְעוֹלֵל דָּמִי - / יָקוּם אֲמָרָם, כִּי בְךָ נִשְׁבָּעוּ
אוֹ גָרְעוּ יָמִים בְּאֹרֶךְ הַנְּדוֹד - / יָסְפוּ אֲהָבַי לָךְ וְלֹא נִגְרָעוּ
כַּשִּׁיר, אֲשֶׁר אִם לֹא יְדָעוֹ לַעֲלוֹת - / בָּתָיו אֱלֵי שַׁחַק אֲזַי נָגָעוּ
שִׁיר - נִמְשְׁלוּ בָתָּיו לְמַשְׂכִּיּוֹת חֲלִי / לוּלֵי אֲשֶׁר בִּכְנַף נְדוֹד נָסָעוּ
לָכֵן חֲקֹר נִיב סִפְרְךָ, פֶּן יִקְרְךָ / מִקְרֵה שְׁנֵי אוֹרִים אֲשֶׁר נִפְגָּעוּ
אָעִיד וְאֶתְמַהּ אִם מְשָׁכָם לִבְּךָ / מִנַּחֲלֵי דַעַת - וְלֹא נִמְנָעוּ!
שָׂרֵי תְבוּנוֹת מִמְּךָ חָלוּ, כְּמוֹ / שָׂרֵי סְפָרַד מִמְּךָ אַךְ זָעוּ
יִיטַב לְךָ, כִּי יִהְיוּ אַחְרֵי תְמוֹל, / לוּ כַעֲבָדִים - הֵן לְךָ נִרְצָעוּ!
שָׂמוּ תְהִלָּתָךְ אֲחוֹת דָּתָם וְעַל / אַפְסֵי אֲדָמָה חַסְדְּךָ זָרָעוּ
סָר זִכְרְךָ הַטּוֹב עֲלֵי תֵבֵל וְנָע / שֵׁם מִפְעֲלוֹתֶיךָ - וְהֵם לֹא נָעוּ
אוֹרוּ בְּנֹעַם שִׂכְלְךָ חָשְׁכֵי תְהוֹם / אַךְ שַׁחֲרֵי לֵילוֹת בְּךָ נִבְקָעוּ
עַל כָּל מְשַׂנְאֶיךָ יְמִינָךְ תַּעֲלֶה / אַף כָּל מְקַנְאֶיךָ לְךָ יִכְרָעוּ
כִּי נִפְלְאוֹת שִׁיר חֻדְּשׁוּ בָךְ אַחֲרֵי / כָלוּ, וְחָיוּ - אַחֲרֵי גָוָעוּ
תָּעוּ לְסַפֵּר מַחְשְׁבוֹתַי תַּאֲוַת / לִבִּי, וּבוֹשׁוּ מֵאֲשֶׁר יָגָעוּ
אֶשְׁאַל בְּנוֹת יָמִים לְבִלְתִּי הַאֲרִיךְ / יוֹם הַנְּדוֹד, אִם שְׁאִלְתִּים - שָׁעוּ?
כַּמָּה יְדִידִים, בַּזְּמַן הִתְפָּרְדוּ, / כֵּן צָעֲקוּ עַל זֹאת - וְלֹא נוֹשָׁעוּ!
אִם נוֹלְדָה תֵבֵל וְיָמִים לִמְּדָה / לַמְרוֹת, וּמוּסַר דַּרְכְּךָ פָרָעוּ -
הָאֵל יְשׁוֹבֵב בַּחֲסָדָיו, אַחֲלַי, / רֵעִים אֲשֶׁר מֵעִיר לְעִיר הֻסָּעוּ!