לוגו
פרוד עלי פרוד
פרק:
מיקום ביצירה:
0%
X
F
U

פֵּרוּד עֲלֵי פֵרוּד וְעַיִן בְּלִי שֵׁנָה / יָגוֹן עֲלֵי יָגוֹן וְלֵבָב בְּלִי רִנָּה

וְנֶפֶשׁ פְּנִינִיָּה, תִּשְׂחַק עֲלֵי תֵבֵל / כְּגִבּוֹר אֲשֶׁר תִּשְׂחַק יָדוֹ עֲלֵי צִנָּה

עֵת גַּעֲרָתִי בָהּ לִשְׁקֹט עֲדֵי שׁוּבְכֶם - / וַתֵּבְךְ לִי כִּבְכוֹת חַנָּה לְאֶלְקָנָה

יוֹם יַעֲלֶה שִׁמְכֶם יָעוּף לְבָבִי בוֹ / וּבְבֵין יְגוֹנַי הוּא כִדְבַשׁ בְּבֵין לַעְנָה

קָצַץ כְּנַף יָגוֹן וְנָפַל עֲלֵי לִבִּי / נַפְשִׁי לְעֻמַּתְכֶם תָּעוּף כְּמוֹ יוֹנָה

דִּרְשׁוּ שְׁנַת עֵינַי מֵעִם בְּנֵי עַיִשׁ / אָז יֹאמְרוּ לָכֶם: לֹא טָעֲמוּ שֵׁנָה

יוֹם הַנְּדוֹד, עָמַד בֵּינִי וּבֵינֵיכֶם, / הָיָה עֲלֵיכֶם לִי הַיּוֹם כְּמוֹ שָׁנָה.

יִפְקֹד, אֲשֶׁר פִּזַּר רֵעִים, לְהַקְהִילָם / וְכַמָּה קְרָאתִיהוּ עַל זֹאת וְלֹא עָנָה

וְיַמְטִיר, כְּדִמְעָתִי, מָטָר בְּאַדְמַתְכֶם / וְיִזְרַח בְּאַדְמָתִי שֶׁמֶשׁ אֲשֶׁר פָּנָה.