אֱלֹהִים אִלַּפְתָּ סְגֻלַּת שְׁבָטֶיךָ / אֵל צַדִּיק וְחֶסֶד מַעֲטֶךָ

צַדִּיק אַתָּה יְיָ וְיָשָׁר מִשְׁפָּטֶיךָ

אֱלֹהִים נִצַּבְתִּי נֶגְדְּךָ עוֹדְדֵנִי / נָאוֹר קוּמָה וְהָגֵן בַּעֲדֵנִי

נִדְבוֹת פִּי רְצֵה נָא יְיָ וּמִשְׁפָּטֶיךָ לַמְּדֵנִי

אֱלֹהִים יִקַּרְתָּ עַם זוּ לְהַפְאִיר עֶרְכּוֹ / יִסַּדְתָּ יוֹם זֶה לְהָאִיר חָשְׁכּוֹ

יַדְרֵךְ עֲנָוִים בַּמִּשְׁפָּט וִילַמֵּד עֲנָוִים דַּרְכּוֹ

אֱלֹהִים שָׁבֵי פְשָׁעִים בְּצִלְּךָ יָלִינוּ / לִשְׁמֹעַ סְלִיחָה אָזְנָם יָכִינוּ

מָרוֹם הַשְׁמִיעֵם הַיּוֹם אִם יִהְיוּ חֲטָאֵיכֶם כַּשָּׁנִים כַּשֶּׁלֶג יַלְבִּינוּ

אֱלֹהִים שׁוֹכֵן בְּאַפַּדְנֵי גְבוֹהַי / שְׁעֵנִי בְּקָרְאִי בְּעַד כְּמֵהַי

שָׁפְטֵנִי כְצִדְקְךָ יְיָ אֱלֹהַי

אֱלֹהִים לְשִׁמְךָ נוֹרָא וְאָיֹם / לְהוּקֶיךָ נִצְּבוּ לְבַקֵּשׁ פִּדְיוֹם

לְמִשְׁפָּטֶיךָ עָמְדוּ הַיּוֹם

אֱלֹהִים מַעַן לְשׁוֹנִי תִרְצֶה / מַגֵּן כַּחְשִׁי וְנַפְשִׁי תִפְצֶה

מִלְּפָנֶיךָ מִשְׁפָּטִי יֵצֵא

אֱלֹהִים הֲכִינוֹתָ לְמִקְלָטִי וּמִפְלָטִי / הַעֲבֵר מַעְבָּטִי וְהָבֵר מַבָּטִי

הָעִירָה וְהָקִיצָה לְמִשְׁפָּטִי

אֱלֹהִים בְּשִׁבְתְּךָ בְּכִסֵּא מְרוֹם עֶרֶץ / בְּהַעֲלוֹתְךָ יְצוּרִים בְּמֹאזְנֵי תֶרֶץ

כִּי בָא לִשְׁפֹּט הָאָרֶץ

אֱלֹהִים נְצֹר חֶסֶד לְאֹם עֲמוּסָה / נָא אַל תַּחְקֹר חַטָּאת כְּמוּסָה

נוֹדַע יְיָ מִשְׁפָּט עָשָׂה

אֱלֹהִים יָעַדְתָּ כֹּפֶר לְחַזֵּק כָּל בֶּדֶק / יִשַּׁרְתָּ מַסְלוּל לְיַשֵּׁר כָּל חֵדֶק

יָשַׁבְתָּ לְכִסֵּא שׁוֹפֵט צֶדֶק

אֱלֹהִים הַיּוֹם יְעוֹדֵד מְעוּטָיו / הַצֵּל יַצִּיל שְׁבָטָיו מִשְּׁפָטָיו

הוּא יְיָ אֱלֹהֵינוּ בְּכָל הָאָרֶץ מִשְׁפָּטָיו

אֱלֹהִים וַעֵד נֶגְדִּי חַסְדֶּךָ / וְגוֹנְנִי הַיּוֹם בְּעָמְדִי נֶגְדֶּךָ

וְאַל תָּבוֹא בְמִשְׁפָּט אֶת עַבְדֶּךָ

אֱלֹהִים דּוֹרֵשׁ לְבָבוֹת וְרַעְיוֹנִים / דְּלֵה הַיּוֹם מֵעָווֹן אֱמוּנִים

דִּין עָנִי מִשְׁפַּט אֶבְיוֹנִים

אֱלֹהִים הֲכִינוֹתָ יוֹם זֶה לְיַשֵּׁר כָּל עָקֹב / הֵן רְשַׁמְתּוֹ לְחֹק נָקוּב

הוּא נִשְׁפָּט לֵאלֹהֵי יַעֲקֹב

אֱלֹהִים גּוֹנְנִי מִתִּגְרַת שְׁפוּטֶיךָ / כַּל עֵינַי וְאַבִּיטָה נִפְלָאוֹת מִקָּשְׁטֶךָ

גָרְסָה נַפְשִׁי לְתַאֲוָה אֶל מִשְׁפָּטֶיךָ

אֱלֹהִים בָּאתִי לְסַלְסֵל חֻקֶּיךָ / בְּקָרְאִי יִפְגַּע שַׁוְעִי חִשְׁקֶךָ

בְּלָמְדִי מִשְׁפְּטֵי צִדְקֶךָ

אֱלֹהִים יָעַד יוֹם זֶה לִשְׁפֹּט מִבְרָאוֹ / יוֹם לְהַרְאוֹת לַכֹּל מִפְלָאוֹ

יֵשֵׁב כּוֹנֵן לַמִּשְׁפָּט כִּסְאוֹ

אֱלֹהִים רַחְשִׁי עֲרֹב וַעֲנֵנִי / רוֹחֵף מִפַּחְדְּךָ הִנֵּנִי

רַחֲמֶיךָ רַבִּים יְיָ כְּמִשְׁפָּטֶיךָ חַיֵּנִי

אֱלֹהִים וַיְיָ יְאַמֵּץ כָּל בֶּדֶק / וְיוֹפִיעַ לִלְקֹט שׁוֹשָׁן מֵחֵדֶק

וְהוּא יִשְׁפֹּט תֵּבֵל בְּצֶדֶק

אֱלֹהִים לִפְצוֹת שְׁאֵרִית פְּלִיטֶיךָ / לְחַלְּצֵם מֵרִשְׁפֵי לְהָטֶיךָ

לְמַעַן תִּצְדַּק בְּדָבְרֶךָ תִּזְכֶּה בְשָׁפְטֶךָ

אֱלֹהִים חֶבְיוֹן לְבָבִי אָעִירָה / חֹסֶן גְּדֻלָּתְךָ אַאֲמִירָה

חֶסֶד וּמִשְׁפָּט אָשִׁירָה

אֱלֹהִים זָכְרֵנִי מִשְׂגַּב דַּךְ נִכְלָם / זַכֵּה לְבָבִי מֵעָווֹן הַנֶּעְלָם

זָכַרְתִּי מִשְׁפָּטֶיךָ מֵעוֹלָם

אֱלֹהִים קְלֹט שִׁבְיְךָ מִקֶּרֶץ / קָמִים לְהוֹדוֹת לְךָ בְּמֶרֶץ

קוּמָה אֱלֹהִים שָׁפְטָה הָאָרֶץ

אֱלֹהִים יְנַתֵּק חַבְלֵי זָדוֹן מְקֻשָּׁרִים / קְהַל מֵישָׁרִים לָצֵאת מְאֻשָּׁרִים

וְהוּא יִשְׁפֹּט תֵּבֵל בְּצֶדֶק יָדִין לְאֻמִּים בְּמֵישָׁרִים.