אֱזֹן רַחְשִׁי וֶאֱסֹף כַּחְשִׁי / אַל תֶּאֱסֹף עִם חַטָּאִים נַפְשִׁי
שָׁאַג לְבָבִי מֵהֲמוֹן פַּחְדֶּךָ / אַל תָּבוֹא בְמִשְׁפָּט אֶת עַבְדֶּךָ הָאֵל הַקָּדוֹשׁ
גְּמֹל כְּחַסְדְּךָ וְלֹא כְמִדַּת אֳרָחִי / כִּי לֹא יִצְדַּק לְפָנֶיךָ כָל חָי
שִׁמְךָ לְאֶחָי מַלְכִּי הַיּוֹם אֲסַפֵּר נֶגְדֶּךָ / וַאֲרַנֵּן לַבֹּקֶר חַסְדֶּךָ הַמֶּלֶךְ הַקָּדוֹשׁ
נָפְלוּ פָנַי כְּעָרְכִי אֲמָרַי / כִּי נָשָׂאתִי חֶרְפַּת נְעוּרָי
שְׁלַח מִמָּרוֹם הוֹשִׁיעֵנִי / כִּי לֹא בָזָה וְלֹא שִׁקַּץ עֱנוּת עָנִי
יוֹם אֶקְרָא בִקְהַל הֲמוֹנָי / כִּי שָׁמַע קוֹל תַּחֲנוּנָי
שְׁעֵנִי וּקְרָא מִשְּׁמֵי גְבוֹהֶיךָ / אַל תִּשְׁתָּע כִּי אֲנִי אֱלֹהֶיךָ
לֹא זָחַלְתִּי וְלֹא חַלְתִּי / כִּי לְךָ יְיָ הוֹחָלְתִּי
מְשֹׁךְ חַסְדְּךָ לִרְגָעִים / אַל תִּמְשְׁכֵנִי עִם רְשָׁעִים
הֵן בְּדַלּוּתִי שְׂשׂוֹנִי יִגְדָּל / כִּי הָיִיתָ מָעֹז לַדָּל
בְּשִׁבְתְּךָ לַדִּין הַרְוִיחֵנִי / אַל בְּאַפְּךָ תוֹכִיחֵנִי
רַחוּם יִגְדַּל נָא חַסְדֶּךָ / כִּי רַבּוּ פְשָׁעַי נֶגְדֶּךָ
בִּרְצוֹנְךָ מַעֲוָה אֲצוּלָה / אַל תִּבְלָעֵנִי מְצוּלָה
יָגֹרְתִּי בְּזָכְרִי בְלֵב נִכְאֶה / כִּי יוֹם לַיְיָ צְבָאוֹת עַל כָּל גֵּאֶה
יוֹם כְּאֵבִי עֲנֵה כִּי הֶלְאָנִי / אַל תִּירָא כִּי אִתְּךָ אָנִי
הַעֲבֵר פִּשְׁעִי וְאַל תִּטֹּר / כִּי הָיִיתִי כְּנֹאד בְּקִיטוֹר
וְיוֹם תּוֹפַע עָלַי בְּאוֹרָה / אַל תּוֹפַע עָלָיו נְהָרָה
דְּלֵה שׁוֹכְנִים בְּקִיטוֹר כְּנֹאד / כִּי דַלּוֹנוּ מְאֹד
הַמְּלִיצִים רַע קְרָא בְאָזְנָם / אַל תְּהִי עֵד חִנָּם
גְּמֹל חֶסֶד וּגְמֹר זְדוֹנִים / כִּי גָמַר חָסִיד כִּי פַסּוּ אֱמוּנִים
בְּקָרְאִי יְבוֹאוּנִי חֲסָדֶיךָ / אַל תַּט בְאַף עַבְדֶּךָ
יָדוּעַ לְךָ אִישׁ נִפְרָע / כִּי יֵצֶר לֵב הָאָדָם רַע
רַחוּם בִּקְרֹב פְּקֻדָּה כְתוּבָה / אַל תִּרְחַק מִמֶּנִּי כִּי מָרָה קְרוֹבָה
לְךָ אֲצַפֶּה וְאֶזְנַח זְדוֹנָי / כִּי לֹא יִזְנַח לְעוֹלָם אֲדֹנָי.