וּבְכֵן מָה אָדָם וַתֵּדָעֵהוּ בֶּן אֱנוֹשׁ וַתְּחַשְּׁבֵהוּ

יְיָ מָה אָדָם

אֲנוּשִׁים וַעֲנוּשִׁים בְּקָשְׁיָם / אֲמֵלִים וַעֲמֵלִים בְּמִרְיָם

אַף רוֹאֵיהֶם יֹאמְרוּ אַיָּם / אָזְלוּ מַיִם מִנִּי יָם / אַךְ הֶבֶל בְּנֵי אָדָם

נְפָלִים שְׁפָלִים נִטְמוּ / נוֹדְדִים הֶבֶל יֶהֱמוּ

נִצְחָם וְכֹחָם יִתְּמוּ / נִמְשַׁל כַּבְּהֵמוֹת נִדְּמוּ / נִבְעָר כָּל אָדָם

יוֹם יוֹם זַדְנוּ וְאָשַׁמְנוּ / יַחְדָּו בֹּשְׁנוּ וְנִכְלַמְנוּ

יָעַצְנוּ רַע וְתֹךְ יָזַמְנוּ / יַחְפְּשׂוּ עוֹלוֹת תַּמְנוּ / יֵצֶר לֵב הָאָדָם

שׁוֹקֵד גָּדִישׁ וְרֶגֶב חוֹבֵשׁ / שׁוֹכֵן גּוּשׁ וְרִמָּה לוֹבֵשׁ

שָׁוֶה לַחֲצִיר גַּגּוֹת עָבֵשׁ / שֶׁקַּדְמַת שָׁלַף יָבֵשׁ / שֶׁלֹּא יִמְצָא הָאָדָם

לְקוּחִים לְדַבֵּר אִתָּם עַזּוֹת / לָתֵת לָהֶם בְּתֹפֶת אֲחֻזּוֹת

לְכוּדִים כַּצִּפֳּרִים הָאֲחוּזוֹת / לוּ חָכְמוּ יַשְׂכִּילוּ זֹאת / לִבּוֹת בְּנֵי אָדָם

מוּעָד וּמוּכָן לְקִיטוֹר גַּחַל / מְתֻקָּן וְנִסְכָּן לְתִגְרַת שַׁחַל

מָאוֹס יִמְאַס חַיָּיו בְּבַחַל / מָתְקוּ לוֹ רִגְבֵי נַחַל / מַה יִּתְרוֹן לָאָדָם

הֲמוֹנָם סָג וְיָשָׁר אֵין בָּם / הַוּוֹת בְּקִרְבָּם וְעָמָל בְּאָרְבָּם

הַמֵּבִין חֻבָּם וְחוֹפֵשׂ קִרְבָּם / הַיּוֹצֵר יַחַד לִבָּם / הִשְׁקִיף עַל בְּנֵי אָדָם

בְּבוֹא קִצּוֹ תְּסָעֲרֵהוּ / בְּאַמַּת בִּצְעוֹ תְּנַעֲרֵהוּ

בְּחֶרְמוֹ מָוֶת יְגֹרֵהוּ / בּוֹר כָּרָה וַיַּחְפְּרֵהוּ / בַּאֲשֶׁר הוּא סוֹף כָּל אָדָם

רָעוּץ וְרָצוּץ חֶלְיוֹ וְעֶדְיוֹ / רָאוּי לְשַׁלֵּם נִשְׁיוֹ בְקָשְׁיוֹ

רְגָבִים יְבַלּוּ שָׁרָשָׁיו וּפִרְיוֹ / רוֹאָיו יֹאמְרוּ אַיּוֹ / רַבָּה רָעַת אָדָם

בִּמְלֹאת סִפְקוֹ עֵצֶר יְנִיאֶנּוּ / בָּלַע חַיִל וַיְּקִיאֶנּוּ

בָּדָד יֵשֵׁב וְלֹא יִרְאֶנּוּ / בַּשָּׁלוֹם שׁוֹדֵד יְבוֹאֶנּוּ / בְּקוּם רְשָׁעִים יִסָּתֵר אָדָם

יְקָרוֹ נִשְׁחַת וְקַרְנוֹ נִגְדָּע / יְחִידָתוֹ מִשַּׁחַת בַּל יִפְדָּע

יוֹם אֲשֶׁר אֵלָיו יִתְוַדָּע / יְשַׁלֵּם אֵלָיו וְיֵדָע / יוֹדֵעַ מַחְשְׁבוֹת אָדָם

יֻדַּד כְּחֶזְיוֹן לַיְלָה בְּחֵמָה וְסָעַר / יְסֹעֵר כְּמוֹץ בְּסוּפַת יָעַר

יְגֹעַשׁ בְּגַעַשׁ כְּיָשִׁישׁ כְּנָעַר / יַחַד כְּסִיל וָבַעַר / יוּקְשִׁים בְּנֵי הָאָדָם

הִנֵּה אִם נֶחְפַּשׂ וְנִבְדַּק / הוּשַׁת כֻּלּוֹ סָג וְנֶחְדָּק

הָיֹה יִהְיֶה כְּאָבָק דַּק / הַאֱנוֹשׁ מֵאֱלוֹהַּ יִצְדָּק / הַמְלַמֵּד אָדָם

וְזָרִים בִּנְוֵהוּ יַאֲהִילוּן / וְנָכְרִים בְּאוֹצְרוֹתָיו יְגִילוּן

וְהוּא לִקְבָרוֹת יוֹבִילוּן / וּכְאוֹרֵחַ נָטָה לָלוּן / וַיֶּחֱלָשׁ וַיִּגְוַע אָדָם

דַּל לֹא יֶחְדַּל מֵעָווֹן וְאַשְׁמָה / דָּתוֹ אָוֶן עֲצָתוֹ תָרְמָה

דַּרְכּוֹ עָוֶל נְתִיבוֹ עָרְמָה / דִּבְרֵי פִיו אָוֶן וּמִרְמָה / דִּבְרַת בְּנֵי אָדָם

הוֹבֵר אֲשָׁמִים בִּצְרוֹר נֶחְתָּמִים / הָרֵי פְשָׁעִים עָלָיו נִכְתָּמִים

הִמֵּס יִמַּס בְּגַחֲלֵי רְתָמִים / הִנֵּה בִּהְיוֹתוֹ תָמִים הֶבֶל כָּל אָדָם

גָּזוּר מִטִּיט וְעַל טִיט נִסְמָךְ / גֵּווֹ פִתְאֹם יִתַּר וְיִמָּךְ

גּוּשׁ עָפָר עָנִי וָמָךְ / גֵּר אָנֹכִי עִמָּךְ / גַּם בְּנֵי אָדָם

בִּתְקֹף עָלָיו כִּידוֹר מֶלֶךְ / בְּכֵן יָשׁוּב לְאַרְצוֹ כְּהֵלֶךְ

בְּשׁוּבוֹ שָׁם עָרֹם כְּחֵלֶךְ / בַּהֶבֶל בָּא וּבַחֹשֶׁךְ יֵלֵךְ / בְּמוֹת אָדָם

יַעֲזֹב לַאֲחֵרִים רְכוּשׁוֹ / יְצוּעוֹ רִמָּה וְעָשׁ לְבוּשׁוֹ

יֵקַר פִּדְיוֹן נַפְשׁוֹ / יָשׁוּב עֲמָלוֹ בְרֹאשׁוֹ / יוֹם עַנּוֹת אָדָם

רוֹדֵף בְּחַיָּיו רוּחַ נָשׁוּב / רוֹדֶה בְמוֹתוֹ חֲמַת עַכְשׁוּב

רָאוּי כְּאֶפֶס וְאַיִן חָשׁוּב / רוּחַ הוֹלֵךְ וְלֹא יָשׁוּב / רוּחַ בְּנֵי הָאָדָם

וּמֵרֹב מְצוּקָיו בְּחַיָּיו יָרֵב / וּמוֹתוֹ עָרֵב וְיוֹמוֹ עוֹרֵב

וְקִצּוֹ בְקִרְבּוֹ לְנַפְשׁוֹ אוֹרֵב / וַיֵּלֶךְ הָלוֹךְ וְקָרֵב / וְרִחַק יְיָ אֶת הָאָדָם

לָרִיק יִיגַע וְיִדַּל מְאֹדוֹ / לַשָּׁוְא יַעֲמֹל וְיֶהְבַּל בְּעוֹדוֹ

לָכֵן לֹא יִשָּׂא מְאוּמָה בְּיָדוֹ / לֹא יֵרֵד אַחֲרָיו כְּבוֹדוֹ / לֹא יִכּוֹן אָדָם

חֳדָשָׁיו חִצֵּץ שׁוֹכֵן שְׁמֵי עָרֶץ / זָעוֹךְ נִזְעַךְ וְנִקְרַץ קָרֶץ

קָמוֹט נִקְמַט לְכָלָה וְחָרֶץ / זִכְרוֹ אָבַד מִנִּי אָרֶץ / זֶה חֵלֶק אָדָם.