שׁוֹמַמְתִּי בְּרֹב יְגוֹנִי / לְיוֹם יִפָּקֵד זְדוֹנִי / מָה אֹמַר לַאדוֹנִי
אֻמְלַלְתִּי וְנֶאֱלַמְתִּי / בְּזָכְרִי אֲשֶׁר אָשַׁמְתִּי / בֹּשְׁתִּי וְגַם נִכְלַמְתִּי
בְּהֶבֶל כָּלוּ יָמַי / מִפְּנֵי בֹשֶׁת עֲלוּמַי / אֵין שָׁלוֹם בַּעֲצָמַי
גַּחַלְתִּי קוֹדַחַת / כִּי מְגִלָּה נִפְתַּחַת / וְהַנּוֹשֶׁה בָּא לָקַחַת
דָּבַקְתִּי בְמַחְשַׁכִּי / וְנַפְשִׁי לֹא יָדְעָה כִּי / גֵר וְתוֹשָׁב אָנֹכִי
הוֹי כִּי יָבוֹא יוֹמִי / אֲזַי אִיקַץ מֵחֲלוֹמִי / וְאָשׁוּבָה אֶל מְקוֹמִי
וְעַל חֶטְאִי אֲשֶׁר עָבָר / וְעַל פִּשְׁעִי אֲשֶׁר גָּבָר / מָה אָשִׁיב שׁוֹלְחִי דָּבָר
זְדוֹן לִבִּי הִשִּׂיאַנִי / וְעָווֹן אֲשֶׁר הֶלְאָנִי / מִבֶּטֶן קְרָאָנִי
חוֹשֵׁב בְּנַפְשׁוֹ נָבָל / כְּעֵץ שָׁתוּל עַל יוּבַל / וְהוּא לִקְבָרוֹת יוּבָל
טָפַל שֶׁקֶר בְּתוֹכוֹ / וְנָטָה מִמַּהֲלָכוֹ / וַיִּפֶן כֹּה וָכֹה
יֻשְׁלַךְ כְּאֶבֶן דּוּמָה / וְלֹא יִשָּׂא לְבֵית מְהוּמָה / מִכָּל אֲשֶׁר לוֹ מְאוּמָה
כֹּחוֹ לֹא סְמָכַתְהוּ / עֵת נַפְשׁוֹ נְשָׂאַתְהוּ / אַף כִּי אֵשׁ אֲכָלָתְהוּ
לְכָדַתְנִי אַשְׁמָתִי / הֲלֹא זֶה דְבַר נִשְׁמָתִי / עַד הֱיוֹתִי עַל אַדְמָתִי
מְשׁוּגָתִי נָשָׂאתִי / וּבִלְבָבִי קָרָאתִי / אָנֹכִי חָטָאתִי
נְכוֹחָה לֹא חָשַׁקְתָּ / וּבִשְׁרִירוּת דָּבַקְתָּ / מַה לְּךָ כִּי נִזְעָקְתָּ
שְׂאִי נַפְשִׁי אַשְׁמָתֵךְ / רְאִי חֶטְאֵךְ לְעֻמָּתֵךְ / גַּם אַתְּ שְׂאִי כְלִמָּתֵךְ
עֵת אֶדְאַג מֵעֲווֹנַי / הֱשִׁיבוּנִי רַעְיוֹנַי / נִפְּלָה נָּא בְיַד אֲדֹנָי
פְּנֵה מִמְּכוֹן שִׁבְתֶּךָ / וּפְתַח לִי דְלָתֶיךָ / כִּי אֵין בִּלְתֶּךָ
צוּר הָגֵן בַּעֲדֵנִי / וּמֵעֲווֹנוֹתַי פְּדֵנִי / אֹרְחוֹתֶיךָ לַמְּדֵנִי
קוֹלִי שְׁמַע כְּחַסְדֶּךָ / בְּיוֹם אֶעֱמֹד נֶגְדֶּךָ / אַל תַּט בְּאַף עַבְדֶּךָ
רְאֵה עָנְיִי וַעֲנֵנִי / אֲנִי בְיָדְךָ הִנֵּנִי / וְאַתָּה יְיָ חָנֵּנִי
שְׁלַח אֲמִתְּךָ וְחַסְדֶּךָ / לְעַם צוֹעֲקִים נֶגְדֶּךָ / וְלִי אֲנִי עַבְדֶּךָ
תִּסְלַח לַאֲשָׁמֵינוּ / וְאַל תִּפְקֹד עֲלוּמֵינוּ / כִּי צֵל יָמֵינוּ.