אֹזֶן הַטֵּה לְעָם / ר' משה אבן עזרא
סימן: אני משה בן יעקב בן עזרה
br>
אֹזֶן הַטֵּה לְעָם לִבּוֹ יִנְהָם,
יְקַוּוּ לְאוֹר וָאַיִן, וְאֹפֶל יְכַס נָגְהָם –
לָמָּה תִהְיֶה כְּאִישׁ נִדְהָם
כְּגִבּוֹר לֹא יוּכַל לְהוֹשִׁיעַ: / ירמ' יד, ט
נִגָּפִים וּמִכַּעַס כַּהֲתָה עֵינָם
וְהֵשִׁיבוּ עֲלֵיהֶם צָרִים אֶת אוֹנָם
יִצְעֲקוּ חָמָס וַאדֹנָי לֹא עָנָם
יְשַׁוְּעוּ וְאֵין מוֹשִׁיעַ: /תה' יח, מב
יֶלֶד רוֹבֶה הִכְחִיד הֲמוֹנֵיהֶם
וְקוֹל שׂוֹטֵם הִשְׁמִיד בְּנֵיהֶם,
שָׂם לוֹ רֹאשׁ וַיַהֲרֹג מִשְׁמַנֵּיהֶם
וּבַחוּרֵי יִשְׂרָאֵל הִכְרִיעַ: / שם עח, לא
מַחְשָׁךְ הוּשַׁת מְאוֹר שִׁמְשׁוֹ
בְּרֹאשׁ פְּתָנִים הוּמרַ דִּבְשׁוֹ
שַׁח וַיָכָף כְּאַגְמוֹן רֹאשׁוֹ
וְשַׂק וָאֵפֶר יַצִּיעַ: / ישע' נח, ה
שְׁאוֹנִים לָאָה לָשֵׂאת וַיִּעָף
טַל גָּפְרִית מֵעֵינָיו יִרְעַף
כִּי אַף אַל חָרָה בוֹ וְזָעַף
עַד לַשָּׁמַיִם יַגִּיעַ: / דהי"ב כה, טו
הֲמוֹן יְגוֹנִים עָלָיו חָבַר
וְנַחַל מֵי דְמָעָיו גָּבַר
וְדַם לְבָבוֹ שָׁטַף וְעָבַר
עַד צַוָּאר יַגִּיעַ: /ישעי' ה, ח
בֵּן מִבֶּטֶן לְעֶבֶד יְצַרְתּוֹ
וּבְמַסְגֵּר עָנְיוֹ עֱזַבְתּוֹ
וְתֹקֶף יָדוֹ וְתִפְאַרְתּוֹ
אָב לְבָנִים יוֹדִיעַ: / שם לח, יט
רוּמָה לְהַשְׁמִיד גְּאוֹן מוֹנָיו
וְעַל גַּבֵּהוּ יָדְךָ תְּשַּׁלַח חֲרוֹנָיו
וְעַל תִּפְאֶרֶת רוּם עֵינָיו
וְשַׁח עֵינַיִם יוֹשִעַ: /איו' כב, ט
יִשְׁעֲךָ אֱלֹהֵי עוֹלָם קִוִּינוּ
וְצִדְקָתְךָ בַּצָּרָה חִכִּינוּ –
בְּצִפִּיָּתֵנוּ צִפִּינוּ
אֶל גּוֹי לֹא יוֹשִׁעַ: /איו' ד, י
עֲשֵׂה בְּעֵת אַפְּךָ בְּעוֹשִׂים בְּעָקְבָה
וְשָׁפְטֵם בְּאֵשׁ וְלֶהָבָה
כִּי מִשְׁפָּטֶיךָ תְּהוֹם רַבָּה
אָדָם וּבְהֵמָה תּוֹשִׁיעַ: /תה' לו, ז
קוֹדְרִים אָפְלָם בְּךָ יָאִירוּ
וּבְיָשְׁעֲךָ לְעֵין כָּל יַכְתִּירוּ
וּכְמֵאָז הַמַּשְׂכִּילִים יַזְהִירוּ
כְּזֹהַר הָרָקִיעַ: / דנ' יב, ג
בָּאֵר נִחֻמַי חִזָּיּוֹן
כִּי לָעַד לֹא יִהְיוּ לְכִלָּיּוֹן
יָחֹס עַל דַּל וְאֶבְיוֹן
וְנַפְשׁוֹת אֶבְיוֹנִים יוֹשִׁיעַ: / תה' עב, יג
בְּטוּבְךָ דַּרְכֵי פְּעָלָיו תְּשַׁוֶּה
וְאָרְחוֹת צוֹרֲרָיו תְּעַוֶּה
וּבְמֵי יֶשַׁע צִמְאוֹנָיו תְרַוֶּה
וְנֶפֶשׁ נַעֲנָה תַּשְׂבִּיעַ: / ישע' נח, י
נָשָׂאתִי לָהֶם כְּמֵאָז יָדִי
כִּי בָנַי אַלְבִּישׁ הוֹדִי
וְעַל צָרֵיהֶם אָשִׁיב יָדִי
כִּמְעַט אוֹיְבֵיהֶם אַכְנִיעַ: /תה' סא, טו
עוּרָה לְהַרְאוֹת הָעַמִּים פִּלְאוֹ
וַעֲלֵיהֶם יִגְדַּל צְבָאוֹ
וְיַעֲלֶה לַשָּׁמַיִם שִׂיאֹו
וְרֹאשׁוֹ לָעָב יַגִּיעַ: / איו' כ, ו
זְרוֹעוֹ יֶחֱשׂף וְיִשְׁעוֹ יָחִישׁ
וִישַׁלַּח חֵטְא כְּצִפְעוֹנִי יַפְרִשׁ
יָחֹן וְיִרְאֶה כִּי אֵין אִישׁ
וַיִּשְׁתּוֹמֵם כִּי אֵין מַפְגִּיעַ: / ישע' נט, טז
רֶשַׁע יְטַהֵר וְטֶנֶף יָדִיחַ
וּבְעֵין רַחֲמָיו אֵלָיו יַשְׁגִּיחַ
כִּי הוּא יַגַּע וּמִי יָנִיחַ
וְהוּא יַשְׁקִט וּמִי יַרְשִׁעַ: /איו' לד, כט
הַנְחֵה אוֹתָם כִּדְבַר צוֹפִי
כַּאֲשֶׁר הָיִיתִי בִּימֵי חָרְפִּי
מִצִּיּוֹן מִכְלַל יֹפִי
אֱלֹהִים יוֹפִיעַ וְאֶת עַם עָנִי תּוֹשִׁיעַ: /ש"ב כב, כח