חֶשְׁקִי בְּךָ צַדִּיק לְרֹב צִדְקָתְךָ / אַתָּה חֲמוּד לִבִּי בְּעֵינַי הִנְּךָ

תַּחְשֹׁב שְׁכַחְתִּיךָ בְּאֶרֶץ הַצְּבִי / כָּל עֵת נְסִיעָתִי בְלִבִּי הִנְּךָ

שׁוֹכֵן בְּמַשְׂכִּיּוֹת חֲדָרָיו כָּל יְמֵי / חַיַּי וְגַם אָנִי לְנֹכַח עֵינְךָ

אִשִּׁים סְבָבוּנִי בְּנוּדִי מִמְּךָ / אֶתְאַו לְקֹט שׁוֹשָׁן בְּמַעְיַן גַּנְּךָ

הָסֵר בְּפִלּוּלָךְ זְאֵבִים טוֹרְפִים / הַיּוֹם וְאָשׁוּבָה וְאֶרְעֶה צֹאנְךָ

בָּעַר בְּשַׂר גּוּפִי בְּאֵשׁ פֵּרוּדְךָ / רַחֵם נְכֵה לֵבָב אֱלֹהִים יָחְנְךָ

מַבְעִיר בְּמוֹ צַלְעִי עֲלֵי לִבִּי לְאַט / פֶּן תִּשְׂרְפָה אוֹתוֹ וְהוּא מִשְׁכָּנְךָ

עַתָּה יְדִיד נַפְשִׁי לְכָה אִיעָצְךָ / הוֹאֵל וְקַח אִשָּׁה וְשֵׁב עַל כֵּנְּךָ

רַב לָךְ לְהִתְנוֹדֵד שְׁמַע מִנִּי וְקַח / עֵזֶר לְנֶגְדְּךָ לְאַפִּרְיוֹנְךָ

סֹב לָךְ לְחִזְקִיָּה בְּעָמְדוֹ מֵחֳלִי / כָּבֵד לְהַפְרִיחַ וְקַיֵּם נִינְךָ

אַתָּה כְמַלְאַךְ הָאֱלֹהִים תַּחְכְּמוֹן / לָכֵן וּמִי אָנִי לְגַלּוֹת אָזְנְךָ

יִשְׁלַח לְךָ שָׁלוֹם אֱלֹהִים מִמְּעוֹן / קָדְשׁוֹ וְהוּא סִתְרָךְ וְגַם מָגִנְּךָ

נָתַן לְךָ חַיִּים אֲשֶׁר כִּלְבָבְךָ / יַנְחִילְךָ עוֹלָם כְּפִי צִבְיוֹנְךָ.