עוד על מות אחיו יוסף [אבו־אלחנאנ]
עַל הַדֳּמִי תִבְטַח בְּחוּל חֵילֶךָ / אוֹ בַּבְּכִי, כֹּאֵב, תְּשַׁו כִּסְלֶךָ?
עַד מֶה לְבַכּוֹת תִּהְיֶה שֹׁאֵל דְּמֵי / כָבֵד, וְהוּא נָדִיב בְּהַשְׁאִילֶךָ!
מַה־בִּצְעֲךָ תָמִיד בְּהִתְנוֹדֵד, וּמַה / יִסְכֹּן לְךָ דֶמַע וְיוֹעִילֶךָ?
יוֹרִישֶׁךָ הַלֵּב יְקֹד הָאֵשׁ, וְכֵן / עַיִן הֲמוֹן מַיִם תְּהַנְחִילֶךָ,
הֵם מִבְצְרֵי תִקְוָתְךָ יוֹם הַקְּרָב, / הֵם תֶּלְיְךָ לִלְחֹם וְהֵם כֵּלֶיךָ!
נָפַל בְּהִתְאוֹנֵן וְקוֹנֵן חֶבְלְךָ / וּסְפוֹד וְהַקְרִיחַ בְּגוֹרָלֶךָ,
וּזְמָן לְךָ הֵצִיק, וְחוֹתָם צַר בְּעֵין / מַדָּעֲךָ הֵם מֶרְחֲבֵי חֶדְלֶךָ.
נוֹעַ וְנוֹחַ הֵם חֲלִיפוֹתָיו, וְכֹל / הַיּוֹם יְשַׁחֶרְךָ לְהַבְהִילֶךָ,
וַיַּשְׁקְךָ מֵי רֹאשׁ בְּעֵת צִמְאָה, כְּמוֹ / מִנָּה פְּרִי לַעְנָה לְהַאְכִילֶךָ.
הִכְחִיד יְדִידֶיךָ וְאַחֶיךָ שְׁכֶם / אֶחָד וְאֵין שָׂרִיד בְּאֹהָלֶךָ.
עָפוּ מְשׂוֹשֶׂיךָ כְּמוֹ קַשׁ מִפְּנֵי / רוּחַ וְנָגֹלוּ שְׁמֵי גִילֶיךָ,
עַד שָׂמְךָ מָשָׁל בְּפִי תֵבֵל, וְשָׁת / חִידָה לְכָל־יָבוֹא מְרִי אֶבְלֶךָ.
מִי רַגְלְךָ מִמּוֹט יְהִי תוֹמִיךְ וּמִי / בַּצַּר יְהִי עִמְּךָ לְהַצִּילֶךָ,
אוֹ מִי יְהִי עֶזְרָה בְּיוֹם עֶבְרָה וְעַל / מִי יוֹם מְהוּמָה תַּעֲזֹב חֵילֶךָ?
הַיּוֹם אֲשֶׁר בּוֹ צָלֲלָה אָזְנִי בְּמוֹת / יוֹסֵף, מְנֻדָּח יִהְיֶה אָפְלֶךָ,
תֹּאבַד וְלֹא תִחַדְּ בְּסוֹד יָמִים, אֲבָל / יִקַּחֲךָ אֹפֶל וְיִגְאָלֶךָ.
עֵץ רַעֲנָן, הָשְׁקָה בְמֵי שֵׂכֶל, אֱמֹר: / אֵיכָה בְּפֶתַע נָבְלוּ עָלֶיךָ,
סוּפָה גְנָבַתְךָ וְשָׁרְשָׁךְ שֵׁרְשָׁה / מִתּוֹךְ עֲרוּגָתְךָ וְסָר צִלֶּךָ!
הֵילֵל בְּנוֹ שַׁחַר, הֲנָפַלְתָּ וְאֵיךְ / לֹא זָע צְבָא מָרוֹם לְקוֹל נִפְלֶךָ?
אַבִּיט פְּנֵי שֶׁמֶשׁ וְאַךְ לֹא אֶחֱזֶה / הַהוֹד אֲשֶׁר אָז נָתְנוּ עָלֶיךָ.
אֶשְׁאַף לְרֵיחַ מֹר, וְאִם לֹא יַעֲרֹךְ / בָּשְׂמֵי זְמָמֶיךָ וּמַעְלָלֶיךָ,
וָאֶטְעֲמָה נֹפֶת וְלֹא יִמְתַּק לְפִי / כִּדְבַשׁ אֲמָרֶיךָ וְצוּף מִלֶּיךָ.
לֹא נָעֲמָה אָזְנִי בְּקוֹל כִּנּוֹר בְּעֵת / טוּב לִקְחֲךָ אֶזְכֹּר וְהוֹד קוֹלֶךָ.
אֶלְעַג לְנוֹזְלֵי עָב בְּזָכְרִי מִשְׁבְּרֵי / יָם אֶצְבְּעוֹתֶיךָ וּבִשְׁעָלֶיךָ.
יִתְיַעֲצוּ שָׂרִים וְאַךְ לֹא אֶשְׁמְעָה / בֵּין מוֹעֲצוֹתָם תֹּלְדוֹת שִׂכְלֶךָ.
עָצְמָה תְלָאָתְךָ כְּפִי עָצְמָךְ וְכֵן / מַכְאוֹבְךָ גָּדַל כְּפִי גָּדְלֶךָ.
תִּכְלֶה – וְתִתְחַדֵּשׁ תְּהִלָּתְךָ, אֲבָל / תִּרְקַב – וְהוֹדְךָ חַי וּמַהְלָלֶיךָ.
מִי יִתְנֵנִי כָפְרְךָ, אָחִי, וּבִי / תִפְגַּע תְּמוּתָה בַּל קְרֹב אֵלֶיךָ,
נַדְתִּי יְמֵי חַיַּי עֲלֵי נוֹדְךָ וְהֵן / אֶתְאַו לְקֶבֶר לִהְיוֹת חַבְלֶךָ.
אֵלָיו אֲנִי קוֹרֵא לְרָחוֹק: אַחֲלַי, / קֶבֶר, וְקִבְרִי אֶחֱצֹב אֶצְלֶךָ!
צִדְקָךְ לְפָנֶיךָ יְהִי הֹלֵךְ וְשָׁם / יָכִין צְעָדֶיךָ וּמַעְגָּלֶיךָ,
תִּשְׁכַּב וְלֹא תִפְחַד וְרַחְמִי יֹצְרָךְ / הֵם מַאֲמִינֶיךָ וּמַשְׂמִילֶיךָ,
דַּי קִבְרְךָ כָּל־עֵת עֲנַן כָּבוֹד יְרַו / אֹתוֹ וְטַל אֹרוֹת יְהִי טַלֶּךָ!