לוגו
הִתְאַבְּלִי נַפְשִׁי
פרק:
מיקום ביצירה:
0%
X
F
U

עוד על מות אחיו יצחק

הִתְאַבְּלִי, נַפְשִׁי, וְסוּת אֵבֶל / לִבְשִׁי וְעַל שַׂקֵּךְ תְּנִי חֶבֶל,

הִתְאַחֲרִי לֵימִין וְלַשְׂמִיל גַּם / עוּרִי לְקוֹנֵן וַחֲשֹׂף שֹׁבֶל.

מִכְרִי מְשׂוֹשֵׂךְ לַצְּמִיתֻת גַּם / גֹּאֵל יְהִי לָעַד וְלֹא יוֹבֵל.

סִפְרֵי כְרִיתוּת כִּתְבִי אֶל גִּיל, / לִקְחִי כְלֵי תַנּוֹת מְקוֹם נֵבֶל.

אַל תִּפְחֲדִי מֵאַף זְמָן לָעַד, / אַל־נָא תְגוּרִין מֵחֲרוֹן תֵּבֵל.

מַה־יַּעֲשֶׂה בָךְ עוֹד וְלֹא עָשָׂה? / הֶעְמִיק לְהָרַע וַעֲשׂוֹת תֶּבֶל,

אַחַר נְפֹל אָחִי יְכֹלֶת אֵין / בּוֹ לִהְיוֹת מֵיטִיב וְלֹא חֹבֵל.

הִכָּה וְלֹא חָמַל וְשִׁבֵּר כָּל / עֻזֵּךְ וְתִפְאַרְתֵּךְ שְׁבֹר נֵבֶל,

שִׂיאֵךְ בְּאַף הִשְׁפִּיל, וְאֵיךְ לַפִּיל / עוֹד בַּנְּעִימִים תִּקְרְאִי חֶבֶל,

בֵּית הָאֱסוּר הֵן אַחֲרָיו רֹחַב / חֶלְדִּי וְהָעוֹלָם כְּמוֹ כֶבֶל?

סוֹבֵל כְּבוֹד כָּל־הַיְקָר אֵיכָה / עָפָר לְגַבּוֹ יִהְיֶה סֵבֶל.

שֶׁמֶשׁ לְמִפְקָדוֹ חֲבֵר תַּנִּים, / סַהַר עֲלֵי מוֹתוֹ אֲחִי אֵבֶל,

הַיּוֹם יְבִינוּן כִּי צְבָא מָרוֹם / יִבְלוּ וְיִבֹּלוּ כְצִיץ נֹבֵל.

יִכְלֶה כְגוּשׁ עָפָר וְלֹא יָסוּף / זֵכֶר תְּהִלּוֹתָיו וְלֹא יִבֶל.

אַחַר הֲלֹךְ אָחִי לְבֵית שַׁחַת / בַּנְתִּי הֲכִי כָל־הַיְּצוּר הָבֶל.