אל יצחק בן משכראן
מִנַּחֲלֵי בֶכֶה אֲשֶׁר נִטָּיוּ / צִיָּה וְחֹם עַל הַלְּחִי יִשְׁתָּיוּ,
הַקֹּדְרִים מִנִּי נְחָלִים יַעְבְּרוּ / עַד כִּי לְאִטָּם יֶחְמְרוּ יֶהְמָיוּ.
עַל מַה הֲרֻגֵי הַנְּדֹד יִתְגֹּלְלוּ / תָמִיד בְּדַם דִּמְעָה וּמַר יִבְכָּיוּ,
הַאִם סְנֶה חֹרֵב בְּצַלְעוֹת חֹשְׁקִים / כִּי יִבְעֲרוּ בָאֵשׁ וְלֹא יִכְלָיוּ.
עִמִּי לְהִתְגֹּרֵר בְּנֵי יוֹם חָמְדוּ / וּבְצֵל כְּנָפַי מֵאֱנוֹשׁ יֶחְסָיוּ,
הִרְבּוּ מְהוּמוֹתַי כְּשֵׂיבוֹתַי אֲשֶׁר / לֹא יִמְעֲטוּ לָעַד אֲבָל יִרְבָּיוּ.
חָלַף זְמַן חֶבֶר כְּצֵל עוֹבֵר וְכָל / מִבְחַר יְמוֹתַי כַּחֲלוֹמִים הָיוּ,
נִשְׁכַּח זְמַן נֹעַם עֲדֵי לֹא יִמְצְאוּ / אֹתוֹ מְזִמּוֹתַי בְּעֵת יִבְעָיוּ.
רִפְיוֹן יְדֵי שֶׁקֶר כְּצֹר חָזְקוּ וְעֹז / שׁוֹקֵי אֱמוּנָה מַה־מְּאֹד דָּלָיוּ,
עַד פַּעֲמֵי יִצְחָק כְּאַיִן שֻׁפְּכֻה / מֵעַל נְתִיב אֵמוּן וְלֹא נָטָיוּ,
כִּי אֶשְׁמְעָה מִפִּי חֲסָדָיו מִדְבְּרֵי / נֹעַם יְפַתּוּנִי – וְלֹא יֶאְתָיוּ.
אֵין לָאֱנוֹשׁ יִתְרוֹן בְּשֵׁמַע עַד אֲשֶׁר / יִתְרוֹן סְגֻלַּת אֹהֲבָיו יֶחְזָיוּ.
תַּאֲוָה לְכָל עַיִן! יְמַלֵּא תַאֲוַת / שׁוֹגִים בְּאַהְבָתוֹ וְאָז יִשְׁלָיוּ,
כִּי טַל כְּתָבוֹ לֹא יְכַבֶּה הַיְקוֹד / עַד כִּי בְגִשְׁמֵי תָאֳרוֹ יִרְוָיוּ,
אֶתְמַהּ לְדוֹדִים חָבְרוּ – אֵיךְ גָּוְעוּ? / וּלְאֹהֲבִים הִתְפָּרְדוּ – אֵיךְ חָיוּ?