אל אבו־איוב [שלמה] בן אלמעלם ואחיו
לְבָבִי יֶחֱרַד לָצֵאת אֲלֵיהֶם / וְעֵינַי יִזְּלוּ מַיִם עֲלֵיהֶם
וְיֵלְכוּ יֶחְמְרוּ, כִּי מִמְּקוֹרֵי / כְּבֵדִי נִמְשְׁכוּ מֵי נַחֲלֵיהֶם.
אֲדַמֶּה כִּי יְכַבּוּ אֵשׁ קְרָבַי, / וְאָכֵן נוֹקְדוּ בָם גַּחֲלֵיהֶם.
בְּיָדָם נִפְקְדָה נַפְשִׁי בְּצֵאתָם / וְאֵיךְ אוֹתָהּ אֲמַשֵּׁשׁ בֵּין כְּלֵיהֶם,
אֲחוֹנֵן אֶת־עֲפַר רַגְלָם וְאֶשַּׁק / בְּדֶרֶךְ צָעֲדוּ בָהּ שַׁעֲלֵיהֶם,
וְאֵיךְ אֶתְאַב לְמַרְאֵיהֶם וּבֵינוֹת / קְרָבַי תָּקְעוּ אֶת־אָהֳלֵיהֶם,
וְאֵיךְ מִקֹּר וְחֹם אִירָא עֲלֵיהֶם / וְהֵם בֵּינוֹת צְלָעַי צִלֲלֵיהֶם,
וְרוּחָם אֵיךְ אֱהִי שֹׁאֵף וְזֵכֶר / שְׁמָם יִשָּׂא לְאַלְפֵי מֹשְׁלֵיהֶם,
לְאַחִים מָשְׁלוּ עַל הַלְּבָבוֹת – / הֲכִי צֶדֶק וְחֶסֶד מֹשְׁלֵיהֶם,
מְאוֹרִים, גָּזְלוּ שֶׁמֶשׁ וְסַהַר / מְאוֹרֵיהֶם, וְאַךְ הֵם גּוֹזְלֵיהֶם,
וְהָרִים עָרְכוּ תָבוֹר וְחֶרְמוֹן, / וְאִם גָּדְלוּ עֲלֵיהֶם מִגְדְּלֵיהֶם,
וְעֵת עִמָּם יְהוּ עוֹלִים בְּמֹאזְנֵי / אֱמוּנָה – חָסְרוּ אֶת־מִשְׁקְלֵיהֶם.
עֲצֵי עֵדֶן עֲלֵי פַלְגֵי תְעוּדָה / וְנַחְלֵי הַחֲסָדִים נַחְלֵיהֶם.
עֳפָרִים, אַךְ בְּמִלְחֶמֶת חֲכָמִים / בְּפִיהֶם יִטְרְפוּ אֶת־שַׁחֲלֵיהֶם,
וּבִמְרוּצַת בְּנֵי הַשְׂכֵּל עֲיָרִים / הֲיַשִּׂיגוּ לְאִטָּם יַעֲלֵיהֶם?
בְּפִיהֶם רִפְּאוּ חוֹלֵי יְגוֹנִים / וּמִלֵּיהֶם יְקִימוּן כּוֹשְׁלֵיהֶם,
וְהִשְׁאִילוּ לְכָל דּוֹרֵשׁ חֲפָצָיו / עֲדֵי הָיוּ עֲנָנִים שֹׁאֲלֵיהֶם,
יְדֵיהֶם לִמְּדוּ מַתָּן לְיָמִים / עֲדֵי הִתְנַדְּבוּ כָּל־נֹכְלֵיהֶם.
יְאַו סַהַר הֱיוֹת כֶּתֶר לְרֹאשָׁם / וְעַיִשׁ עִם יְלָדֶיהָ חֲלֵיהֶם,
וּבִבְלוֹיֵי חֲלִיצוֹתָם יְפָאֵר / זְמָן שָׂרָיו וּבִשְׂרוֹךְ נַעֲלֵיהֶם,
בְּאֵין יָד הַלְּבָבוֹת שֹׁלְלֵיהֶם / וְעֵינַיִם בְּלִי פֶה אֹכְלֵיהֶם.
כְּאִלּוּ אֵל עֲלֵי חֶפְצָם יְצָרָם / וְעַל פִּיהֶם הֱכִינָם פֹּעֲלֵיהֶם.
דְּמֵי עֵינַי לֹא יִתְּנוּ עַד / בְּחַסְדָּם יִהְיוּ הֵם גֹּאֲלֵיהֶם,
וְאִמְרֵי פִי לְהַזּוֹת מֵי רְצוֹנָם / עֲלֵיהֶם מִלְּבַד חֵן מִשְׁאֲלֵיהֶם,
וְלִפְנֵיהֶם לְאַט צֶדֶק יְהַלֵּךְ / וְגַם יָשִׂים לְדֶרֶךְ מַעְגְּלֵיהֶם.