דבר המת מקברו

מֵרֵעַי וּשְׁכֵנַי / וְאַחַי נֶאֱמָנָי,

אֲהָהּ, כָּהוּ עֵינָי / וְהָגְלֵיתִי מִמִּשְׁכָּנָי

וְלֹא תוֹסִיפוּ רְאוֹת פָּנַי. / אַל, בְּנוֹתַי וּבָנָי,

שׁוּבוּ לְאַרְמוֹנַי! / מַה תִּבְכּוּ לְפָנָי?

כִּי מַר לִי מְאֹד מִכֶּם / כִּי יָצְאָה בִי יַד אֲדֹנָי.

אֲנוּשָׁה מַכָּתִי, / כִּי יוֹם אֲסִיפָתִי

עָזַבְתִּי אֶת בֵּיתִי, / נָטַשְׁתִּי אֶת נַחֲלָתִי.

וַעֲדֵי עַד זֹאת נֶחָמָתִי / – – –

עָרְבָה שִׂמְחָתִי / וְנִגְזְרָה תַאֲוָתִי

וְחָסְרוּ חִשְּׁבוֹנָי –

כִּי מַר לִי מְאֹד מִכֶּם / כִּי יָצְאָה בִי יַד אֲדֹנָי.

בָּנִים גִּדַּלְתִּי / בָּם לֹא צָהַלְתִּי.

אַךְ לְרִיק עָמַלְתִּי / וְגַם יַרְחֵי שָׁוְא הָנְחַלְתִּי

וְתַחַת עֲפָרוֹת אָהַלְתִּי, / בְּשַׁחַת נִטְבַּלְתִּי

וְלִשְׁאוֹל הוּבַלְתִּי / יוֹם הִתְנַצַּלְתִּי

מֵעֲדִי עֲדָנָי –

כִּי מַר לִי מְאֹד מִכֶּם / כִּי יָצְאָה בִי יַד אֲדֹנָי.

סִפְדוּנִי, עַמִּי, / וּשְׂאוּ רַק שְׁלוֹמִי

לִצְעִירִי יְתוֹמִי / כִּי נִכְמַר לוֹ נִחוּמִי,

וְאֵין צֵאת וָבוֹא לִמְקוֹמִי. / שַׁבְתִּי אֶל חֵיק אִמִּי

ולְבֵית עוֹלָמִי / וְחָשַׁךְ אוֹר יוֹמִי,

כִּי גָבְרוּ עֲנָנָי –

כִּי מַר לִי מְאֹד מִכֶּם / כִּי יָצְאָה בִי יַד אֲדֹנָי.