הֲנַפְשִׁי בָחֲרוּ לִשְׁכֹּן יְגוֹנוֹת / וְאֹתִי חָמְּדוּ יַחַד מְהוּמוֹת

וְשָׁטוּ עַל־פְּנֵי תֵבֵל וּבֵינוֹת / צְלָעַי נִתְכְּנוּ לָהֶם מְקֹמוֹת

וְיַלְדֵי יוֹם הֲלוֹם לִבִּי וְהַכְשִיל / בְּכַשִּׁיל רוֹצֲצוּ וּבְמַהֲלֻמּוֹת

וְדָמִים יִדְרְשׁוּ מִיַּד בְּנֵי־אִישׁ / וּמִמֶּנִּי לְבַד יִקְחוּ נְקָמוֹת

בְּפָנַי חִזְּקוּ פָנִים וּבוֹשׁוּ / לְכָל־לֹא־בוֹשׁ וְלֹא הִסִּיג כְּלִמּוֹת

קְרָבוֹת יַעְרְכוּ יוֹם יוֹם לְנֶגְדִּי / וְתָמִיד יִקְרְאוּ לָהֶם שְׁלוֹמוֹת

בְּעֵין קֶצֶף יְשׁוּרוּן בַּעֲלֵי־תֹם / וְעֵין חַנּוֹת בְּנֵי דָמִים וּמִרְמוֹת

יְכַחֵשׁוּ בְאִישׁ כִּחֵשׁ בְּשָׂרוֹ / דְּרשׁ חָכְמָה וּפַתֵּחַ סְתֻמוֹת

וְיִתְרָעוּ לְרָץ מִשֹּׁד וְחָמָס / עֲלֵי־כֶסֶל עֲשֹׂה עֶשֶׁת וּפִימוֹת

גְּבוּל גֵּאִים עֲלֵיהֶם חֹק לְהַצִּיב / וְהָשִׁיב מוֹֽשְבוֹת בָּרִים נְשַׁמּוֹת

לְאַט כִּי לֹא כְּכָל־פַּעַם זְמָן קָם / לְרִיבֹתַי וְהִגִּישׁ הָעֲצֻמוֹת

אֲבָל דִּמָּה לְהַשְׁווֹת צַר וְאֹהֵב / וְנַפְשׁוֹתָם בְּיָגוֹן תֵּת עֲגוּמוֹת

וְכָל־עֵת יַהֲפֹךְ יָדוֹ בְגוּפוֹת / וְלֹא־נָגַף לְבַד הַיּוֹם נְשָׁמוֹת

וְעוֹד בִּקֵּשׁ עֲלֵי נַפְשׁוֹ תְנוּאוֹת / כְּאִלּוּ לוֹ עֲלֵי נַפְשׁוֹ אֲשָׁמוֹת

וְהוֹרִד אֶת־פְּאֵר עֻזּוֹ אֲשֶׁר־בּוֹ / אֲרָצוֹת אָחֲזוּ עַל־רוֹם תְּרוּמוֹת

וְנִצַּל הוֹד צְבִי עֶדְיוֹ וְנִפֵּץ / כְּנֵבֶל יוֹֽצְרִים גָּבִישׁ וְרָאמוֹת

וְהַכּוֹכָב אֲשֶׁר יָפִיץ מְאוֹרוֹ / בְּיוֹם וָלֵיל פְּנֵי שֹׁכְנִי הֲדֹמוֹת

רְחַב נֶפֶשׁ כְּפִי שִׂכְלוֹ וְדֵעוֹ / אֲשֶׁר הָיוּ רְחָבִים מִתְּהֹמוֹת

שְׁפַל לֵב עִם־בְּנֵי תֵבֵל וְהָיוּ / לְיָדָיו עַל־בְּנֵי־עַיִשׁ תְּשׂוּמוֹת

לְצָרָיו נִמְצְאוּ־בוֹ חִיל וְחֵמוֹת / וְלִקְשֻׁרֵי לְבָבוֹ חֵל וְחוֹמוֹת

וּמִשֶּׁמֶן מְאֹד רַכּוּ דְבָרָיו / וּמָתְקוּ מַעֲנָיו מִצּוּף וְחֵמוֹת

מְחַדֵּשׁ מַחְלְצוֹת חֶסֶד בְּיוֹם כֻּ־ / תֳּנֹתָיו עַל־בְּנֵי תֵבֵל פְּרֻמוֹת

וְכַמָּה מַעֲלוֹת הוֹד נִקְּבוּ־בוֹ / אֲשֶׁר לֹא־נִקְּבוּ מֵאָז בְּשֵׁמוֹת

וְאֵין נִפְתָּל וְעִקֵּשׁ בַּאֲמָרָיו / וְצַחוֹת פִּיו כְּמִפְעָלָיו שְׁלֵמוֹת

לְאֵם־דֶּרֶךְ עֲמֹד רָעָה מְבַשֵּׂר / וְהַשְׁמִיעַ אֱלֵי קַצְוֵי אֲדָמוֹת

וְהָרֵם קוֹל לְכָל־שֹׁאֵל אֲשֶׁר מַר־ / כְּבֹתָיו לַהֲלֹךְ אֵלָיו רְתוּמוֹת

עֲמֹד כִּי־נֶעְצְרוּ עָבֵי נְדִיבוֹת / וְיָמִין בָּהּ לְךָ נֶצַח נְעִמוֹת

וְלַכּשֵׁל צְפֹר כִּי־סָף גְּבִיר פִּיו / וְאִמְרוֹתָיו לְכָל־כּשֵׁל מְקִימוֹת

וְלַהֵלֶךְ נְטֵה כִּי־סָר נְדִיב לֵב / שְׁכוֹן תַּחַת מְכוֹן אַרְמוֹן יְשִׁימוֹת

וְהָאָמוּן עֲלֵי תוֹלָע לְחַבֵּק / בְּעִי מִדְבָּר מְקוֹם תּוֹלָע וְרִמּוֹת

כְּהַיּוֹם אֹהֲבַי קִרְאוּ מְבַכּוֹת / וְתָבוֹאנָה וְשִׁלְחוּ לַחֲכָמוֹת

וְהָחִישׁוּ בְּנוֹת יַעְנָה וְיִהְיוּ / כְּהֶמְיָתִי בְּלִי פוּגָה מְהִימוֹת

וּמִי־יִתֵּן כְּיָם רֹאשִׁי וְעֵינַי / כְּנֹאדוֹת יִגְּרוּ־מַיִם וְחֵמוֹת

וְיָזוּב דַּם כְּבֵדִי עַד־אֲשַׁוֶּה / נְהָרוֹת מִדְּמֵי עֵינַי אֲדֻמּוֹת

לְתוּגָה שָׁחֲרוּ פָנִים אֲדֻמּוֹת / וְהִלְבִּינוּ קְוֻצּוֹת הָעֲלָמוֹת

לְדוֹד הָיָה כְּחוֹמַת אֵשׁ סְבִיבִי / וּבִנְפֹל בּוֹ לְבַד אֶמְצָא תְקוּמוֹת

אֲשֶׁר עֵינָיו פְּקֻחוֹת עַל־אֲהָבַי / וּמֵחֶטְאִי בְּיוֹם אֶשְׁגֶּה עֲצוּמוֹת

לְמוֹתוֹ נָֽקְטָה נַפְשִׁי בְּחַיַּי / וּמָוֶת בָּחֲרָה־לָּהּ מֵעֲצָמוֹת

וְחָלוּ כָל־מְגוּרַי בּוֹ וְאֵין־לִי / לְמוֹת בִּלְתּוֹ לְעַד פַּחַד וְאֵימוֹת

לְמִי אֶפְחַד בְּיוֹם פַּחַד וְאֶשְׁמַע / בְּהִתְיָעֵץ עֲתִידֵי תַעֲלֻמוֹת

לְרָחוֹק אֶקְרְאָה אֶחָיו לְנַחֵם / לְבָבוֹת עֲל־יְגוֹנוֹת הָעֲצוּמוֹת

לְשׁוֹן מִכְתָּב יְחַוְכֶם מַה־בְּלִבִּי / וְשִׂפְתוֹת אִגְּרוֹת אֵבֶל חֲתֻמוֹת

מְיֻדָּעַי זְמַם כָּל־אִישׁ תְּפִיקוּן / וְאֵיכָה נֶגְדְּכֶם אֶעְרֹךְ מְזִמּוֹת

וְכִזְכֹּר בַּעֲלֵי דֵעוֹת כְּבוֹדָם / אֲלֵיכֶם לַעֲרֹךְ אֹתָם וְדַמּוֹת

שְׂכַר מִבְחַן אֱנוֹשׁ הוֹדוֹת עֲלֵי־כֹל / בְּפִיּוֹת מִסְּפֹד וּנְהוֹת חֲסוּמוֹת

וּמַה־יּוֹעִיל קְצֹף עַל־הַזְּמָן אוֹ / שְׁפֹךְ חָרוֹן עֲלֵי יָמִים וְחֵמוֹת

וְעֵינְכֶם מֵֽרְאוֹת אֵינָהּ עֲצוּמָה / וְאָזְנֵיכֶם שְׁמֹעַ לֹא אֲטֻמוֹת

הֲכִי תֵבֵל בְּעֵינֵינוּ כְלַיִל / וְנַחְנוּ בָהּ וְיָמֵינוּ חֲלֹמוֹת

יְלָדַתְנוּ וּבֵינֵינוּ כְּאֵיבָה / זְמָן נָתַן לְבֵין כַּלָּה וְחָמוֹת

וְיַד־מָוֶת תְּנִיפֵנוּ לְשַׁחַת / כְּהָנִיף יַד־אֱנוֹשׁ חֶרְמֵשׁ בְּקָמוֹת

וְדַי כִּי נֶחֱלוּ־לוֹ כָל־יְקוּמִים / וּבָכוּ עַד־אֲשֶׁר בָּכוּ מְרוֹמוֹת

וְחָלוּ־לוֹ בְנוֹת עַיִשׁ וְגָחוּ / כְּאִלּוּ נוֹֽתְרוּ מֵעָשׁ יְתוֹמוֹת

וְשׁוֹלָל יַהֲלֹךְ חֶסֶד לְמוֹתוֹ / וְהַבִּינוֹת לְמִפְקָדוֹ עֲרֻמּוֹת

וְזִכְרוֹ עַד־מְאֹד גָּבַהּ בְּתֵבֵל / וְהֵן נִכְפַּל וְנִשָּׂא אַחֲרֵי מוֹת

וְחָלָה בָחֳלִי־מָוֶת וְאָכֵן / פְּעָלָיו לוֹ בְּעֵדֶן מַחֲלִימוֹת

לְמַעַן יִצְדְּקוּ הָאֹֽמְרִים כִּי / תְּמוּתַת בַּעֲלֵי־ישֶׁר תְּנוּמוֹת

כְּפִי גָדְלוֹ יְכוֹנֵן מַעֲלָתוֹ / אֲשֶׁר־לוֹ עֹז וְלֹבֵשׁ תַּעֲצֻמוֹת

וְנִחוּמִים כְּפִי שֹׁאַת לְבַבְכֶם / יְצַו לָכֶם וּמַשְׂכֻּרוֹת שְׁלֵמוֹת.