מִשְׁלֵי יַעֲקֹב בֶּן־אֶלְעָזָר / מִלֻּאוֹתָם הַשְׂכֵּל מוּסָר

שִׁירִים סַפִּירִים גִּזְרָתָם / שַׁעֲשׁוּעִים הֵם אֶל־כָּל־בָּשָׂר

דָּמוּ חִידוֹת אַךְ הֵם בִּינוֹת / אֶל־אִישׁ מַשְׂכִּיל לִרְאוֹתָם סָר

אַךְ בִּין יָבִין אֶת עִנְיָנָם / כִּי טוּב טַעַם בָּם לֹא הָחְסַר.

נוֹדֶה אֶת־יְיָ בּוֹרְאֵנוּ וּמַשְׂכִּילֵנוּ / מַלָּפֵנוּ מִבַּהֲמוֹת אֶרֶץ וּמֵעוֹף הַשָּׁמַיִם יְחַכְּמֵנוּ / אֲשֶׁר נָתַן לָאָדָם לְָשׁוֹן לְדַבֵּר כָּל־הַתְּבוּנוֹת וְהַמְּשָׁלִים אֲשֶׁר בָּן / וּפֻם מְמַלֵּל רַבְרְבָן / וַיַּחַץ אֶת הַלְּשׁוֹנוֹת עַל הַגּוֹיִם כְּפִי רְצוֹנוֹ / וְאֶל־עַם וָעָם כִּלְשׁוֹנוֹ / וַיִּבְחַר בִּלְשׁוֹן הַקֹּדֶשׁ לְשׁוֹן הָעִבְרִים / מִכָּל־לְשׁוֹנוֹת הַגּוֹיִם / וְהַמַּלְעִיג לִלְשׁוֹנֵנוּ הֲלֹא הוּא הַנִּלְעָג וְהַנִּבְזֶה / כִּי בְּלַעֲגֵי שָׂפָה וּבְלָשׁוֹן אַחֶרֶת יְדַבֵּר אֶל־הָעָם הַזֶּה.

נְאֻם יַעֲקֹב בֶּן־אֶלְעָזָר: סִבַּת סֵפֶר מְשָׁלַי / וְהִתְחַבְּרוּת מִלֻּאוֹת מִלַּי / כִּי חַכְמֵי הַיִּשְׁמְעֵאלִים / הָיוּ לְשׁוֹן הַקֹּדֶשׁ מַבְהִילִים / וַיִּתְגַּבְּרוּ וְעָלַי יִתְאַמְּרוּ: / וַיַּעֲנוּ בִגְאוֹנָם וַיֹּאמְרוּ: לִשְׂפָתֵינוּ יֵאוֹת כָּל הַמְּשָׁלִים לְהַחְבִּיר / אֲשֶׁר אָמְרוּ לִלְשׁוֹנֵנוּ נַגְּבִיר.

וַיִּשְׂאוּ מְשָׁלָם וַיֹּאמְרוּ:

הֲיֵשׁ לָשׁוֹן לְהַלֵּל אוֹ לְגַדֵּף / וְלָעִיר אַהֲבָה כִלְשׁוֹן עֲרָבִים

וּמִלְחָמוֹת וְקוֹרוֹת הַזְּמַנִּים / וְאֵי מִלִּים כְּמִלֵּינוּ עֲרֵבִים.

וַיְהַתְּלוּ בַיְּהוּדִים בְּרַהְבָּם / וַיִּהְיוּ מַלְעִיגִים בָּם / וַיְפַתּוּ גַּם־עַמִּי בְּפִיהֶם / וַיַּתְעוּם בְּכִזְבֵיהֶם / עַד כִּי הָיוּ אוֹמְרִים: / ״כֵּן בְּנֵי יִשְׁמְעֵאלִים דּוֹבְרִים / כִּי בִשְׂפָתָם כָּל־לְשׁוֹנוֹת יַדְבִּיקוּן / לְשׁוֹנָם יַחֲלִיקוּן / וְאֵין מִלִּים עֲרֵבִים / כִּלְשׁוֹן עֲרָבִים״. / וָאֲקַנֵּא עַל־כִּי חֵרְפוּנִי בְחֶרְפָּתָם / וְעַל אָמְרָם נָבְלָה שְׂפָתָם / וַיֹּאמְרוּ לִי חֲבֵרַי בַּאֲשֶׁר [אִתְּךָ] שְׂפָתֵנוּ אֱסֹף חֶרְפָּתֵנוּ / וָאֶשָּׂא מְשָׁלִי וָאֹמַר:

תְּלִינוּן לִי וְתֹאמְרוּ לִי / לְשׁוֹן קֹדֶשׁ הֲלֹא נֶחְשַׁל

וְהִיא תַרְנִין לְשׁוֹן אִלֵּם / וּבָהּ יָרוּץ וְלֹא יִכְשַׁל

לְהַלֵּל אוֹ לְגַדֵּף בָּהּ / וְחוּד חִידָה מְשֹׁל מָשָׁל.

אַף כִּי לְשׁוֹנֵנוּ פְּלָאִים יָרַד / וְלֹא נִשְׁאַר כִּי אִם פֶּלֶט וְשָׂרָד / אֲשֶׁר הִשְׁאִיר הַבָּרָד / לְכוּ חֲבוֹלֵי עֲדַת יִשְׁמְעֵאלִים / וְאַחְבִּירָה עֲלֵיכֶם בְּמִלִּים / וְלָמָּה תוֹצִיאוּ עַל־לְשׁוֹנֵנוּ דִבָּה / וּדְעוּ וּרְאוּ כִּי רָעַתְכֶם רַבָּה / וּמַה־לְּךָ כִּי נִזְעַקְתָּ עִמִּי / וּמָה־אַתָּה חָסֵר עַמִּי / דַּבֵּר כְּכָל־אַוַּת נַפְשְׁךָ בְּמִלַּי / דַּע כָּל־מַחְסוֹרְךָ עָלַי / וְרוּץ בָּם וְלֹא תִכָּשֵׁל / וְחוּד חִידָה מְשֹׁל מָשָׁל / וּקְרָא סֵפֶר מְשָׁלַי הַמְּחֻבָּר / וְתֵדַע וְתַשְׂכֵּל מִן־מְצֹא דָבָר / וּשְׁמִי בִמְשָׁלַי לֹא כִנִּיתִי / וַהֲסִבּוֹתִיו לִלְמוּאֵל בֶּן־אִיתִיאֵל וְאוֹתוֹ שִׁנִּיתִי / כִּי כֵן חֻקּוֹת יִשְׁמְעֵאלִים / לְהָסֵב שְׁמוֹתָם בִּמְשָׁלִים / אַךְ עַתָּה אַגִּידֶנּוּ כִּי אֲנִי יַעֲקֹב בֶּן־אֶלְעָזָר / לְמַעַן אֲשֶׁר לֹא יִקְרַב אִישׁ זָר / וְהַגּוֹנֵב מִמֶּנּוּ יְהֵא נִכְרָת וְנִצְמָת / וְהַזָּר הַקָּרֵב יוּמָת / זֶה מִשְׁפַּט שְׁבוּעַת מְשָׁלַי וְזֹאת הַחֻקָּה / כִּי כָל־הַגֹּנֵב מִמֶּנָּה כָּמוֹהָ נִקָּה / אַךְ לֹא לִגְנֹב כִּי לַכְּסִילִים וְלָאִישׁ רֹעַ מִכְלָל נִבְזֶה / כִּי מִי יָחוּשׁ חוּץ מִמֶּנִּי לָדַעַת וְלָבוּר אֶת־כָּל־זֶה / וְרִאשׁוֹן מְשָׁלַי שֵׂכֶל קְרָאתִיהוּ / בִּקַּשְׁתִּיו וְלֹא מְצָאתִיהוּ.

וָאֶשָּׂא מְשָׁלִי וָאֹמַר:

מָשַׁל שֵׂכֶל עֲלֵי אַהַב / עֲשִׂיתִיו בַּעֲבוּר יֶעְרָב

קְרָאֵהוּ וְהִתְעַנֵּג / עֲלֵי טוּב נָעֳמוֹ כִּי רָב!