סימן: יצקח, א"ב

יד

         יוֹם עֵירֹם אֶעֱמֹד מִצִּדְקָתִי –

         צִדְקְךָ מַלְבּוּשִׁי תְנָה וּכְסוּתִי;

         חוֹבִי כִי יַעֲנֶה־בִּי וְאַשְׁמָתִי,

         קָדֹש, אַל־תִּדְרשׁ לַעֲלֻמָּתִי:

5        מָה אָנִי, מַה־פִּשְׁעִי מַה חַטָּאתִי?

         יוֹם אֵלַי תִקְרָא מֵאַדְמָתִי,

         יוֹם בּוֹ אֱסֹף רוּחִי עִם־גּוּפָתִי,

         יוֹם גִּשְׁתְּךָ לַחֲקֹר לִפְעֻלָּתִי,

         יוֹם דִּין מִמַּעֲשִׂים מְאֹד דַּלּוֹתִי,

10       הֵן אִם־הֲרֵעֹתִי – וַהֲזִכּוֹתִי!

         וְאֵיךְ בְּמִשְׁקָל יַעֲלֶה הֶבֶל נִדָּף,

         זִכְרוֹנוֹ אֵפֶר וְעֵשֶׂב נִשְׁדָּף?

         חָצִיר אֵיךְ נִשְׁפָּט וְקַשׁ אֵיךְ נִרְדָּף?

         טָהֹר, אִם־תִּקְרָא מֹץ קַל נֶהְדָּף,

15       יַעֲנֶה: “מָה אֲשִׁיבֶךָּ? הֵן קַלֹּתִי!”

         כְּבַד עֲוֹן נִחַם בְּשׁוּבוֹ, שָׁקַל

         לְמוּל חַסְדְּךָ חֶטְאוֹ – מְצָאוֹ נָקָל;

         נוֹרָא, אֵיךְ־תַּעֲלֶה בְמֹאזְנֵי מִשְׁקָל

         סָכָל, עַל־פִּשְׁעוֹ וְנָתִיב קִלְקָל?

20       עָרְכֵנִי בְּמֹאזְנֵי שֹׁגֶה וּפֶתִי!

         צוּר, לְנֶפֶשׁ תֵּחַר וּלְלֵב יֵחַם

         קָרֵב, וּתְלַבֵּן זָדוֹן כְּפֶחָם,

         שָׁב וּמוֹדֶה תִרְצֶה וְעֹזֵב וְנִחָם,

         כְּמַאֲמָרְךָ: “מוֹדֶה וְעֹזֵב יְרֻחָם!”

25       אָמְנָם חָטָאתִי וְיָשָר הֶעֱוֵיתִי…