פֹּעַל אָדָם יוֹם יוֹם לַחְקֹר הוֹאַלְתִּי
אִם יִכּוֹן, אִם יִשְׁוֶה אֶל דִּבְרֵי פִיהוּ:
מוֹצָאָיו, מוֹבָאָיו, מִלָּיו שָׁקַלְתִּי,
מָצָאתִי קַלָּסָה עַל מוּם אָחִיהוּ.
וּבְשָׁמְעִי פִי גֵאִים, מֵהֶם נִבְהַלְתִּי
כִּי עַל גַּבְהוּת לֵבָב דִּבָּה הוֹצִיאוּ;
וּבְשָׁמְעִי נִיב זֵדִים כִּמְעַט נוֹאַלְתִּי,
כִּי קִיקָלוֹן עַל זֵד יָהִיר הֵקִיאוּ.
עַל פִּסֵּחַ יִשְׂחַק גֶּבֶר צֹלֵעַ;
עִוֵּר עַל אִישׁ עֵינָיו מִשֵּׂיבוֹ קָמוּ;
זוֹלֵל עַל הָאֹהֵב בָּשָׂר וָיָיִן.
מִשְׁלֵי חַכְמֵי תֵבֵל הִנֵּה מָה רָמוּ:
גַּלּוּת חֶרְפַּת רֵעוֹ כָּל אִישׁ יֹדֵעַ,
אַךְ אִישׁ יַפִיר מוּמוֹ בָּאָרֶץ אָיִן.