מַרְבִּים דִּבְרֵי פֶה לִבָּם מַקְשִׁים / וּבְתוֹכָם יָשִׂימוּ אֹרְבִים מוֹקְשִׁים

עֵז מְגַדֶּלֶת עִזֶּיהָ בָּעֵדֶר / וּסְבִיבָהּ בֵּית חֹמָה וְגָדֵר / וְעֵת אֲשֶׁר יַשְׁכִּים הָאָדָם לַחֲרֹשׁ / עֵז אַחַר כָּל יָרוֹק יִדְרֹשׁ / וְלָתוּר בֶּהָרִים מִרְעֶה / וַתֹּאמֶר לַתַּיִשׁ: דְּעֶה / כִּי רָחוֹק מִזֶּה מַרְעִיתִי / לֹא אָשׁוּב עַד מִלֵּאתִי / בִּטְנִי וּקְרָבַי הָרָזִים / לְהַסְפִּיק חָלָב לָעִזִּים / סְגֹר דְּלָתֶיךָ בַעֲדֶיךָ וַחֲבִי / לֹא תִפָּרֵד עַד עֵת שׁוּבִי / וְלִפְתֹּחַ אַל תִּשְׁלַח יָדֶיךָ / עַד אֲשֶׁר תִּרְאֵנִי לְפָנֶיךָ / אֲנִי אַעֲבִיר כָּל טוּבִי עַל פָּנֶיךָ / וַיַּעַן הַתַּיִשׁ לֵאמֹר / נֵלְכָה יַחַד נִרְעֶה נִשְׁמֹר / וַיֵּלְכוּ יַחַד גַּם שְׁנֵיהֶם / וּלְעֵז קְטַנָּה אַחֲרֵיהֶם / אָמְרוּ לִסְגֹּר הַדֶּלֶת / וְהִיא אַחֲרֵיהֶם נֹעֶלֶת / וְסֻגַּר הַבַּיִת מִבּוֹא / וְהַזְּאֵב אוֹרֵב בְּמַחֲבֹא / אֲשֶׁר לְהַשְׁחִית כּוֹנָן / וּבְכִלְיוֹתָיו יִשְׁתּוֹנָן / לָבֹא בָעֵדֶר וְלַעֲרֹף / וְלָצוּד צַיִד וְלִטְרֹף / וַיֵּדַע כִּי אֵי שָׁם הָעֵז וְהַתַּיִשׁ / וְלֹא אֲדֹנֵיהֶם הָאִישׁ / וַיִּתְנַכֵּר וּבְפִיו לוֹעֵז / כַּאֲשֶׁר הָיְתָה אֵם הָעֵז / וַיֹּאמַר: פִּתְחִי לִי כִּי רַב חֲלָבִי / תּוֹךְ שָׁדַי אֲשֶׁר לָךְ אָבִיא / נִלְאֵיתִי כַּלְכֵּל וְלֹא אוּכָל / לְהָבִיא בָהֶם רֹב מַאֲכָל / וַתַּעַן הָעֵז: הַקּוֹל קוֹל אִמִּי / אַךְ יָרֵאתִי כִּי לֹא עַמִּי / עֹמֵד אַחַר כָּתְלֵנוּ / בַּמִּדְבָּר אֹרֵב לָנוּ / לֹא אֶפְתַּח עַד הָעָרֶב / מִפְּנֵי הַזְּאֵב הָאֹרֵב / פֶּן יִתְחַלֵּף לֹא־עַמִּי בְאִמִּי / וּזְאֵב חֶרְמִי בְּאַב שְׁלוֹמִי / וְאַל יֹאמְרוּ מְתֵי סוֹדִי / הַנְּבוּאָה הֵחֵלָּה בַעֲדִי / וְגָר זְאֵב עִם כֶּבֶשׂ וְנָמֵר עִם גְּדִי / וַיַּרְא הַזְּאֵב כִּי בִדְבָרִים לֹא יָכֹל לָהּ / וַיֹּאמַר: אִם לֹא תִפְתְּחִי אוֹרִידֵךְ בְּיָגוֹן שְׁאוֹלָה / וּלְבַעֲבוּר כִּי לִבֵּךְ מָלֵא חָמָס / אֶפְרֹץ גְּדֵרַיִךְ וְתִהְיִי לְמִרְמָס / וְאָכִין בַּדֶּלֶת בִּלְהָטַי מַפְתֵּחַ / וַתֹּאמֶר הָעֵז: אַל יִתְהַלֵּל חֹגֵר כִּמְפַתֵּחַ / לֹא בְּפִתּוּי וְלֹא בְּרֹגֶז וְלֹא בְּתֹאֲנָה / אֶצְלִי לֹא תִכָּנֵס הֵנָּה.

וְהַמָּשָׁל בָּאֲנָשִׁים / אֲשֶׁר לִבָּם וְדִבְרֵיהֶם קָשִׁים / עַם מֶרִי בָּנִים כֶּחָשִׁים / לוֹבְשֵׁי אַדֶּרֶת שֵׂעָר / לְמַעַן כַּחֵשׁ בַּשַּׁעַר / בְּתוֹךְ מִרְמָה שִׁבְתּוֹ / אִישׁ אִישׁ מִמְּלַאכְתּוֹ / וְעֵת צָרָה יִתְנַכֵּרוּ / בְּלֵב וָלֵב יְדַבֵּרוּ / כִּי אֲשֶׁר יַרְאֶה אַהֲבָה בְעִנְיָנוֹ / הֲלֹא שֶׁקֶר בִּימִינוֹ / וְאִם לֹא יְהִי הַגָּר בֵּינֵיהֶם כְּמוֹהֶם / לִגְנֹב לַמְגַנְּבִים לִבְבֵיהֶם / וּלְהַעֲרִים הַמַּעֲרִים בְּתַרְמִית לִבּוֹ / וּלְהָכִין לוֹ אָרְבּוֹ בְּקִרְבּוֹ / וְלַחְשֹׁב עָרְמוֹת כְּנֶגֶד עָרְמוֹת / וּמְזִמּוֹת כְּנֶגֶד מְזִמּוֹת / לֹא יוּכַל בֵּינֵיהֶם לְהִתְפַּרְנֵס / כִּי אִם בְּמַעֲשֵׂה נֵס / בַּאֲשֶׁר הָרָעִים נָחוּ / וְהַטּוֹבִים שָׁחוּ / וְהַשְּׁקָרִים עָמָדוּ / וְהָאֱמוּנוֹת מָעָדוּ.

וָאֶשָּׂא מְשָׁלִי וָאֹמַר:

בֵּית בֶּרֶכְיָה מֵאִישׁ מִרְמָה / יִתְפָּרְדוּ לֹא יִתְלַכָּדוּ

כַּאְשֶׁר שִׁבְעָה כוֹכָבִים אֶל / עֵת עוֹף קוֹרֵא לֹא נִצְמָדוּ.