לוגו
משל כד: צְפַרְדְּעִים, אִילָן וְנָחָשׁ
פרק:
מיקום ביצירה:
0%
X
F
U

הַשּׁוֹכֵן לָבֶטַח בְּעוֹלָמוֹ / לֹא יִקְנֶה אָדוֹן לְעַצְמוֹ


צְפַרְדְּעִים נוֹעֲצוּ בֵינֵיהֶם / לְהַמְלִיךְ מֶלֶךְ עֲלֵיהֶם / וַיָּרִיבוּ עַל דְּבַר הַמְּלוּכָה / זֶה אוֹמֵר כָּכָה וְזֶה אוֹמֵר כָּכָה / עַד אֲשֶׁר הִתְאַחֲדָה עֲצָתָם / לִהְיוֹת מֶלֶךְ בֵּינוֹתָם / עֵץ שָׁתוּל עַל פַּלְגֵּי מָיִם / אֲשֶׁר גָּבְהוֹ עַד לַשָּׁמַיִם / וַיֹּאמְרוּ אֶל הָעֵץ: מָלְכָה עָלֵינוּ / שִׂמְלָה לְךָ קָצִין תִּהְיֶה לָנוּ / וַיַּחֲרִישׁ וְלֹא עָנָה אוֹתָם דָּבָר / וְקוֹל הֶהָמוֹן מֵהֶם גָּבָר / וַיֹּאמְרוּ פֶה אֶחָד כֻּלָּם / יְחִי אֲדֹנֵנוּ הַמֶּלֶךְ לְעוֹלָם / וַיֵּלְכוּ לִמְחוֹז חֶפְצָם / וְגִיל לִבָּם מְאֹד עָצַם / מִיּוֹם אֲשֶׁר הָמְלַךְ הַמֶּלֶךְ, הוּחַל / לִרְאוֹת בְּאִבֵּי הַנָּחַל / זֹאת בָּאָה אֶל הַמֶּלֶךְ וְזֹאת שָׁבָה / אַךְ אֵין שִׂנְאָה וְלֹא אַהֲבָה / בָּעֵת הַהִיא אֲשֶׁר קָרְאוּ מַלְכָּם / לַמּוֹעֵד שָׂמוּ עָדָיו דַּרְכָּם / לָשֶׁבֶת תַּחַת צִלּוֹ / יִכְרְעוּ אַף יִשְׁתַּחֲווּ לוֹ / וַיֹּאמְרוּ: אֲדֹנֵנוּ הַמֶּלֶךְ, בָּאנוּ אֵלֶיךָ / אֶל מִי דָּמִיתָ בְגָדְלֶךָ / נַפְשֵׁנוּ אֶל אִמְרָתְךָ נִכְסְפָה / אֶל טוּב עֲבָדֶיךָ מִמְּעוֹן קָדְשְׁךָ הַשְׁקִיפָה / כִּי תַנְחֵם וְתוֹרֵם דֶּרֶךְ הַטּוֹבָה / עַל כָּל פְּשָׁעִים תְּכַסֶּה אַהֲבָה / וַיִּקְרְאוּ אֵלָיו בְּקוֹל גָּדוֹל וְאֵין קוֹל וְאֵין עוֹנֶה / וַתֹּאמַרְנָה כֻּלָּם הִנֵּה / אִם לֹא תַגִּיד לָנוּ אֶת שְׁמֶךָ / וְסָרוּ הַצְּפַרְדְּעִים מִמֶּךָ / ויְהִי כִרְאוֹתָם כִּי לֹא הִגִּיד סוֹדוֹ / וַיָּמִירוּ בְּקָלוֹן אֶת כְּבוֹדוֹ / וַיִּוָּעֲצוּ לְהִפָּרֵד מֵעָלָיו / וַיֹּאמְרוּ: לֹא טוֹב עֵצָיו וְלֹא טוֹב עָלָיו / כִּי אִם יִהְיֶה בָאָרֶץ רָעָה / לֹא תָמוּשׁ הַיָּתֵד הַתְּקוּעָה / מִמֶּנּוּ לֹא בְכִי וְלֹא שְׂחֹק / עַל כֵּן עָבְרוּ תוֹרוֹת חָלְפוּ חֹק / וְהוּא נְגוּעַ אֱלֹהִים מֻכֶּה בְּסַנְוֵרִים / וְנֶאֶסְפוּ שָׁם כָּל הָעֲדָרִים / לְקָרְאוֹ אַלּוֹן בָּכוּת / כִּי לֹא לוֹ נָאֶה הוֹד מַלְכוּת / בַּאֲשֶׁר לִבּוֹ כַּחַלָּמִישׁ / מִמְּקוֹמוֹ לֹא יָמִישׁ / נִתְאַמֵּת הַמָּשָׁל שֶׁהֶהָמוֹן בּוֹטֶה / כָּל־אָרֹךְ שׁוֹטֶה / וְעַמֵּנוּ מִיּוֹם הֻמְלַךְ זֶה עָלֵינוּ הָיוּ אֻמָּה שְׁפָלָה / מַרְאֵיהֶם רַע כַּאֲשֶׁר בַּתְּחִלָּה / וַיִּרְמְסוּ אוֹתוֹ בְּרַגְלֵיהֶם / וַיִּמְאָסוּהוּ מִמְּלֹךְ עֲלֵיהֶם / וַיִּהְיוּ עָלָיו מְקִיאוֹת / וַיְשִׂימוּהוּ לְמַחֲרָאוֹת / וַתֹּאמֶר הָאַחַת: הִנֵּה רָאִיתִי לָנוּ רֹאשׁ / נַעֲזֹב נַעֲצוּץ נִבְחַר בְּרוֹשׁ / וַתֹּאמַרְנָה: לֹא נַמְלִיךְ עָלֵינוּ קָנֶה רָצוּץ / לֹא הַבְּרוֹשׁ וְלֹא הַנַּעֲצוּץ / לֹא נַבִּיט אֶל גֹּבַהּ קוֹמָתוֹ וְאֶל מַרְאֵהוּ / אֵין נְשָׁמָה בְּאַפּוֹ כִּי בַמֶּה נֶחְשָׁב הוּא / נַמְלִיךְ מֶלֶךְ נוֹרָא וְאָיוֹם / חַי חַי כָּמֹנוּ הַיּוֹם / אֲשֶׁר יִלָּחֵם מִלְחֲמוֹתֵינוּ / פֶּה אֶל פֶּה יְדַבֵּר לָנוּ / וַיַּמְלִיכוּ עֲלֵיהֶם אֶת הַנָּחָשׁ / אֲשֶׁר לֹא יִשְׁמַע לְקוֹל לָחַשׁ / וְאָרַח עִמָּהֶם לְחֶבְרָה / וְחֶבְרָתוֹ עֲלֵיהֶם יָשְׁרָה / צְפַרְדֵּעַ וְנָחָשׁ הָלְכוּ שְׁיָרוֹת / שְׁתֵּי כְתֵפוֹת חֹבְרוֹת / וְרוּחַ לֹא תָבֹא בֵינֵיהֶם / עַד יוֹם אֶחָד אֲשֶׁר עִמָּהֶם / עַל פְּנֵי הַמַּיִם צָף / וְהָיָה כִּי יִרְעַב וְהִתְקַצָּף / וַיֹּאמֶר לָהֶם: תִּהְיוּ מִיָּדִי נְכֵאִים / הֲלִדְרֹשׁ אֹתִי אַתֶּם בָּאִים / וַיַּךְ בָּהֶם מַכָּה רַבָּה / וַיּוֹצִיא עֲלֵיהֶם דִּבָּה / וַיּוֹסֶף עוֹד לִשְׂנֹא אוֹתָם / וַיֹּאכַל בְּשָׂרָם וְעַצְמוֹתָם / וַיְכַלֶּה כָּל אֲשֶׁר בַּיְאֹרִים / וַיִּצְבֹּר אוֹתָם חֳמָרִים חֳמָרִים / וַיֹּאכַל עֶשֶׂר יָדוֹת / מִן הַבָּתִים וּמִן הַשָּׂדוֹת / וְטוֹב לָהֶם לִהְיוֹת בְּלִי שֹׁטֵר וּמוֹשֵׁל / מִלְּהַרְבּוֹת בְּמַחֲנֵיהֶם כֹּשֵׁל.


וְהַמָּשָׁל בִּבְנֵי אָדָם אֲשֶׁר יֵשׁ לְאֵל יָדָם / לָשֶׁבֶת שְׁלֵוִים בְּבֵיתָם / וְיִוָּעֲצוּ בְתַחְבֻּלּוֹתָם / וּבְאָרְבָּם אֲשֶׁר בְּקִרְבָּם / וְדָבָר רַע יִצְמַח בָּם / לִהְיוֹת מִשְּׁלוֹמָם נוֹסְעִים / כַּאֲשֶׁר תַּעֲשֶׂינָה הַצְּפַרְדְּעִים / וְאָמַר הֶחָכָם: נִדְמֶה הַמֶּלֶךְ לָאֵשׁ / אֲשֶׁר לִבְּךָ מִמֶּנּו מִתְיָאֵשׁ / תִּצְטָרֵךְ לוֹ בְּסוֹפֶךָ / וְאִם תִּקְרַב לוֹ יִשְׂרְפֶךָ.