קרובה לראש השנה. סימן: א״ב וחתימה: שמעון

אָתִיתִי לְחַנֶּנְךָ בְּלֵב קָרוּעַ וּמֻרְתָּח / בַּקֵּשׁ רַחֲמִים כְּעָנִי בַפֶּתַח גַּלְגַּל רַחֲמֶיךָ וְדִין אַל תִּמְתַּח / אֲדֹנָי שְׂפָתַי תִּפְתָּח.

דָּבָר אֵין בְּפִי וּבִלְשׁוֹנִי מִלָּה / הֵן יְיָ יָדַעְתָּ כֻלָּהּ וּמִמַּעֲמַקֵּי הַלֵּב לְפָנֶיךָ אוֹחִילָה / אֶחֱסֶה בְסֵתֶר כְּנָפֶיךָ סֶּלָה.

זַלְעָפָה וּפַלָּצוּת אֲחָזוּנִי בְּמוֹרָא / חַלּוֹת פְּנֵי נוֹרָא בְּנֶפֶשׁ יְקָרָה טוּב טַעַם וָדַעַת קָטֹנְתִּי לְחַסְּרָה / עַל כֵּן זָחַלְתִּי וָאִירָא.

יָגַעְתִּי בְאַנְחָתִי אֵיךְ לַעֲמֹד לְפָנֶיךָ / כִּי אֵין מַעֲשִׂים לִזְכּוֹת בְּעֵינֶיךָ לְחַלּוֹתְךָ שְׁלָחוּנִי מַקְהֵלוֹת הֲמוֹנֶיךָ / תָּכִין לִבָּם תַּקְשִׁיב אָזְנֶךָ.

מָה אֲנִי וּמֶה חַיַּי תּוֹלֵעָה וְרִמָּה / נִבְעָר מִדַּעַת בְּאֶפֶס מְזִמָּה סָמַכְתִּי יְתֵדוֹתַי בְּסֵפֶר הַחָכְמָה / מַעֲנֶה רַךְ יָשִׁיב חֵמָה.

עֻזִּי אֵלֶיךָ אֶשְׁמְרָה לְסַעֲדִי / פֵּתַח דְּבָרֶיךָ הָאֵר לְהַגִּידִי צַדְּקֵנִי וְאַמְּצֵנִי וְתֵן לְאֵל יָדִי / כִּי אֱלֹהִים מִשְׂגַּבִּי אֱלֹהַי חַסְדִּי.

קְהָלֶיךָ עוֹמְדִים לְבַקֵּשׁ מְחִילָתֶךָ / רַחֲמֶיךָ יִכָּמְרוּ לְרַחֲמָם בְּחֶמְלָתֶךָ שׁוֹפְכִים לֵב כַּמַּיִם לְעֻמָּתֶךָ / וְאַתָּה תִּשְׁמַע הַשָּׁמַיִם מְכוֹן שִׁבְתֶּךָ.

תְּחַזֵּק לְעַמְּךָ יָדָם הָרָפָה / שְׁלַח מֵאִתְּךָ עֵזֶר וּתְרוּפָה נָעָמְךָ יַשִּׂיגוּ לְחַזֵּק וּלְתָקְפָה / כָּל אִמְרַת אֱלוֹהַּ צְרוּפָה.