הַחֲזֵק יָדַים רָפוֹת / אִם יָדָיו עִמּוֹ עָפוֹת

גָּמָל עִם שִׁפְעַת גְּמַלִּים בְּבֹאוֹ / כָּרַע רָבַץ תַּחַת מַשָּׂאוֹ / וּלְבַעֲבוּר אֲשֶׁר לֹא הִתְחַזֵּק לָקוּם, מֵעָלָיו כֹּל יָרוּמוּ / וְיַסְתִּירוּ מִמֶּנּוּ פָנֵימוֹ וְעֵינֵיהֶם הֶעְלִימוּ / וַיִּקְרָא לָהֶם: שְׁמָעוּנִי עַמִּי / הֲלֹא עַצְְכֶם וּבְשַׂרְכֶם אֲנִי וְשִׁמְכֶם כִּשְׁמִי / לָמָּה יֹאמְרוּ הָרֹכְבִים וְעֹבְרֵי הַדֶּרֶךְ בְּרֵגְלֵיהֶם / הַמּוּרָם מֵהֶם כַּיּוֹצֵא בָהֶם / וּבְנָפְלוֹ כָּל אֶחָד עָלָה / כַּאֲשֶׁר הֹנָה מִן הַמְסִלָּה / רְאוּ כִּי אֵין חֵטְא בְּכָל יְגִיעִי / חָנֻּנִּי חָנֻּנִי אַתֶּם רֵעָי / עַד אֲשֶׁר תְּקִימוּנִי אַל תִּסָּעוּ / אַל נָא אַחַי תָּרֵעוּ / הֵן לִבִּי עִמָּכֶם שָׁלֵם / אֵיךְ תּוּכְלוּ לְהִתְעַלֵּם / וַיַּעֲנוּ לוֹ: אִם יָדֶיךָ וְרַגְלֶיךָ תֶּחֱזַקְנָה לַהֲקִימְךָ / גַּם אֲנַחְנוּ עָזֹב נַעֲזֹב עִמְּךָ / וְאִם בְּשִׁפְלוּת תְּנַהֵג בַּעֲצַלְתַּיִם / וּבִכְבֵדֻת כְּיָגֵעַ וּרְפֵה יָדַיִם / אֶל עֶזְרָתֵנוּ הֶבֶל צִפִּיתָ / בַּאֲשֶׁר לַעֲזֹר אֵלֶיךָ הִתְרַפִּיתָ.

וְהַמָּשָׁל לְהָבִין וּלְהוֹרוֹת / לְחַזֵּק יָדַיִם רָפוֹת אֲשֶׁר מִיֶּשַׁע קְצָרוֹת / בִּרְאוֹתְךָ דָּל וְאֵין יָדוֹ מַשֶּׂגֶת / וּלְשַׁחֵר פָּנֶיךָ נַפְשׁוֹ מָרָה וְדֹאֶגֶת / בַּאֲשֶׁר תַּם לָרִיק כֹּחוֹ / וְאָבַד תּוֹחַלְתּוֹ וְנִצְחוֹ / וְאִם תִּרְאֶה כִּי תִגְבַּר עָלָיו הַדַּלּוּת / בְּעַצְלוּת יָדַיִם וּבְשִׁפְלוּת / וּבְנֵי בֵיתוֹ בַעֲצַלְתַּיִם רָעֲבוּ וְרָשׁוּ / הֵם כָּל חֲבֵרָיו יֵבֹשׁוּ / הַשֹּׁמְעִים צַעֲקָתוֹ / וּבְקָהָל תִּגָּלֶה רָעָתוֹ / כִּי לֹא אִמֵּץ יָדָיו לֶאֱסֹף כְּמוֹהֶם / וּמֵצַח אִשָּׁה זוֹנָה לוֹ בְּשָׁאֳלוֹ מֵהֶם / וְזֹאת תּוֹרַת הָאָשֵׁם / בֶּן נָבָל גַּם בֶּן בְּלִי שֵׁם / וְאָמַר הֶחָכָם אֲשֶׁר בְּמַעֲלוֹת הַשֵּׂכֶל עָלָה / טָעַמְתִּי כָּל מַר וְאֵין מַר כְּטַעַם הַשְּׁאֵלָה.