אַל תִּתְהַלֵּל בְּגַאֲוָתֶךָ / כִּי לֹא תֵדַע אַחֲרִיתֶךָ

פָּרָשׁ נוֹרָא וְאָיֹם הָיָה / וְנוֹדַע שְׁמוֹ בְּכָל קִרְיָה / וַהֲמוֹן עָם יֵחָתוּ לְקוֹלוֹ / וְרֹזְנִים מִשְׂחָק לוֹ / מֵרָחֹק יָרִיחַ מִלְחָמָה וְיִירְאוּ מִגֶּשֶׁת אֵלָיו / בַּחֲגוֹרָתוֹ אֲשֶׁר בְּמָתְנָיו וּבְנַעֲלוֹ אֲשֶׁר בְּרַגְלָיו / וַתְּהִי לוֹ לִישׁוּעָה / רַעַם שָׂרִים וּתְרוּעָה / כִּי בְשָׁמְעוֹ אֶת קוֹל צְעָדָה / בְּרָאשֵׁי הַבְּכָאִים יָדוֹ הָדָה / לִשְׁפֹּךְ דַּם רְהָבִים בַּיַּבֶּשֶׁת / לֹא יַבְרִיחֶנּוּ בֶן קָשֶׁת / וּמִצְחַת נְחֹשֶׁת עַל מִצְחוֹ / וּמָשַׁךְ אַבִּירִים בְּכֹחוֹ / וַיִּשְׂחַק לְשֹׁד וּלְכָפָן / קוֹל שׁוֹט וְקוֹל רַעַשׁ אוֹפָן / לְנַתֵּק וּלְשַׁבֵּר שִׁרְיוֹנִים יְמִינוֹ נֶאְדֶּרֶת / כַּאֲשֶׁר יִנָּתֵק פְּתִיל הַנְּעֹרֶת / וְיָדָיו בַּעֲדָיו יָרִיבוּ / פַּרְסוֹת סוּסָיו כַּצַּר נֶחְשָׁבוּ / וַיֵּצֵא שְׁמוֹ עַד לְמֵרָחֹק / רֹדֵף וּמָשִּׂיג הָיָה לוֹ לְחֹק / עַל כִּרְאוֹת לֹחֲמָיו כִּי בְרוֹשָׁיו הָרְעָלוּ / בָּאוּ בֶּעָבִים וּבַכֵּפִים עָלוּ / כֻּלָּם כְּאֶחָד מִפָּנָיו נָסִים / אֵלֶּה בָרֶכֶב וְאֵלֶּה בַסּוּסִים / וַתְּהִי עַל שִׁכְמוֹ מִן הַפָּרָשִׁים הַמִּשְׂרָה / וַיִּתְנוּ עָלָיו הוֹד הַגְּבוּרָה / וַיִּפְגַּע בְּסֹחֵר כָּבֵד בְּכֶסֶף וּבְזָהָב / וַיַּעַשׂ לוֹ מַטְעַמִּים כַּאֲשֶׁר אָהָב / גַּם בְּלִסְטִים מְזֻיָּן שָׁלַח יָדוֹ / וַיַּהֲפֹךְ לָאָרֶץ הוֹדוֹ / וּבְעוֹד כְּבוֹדוֹ חָדָשׁ עִמּוֹ / הַזְּמָן שָׁלַח יָדוֹ בִשְׁלוֹמוֹ / וַיִּפְרֹשׂ פַּח לִפְעָמָיו / גֶּבֶר לֹא יִצְלַח בְּיָמָיו / וּבְכָל עֵת אֲשֶׁר בַּקְרָב בָּא / אוֹ נִשְׁבָּר אוֹ נִשְׁבָּה / וְאִם יָרוּץ יִכָּשֵׁל בַּהֲלִיכָתוֹ / אֵין כֵּהֶה לְשִׁבְרוֹ נַחְלָה מַכָּתוֹ / בַּאֲשֶׁר לוֹ חַלְחָלָה בְּמָתְנַיִם / וְלֵב נָמֵס וּפִיק בִּרְכַּיִם / וְקֹרָא לוֹ שֵׁם חָדָשׁ חַלָּשׁ וְלֹא גִּבּוֹר / קָנֶה רָצוּץ לֹא יִשְׁבּוֹר / וַיְגֹרֵהוּ בְחֶרְמוֹ כָּל שָׁפָל / וּמִמַּעֲלַת גְּבוּרָתוֹ נָפָל / וַיְהִי כְנָפְלוֹ וְאֵין מֵקִים / וְשׁוֹקָיו רֻתְּקוּ בַזִּקִּים / כִּי עָלָה מֵפִיץ עַל פָּנָיו / וַיְעַצֵּם אֶת עֵינָיו / וְיָדָיו מִקֶּשֶׁת אֻסָּרוּ / וְהִבִּיטוּ אֵלָיו אֶת אֲשֶׁר דָּקָרוּ / גַּם הַסֹּחֵר וְהַגַּזְלָן נִצְמְדוּ יַחַד / וּמִמְּכוֹן שִׁבְתָּם חָזַר וְנֵעוֹר כָּל אֶחָד / וַיְהִי תָמִיד הֹלֵךְ וּבֹרֵחַ / וַיִּזְעֲקוּ אַחֲרָיו: עֲלֵה קֵרֵחַ / וְלוּ כִּי נֻתַּן כֹּפֶר נַפְשׁוֹ / יָסִירוּ מֵעָלָיו רֹאשׁוֹ / וּמִן הַיּוֹם הַהוּא הָלַךְ אֲחֹרַנִּית / מִפְּנֵי לַהַב חֶרֶב וּבְרַק חֲנִית / וְתַחַת אֲשֶׁר עַל אֶחָיו עַד כֹּה עָצַם וְגָבַר / לֹא יֵצֵא בַּצָּבָא וְלֹא יַעֲבֹר עָלָיו לְכָל דָּבָר / וַעֲבָדָיו מִקֶּדֶם יְכַבֵּד וְיַעֲבוֹד / וְיִשְׂבַּע קָלוֹן מִכָּבוֹד / וַיִּשָּׁבַע לְעֵינֵי כָל מִשְׁפַּחְתּוֹ / לִשְׂרֹף אֶת כָּל כְּלֵי מִלְחַמְתּוֹ / וְלֹא יֵצֵא עוֹד לַמִּלְחָמָה / וַיַּגְדֵּל הַמְּדוּרָה לְהַשְׁלִיךְ כֵּלָיו שָׁמָּה / כִּי אָמַר: אֶשְׂרֹף וְאַשְׁמִידָה / סוּס דֹּהֵר וּמֶרְכָּבָה מְרַקֵּדָה / שִׁרְיוֹן וְכוֹבַע עִמָּם יִמַּח / מָגֵן אִם יֵרָאֶה וָרֹמַח / חַרְבּוֹ תָקַע בְּבֶטֶן סוּסוֹ אֲשֶׁר אָהַב / וַיָּבֹא גַּם הַנִּצָּב אַחַר הַלַּהַב / וְאַחֲרֵי כֵן הַחֶרֶב שִׁבֵּר / וַיַּעַשׂ לְכֵלָיו כַּאֲשֶׁר דִּבֵּר / אִם מֵהֶם כָּל הַמַּחֲנוֹת הֶחֱרִיד / לֹא הִשְׁאִיר מֵהֶם פָּלִיט וְשָׂרִיד / וּלְמָחֳרָתוֹ זָכַר אֶת שׁוֹפָרוֹ / אֲשֶׁר בּוֹ תָקַע תּוֹךְ כַּרְמִלּו וְיַעְרוֹ / וְכַאֲשֶׁר נְשָׂאוֹ בָאֵשׁ לְהַשְׁלִיכוֹ / הָלֹךְ יֵלֵךְ וּבָכֹה / וַתֹּאמֶר לוֹ אִשְׁתּוֹ / מַדּוּעַ זֶה לִשְׂרֹף זְכַרְתּוֹ / וּמִכְּלֵי מִלְחָמָה אֵינֶנּוּ / וְלָמָּה זֶּה בָּאֵשׁ תִּשְׂרְפֶנּוּ / לִבְּךָ מִלְּהַשְׁחִיתוֹ יִתְיָאֵשׁ / הֲלֹא זֶה אוּד מֻצָּל מֵאֵשׁ / הִנְנִי בְמַעֲשֶׂיךָ נִכְלֶמֶת / אַל נָא תְהִי כַּמֵּת / וַיְהִי כְדַבֵּר אֵלָיו צַלְעָתוֹ לֹא אַחַת וְלֹא שְׁתַּיִם / וַיַּךְ אֶת הַצֶּלַע בְּמַטֵּהוּ פַּעֲמָיִם / וַיֹּאמֶר לָהּ בְּחֵמָה: הִנֵּךְ בַּת הַמֶּרִי / כְּדַבֵּר אַחַת הַנְּבָלוֹת תְּדַבֵּרִי / הִנֵּה גַּם הוּא הָיָה בְעָכְרָי / לְהָעִיר עָלַי שַׁעֲשׁוּעֵי נְעוּרָי / כִּי כַּאֲשֶׁר קוֹל שֹׁפָר שָׁמַעְתִּי / כָּל אַנְחָתִי הִשְׁבַּתִּי / בְּדֵי שֹׁפָר אָמַרְתִּי: הֶאָח / עַל כֵּן אַשְׁלִיכֶנּוּ תוֹךְ הָאָח / כִּי קוֹל תְּרוּעָה בְּשָׁמְעִי / עַל פִּיו אָכִין מַסָּעִי / וְהִתְעֹרַרְתִּי עַל אֹיְבִי לְהִלָּחֵם / וְתָבֹא חַרְבִּי וְתִקָּחֵם / וּמִן הַמִּלְחָמָה בְשׁוּבִי / לָצוּד צַיִד לְהָבִיא / תָּקַעְתִּי בוֹ וַיֶּחְרְצוּ כְלָבַי לְשׁוֹנוֹת / כִּי הוּא מְאַסֵּף לְכָל הַמַּחֲנוֹת.

וְהַמָּשָׁל לְהַזְכִּיר כִּי זֶה מִשְׁפַּט חָרוּץ כַּזֹּרֵק כַּמּוֹשִׁיט / וְאֹחֵז הָרֶגֶל כַּמַּפְשִׁיט / כִּי גַם הַשֹּׁפָר אֲשֶׁר לֹא מִכְּלֵי מִלְחֶמֶת הַפָּרָשׁ / לְשָׂרְפוֹ עִם כְּלֵי מִלְחַמְתּוֹ דָּרֹשׁ דָּרָשׁ / אִם הַעְלֵם יַעֶלִים הָרֹאֶה בְאֶשְׁנָב / דִּין הַמַּעְלִים כְּדִין גַּנָּב.