הַשְּׁתִיקָה לְבַעַל דַּעַת / תּוֹסֶפֶת וְלֹא מִגְרַעַת

עֹרֵב עַל נָהָר לֹא יְדָעוֹ עַיִט / וּבַל תֵּלֶךְ בּוֹ אֳנִי שַׁיִט / וַיָּעָף אָנֶה וָאָנָה וַיִּרְעַב הָעֹרֵב / וַיִּלְאֶה לִמְצֹא צֵידוֹ עַד הָעָרֶב / וַיִּפְגַּע בַּמָּקוֹם וַיִּמְצָא שָׁם נְבֵלָה / וַיִּשְׂמַח עָלֶיהָ שִׂמְחָה גְדוֹלָה / וּמֵרֹב שִׂמְחָתוֹ אוֹתָהּ יִצֶף / נֹדֵד כָּנָף וּפֹצֶה פֶה וּמְצַפְצֵף / וַיִּפְעַר פִּיו לִבְלִי חֹק / וְהַקּוֹל נִשְׁמַע עַד לְמֵרָחֹק / וְאָזְנֵי הַנֶּשֶׁר תְּצִלֶּינָה וַיֹּאמַר: לִרְאוֹת אָחִישָׁה / אִם הַקּוֹל עֲנוֹת מִלְחָמָה אוֹ קוֹל עֲנוֹת חֲלוּשָׁה / וַיָּבֹא עַד הָעֹרֵב וַיִּמְצָאֵהוּ עַל הַנְּבֵלָה יְנַתֵּר / וּבָשָׂר מִן הָעֲצָמוֹת יְפָרֵק וִיבַתֵּר / וַיִּתְמַרְמֵר אֵלָיו בַּחֲמַת רוּחוֹ וַיַּכֵּהוּ / שָׁם שָׂם לוֹ חֹק וּמִשְׁפָּט וְשָׁם נִסָּהוּ / וּמִן הַיּוֹם הַהוּא וָהָלְאָה לֹא גָבַהּ קוֹלוֹ / לְהַשְׁמִיעַ בַּחוּץ אֶל הָעוֹפוֹת שְׁלָלוֹ.

וְהַמָּשָׁל כִּי הַרְבֵּה נִלְכְּדוּ וְנוֹקְשׁוּ / אִם הִקְרָה לָהֶם הַזְּמָן קְצִירָם לֹא הֶחֱרִישׁוּ / וְכַאֲשֶׁר לֹא שָׁמְרוּ פִּתְחֵי פִיהֶם / וַיִּשָּׁמַע אֶל הַמּוֹשְׁלִים עֲלֵיהֶם / אָז כָּל אֶחָד כָּאֲרִי נָהַם / כְּקוֹץ מֻנָד כֻּלָּהַם / לֶאֱרֹב כַּאֲרִי בְּמִסְתָּרִים / וַיָּשִׂימוּ עֲלֵיהֶם עֲלִילוֹת דְּבָרִים / עַד לֹא יַשְׁאִירוּ עוֹלֵלוֹת / וְהֵמָּה בִקְשׁוּ מוֹקְשִׁים בְּמַהֲתַלּוֹת / וְלִמְצֹא שֶׁבֶר וָשֹׁד / אָפֵס הַמֵּץ כָּלָה שֹׁד / בְּמַאֲמַר פֶּה וּבְחֹסֶר שְׁתִיקָה / רוּחַ אֲנָשִׁים נָבְקָה / וָאֹמַר לַאֲשֶׁר לֹא אִמְרַת שְׂפָתָיו שְׁמוּרָה וַעֲרוּכָה / הִנּוֹ כְעֻגָּה בְּלִי הֲפוּכָה / וְאָמַר קֹהֶלֶת אֲשֶׁר הַתְּבוּנוֹת זָרַע / בְּפֶשַׁע שְׂפָתַיִם מוֹקֵשׁ רָע / וְהַיִּשְׁמְעֵאלִי אָמַר בְּמוּסָרוֹ לִבְנוֹ בְכוֹרוֹ / סוֹדְךָ אֲסִירְךָ, וְאִם תְּגַלֵּהוּ תִּהְיֶה אֲסִירוֹ.

וָאֶשָּׂא מְשָׁלִי וָאֹמַר:

מוֹקֵשׁ־רֶגֶל קָטָן מוֹקְשׁוֹ / אַךְ מוֹקֵשׁ־פֶּה יָסִיר רֹאשׁוֹ דַּע כִּי שֹׁמֵר פִּיו וּלְשׁוֹנוֹ / שֹׁמֵר מִצָּרָה אֶת נַפְשׁוֹ.