שָׁמַעְתִּי רַעַם בַּגַּלְגַּל / נִבְלֵי עָבִים בּוֹ נִבְקָעוּ

בָּא פִתְאֹם עִם אֵשׁ בָּרָק וַ/יַרְא כָּל-הָעָם וַיָּנוּעוּ

וַיָּמוּתוּ בִּשְׁאוֹן קוֹלוֹ / צֹאן וּבְהֵמָה בַּאְשֶׁר רָעוּ

אִישׁ נָפַל נָשִׁים נָפְלוּ / גַּבּוֹת זָעוּ לִבּוֹת נָעוּ

וַיֵּצְאוּ מִמֶּנּוּ לַהְבוֹת-/אֵשׁ בַּתְּהוֹם רַבָּה שָׁקָעוּ

אַחַר שָׂרְפוּ עִיר וּמְלוֹאָהּ / כָּל-חַי בָּהּ לִשְׁאוֹל פָּסָעוּ

מִגַּעְרָתָם לֹא צָעַק אִישׁ / גִּבּוֹר וּגְמוּלִים לֹא נָעוּ

אַמִּיץ לִבּוֹ עָף, נַפְשׁוֹת גִּ/בּוֹרִים מִקָּצֶה נִקְרָעוּ

עָבַר בַּיָּם צָרָה מִמֶּ/נָּה קוֹלוֹת יָם לֹא נִשְׁמָעוּ

הֵקִיא דָג אֶת בִּלְעוֹ וּבְנֵי / לִוְיָתָן בַּסּוּף נִבְלָעוּ

אַחַר רוּחַ מִנְהוֹ הָאֵל – / כָּל-טוֹב וָרַע כַּף תָּקָעוּ

עַל-נוּמָתָם מִירוֹא עוֹשֶׂה / זֹאת, כִּי גָאוּ וַיִּפְשָׁעוּ

מֵאֵימוֹ שָׁמַיִם וָאָ/רֶץ גַּם שׁוֹמְרֵיהֶם יָזוּעוּ

אוֹמַר לָעָם נָשְׂאוּ חֶטְאָם / עַל עַצְמוֹתָם וַיִּסָּעוּ:

לַפּוֹעֵל כָּזֹאת בָּאָרֶץ / מִשָּׁמַיִם אַל תָּרֵעוּ

פֶּן יַעַשׂ כָּכָה פֶתַע בָּ/כֶם חֹתוּ אַחַי וָרֹעוּ

פֶּן תִּסָּפוּ אִם יִמְנַע מִ/כֶּם חֻקּוֹ גּוּרוּ וָשׁוֹעוּ

אֵל מֵכִין לָעוֹרֵב צֵידוֹ / כִּי בָנָיו אֶל-אֵל שִׁוֵּעוּ

צָדַקְתָּ אִם תִּמְנַע מֵהֶם / לֶחֶם חֻקָּם כִּי רָשָׁעוּ

אִם תֵּלֵךְ בִּנְתִיבָה פֶלֶא / בָהּ-רַגְלֶיךָ לֹא יִגָעוּ

בַּיָּם דַּרְכֶּךָ וּשְׁבִילְךָ / עִקְּבוֹתֶיךָ לֹא נוֹדָעוּ.