סימן: משה חזק
אֶרְאֶה לִפְנֵי אֲלֹהִים בִּרְנָנָי
וְלִבִּי לוֹ אֶפְנֶה וְאָעִיד נֶאֱמָנָי
וְאֶעֱנֵה לוֹ מַעֲנֶה שִׁירִים בַּהֲמוֹנָי
וַעֲבָדָיו הִנֵּה בָּרְכוּ אֵת אֲדֹנָי:
מִלָּתִי פָצְתָה לְהַגִּיד מֵישָׁרִים
וּלְשׁוֹנִי עָוְתָה נִצְפְּנָה בַחוֹרִים,
וּמְעַט קָט נָטְתָה לָקַחַת אֲמָרִים –
לְכוּ נָא הַגְּבָרִים וְעִבְדוּ אֶת אֲדֹנָי:
שִׁיתוּ לֵב אִישִׁים וְסוֹד אַל תַּבִּיעוּ
וְשַאֲלוּ מִישִׁישִׁים אִם לֹא תֵדָעוּ
כִּי לְכָל חֵרְשִׁים מַצְפֻּנָיו נִבְעוּ
וְהַבִּיטוּ וּדְעוּ כִּי הִפְלָה אֲדֹנָי:
הִנֵּה בַּמְּעוֹנִים סַהֲדִי מִפְעָלָךְ
עֵדִים נֶאֱמָנִים יְעִידוּן מַהְלָלָךְ
וְיָבִינוּ נְבוֹנִים כִּי אֵין בִּגְלָלָךְ
בַּשַּׁחַק יַעֲרֹךְ לָךְ יִדְמֶה לַאדֹנָי:
חֲדָשִׁים לַבְּקָרִים עַל זֹאת מִשְׁתָּאִים
כִּי עֲדָרִים עֲדָרִים צְבָא שַׁחַק יוֹצְאִים
וְכַעֲלוֹת הַשְּׁחָרִים צְבָאָיו יוֹם בָּאִים
מַה-זֶּה נִפְלָאִים מַעֲשֶׂיךָ אֲדֹנָי!
זִיקִים וּבְרָקִים נִשְׁלָחִים מֵאֵת
שְׁחָקִים וַאֲרָקִים וַעֲרָפֶל לְמַשְׂאֵת
לְעָם עַמּוֹ מְצִיקִים לוֹ לֹא יוּכַל שֵׁאת
מִי יַעֲשֶׂה, מִי אַתְּ הַמֶּלֶךְ אֲדֹנָי:
קַדְּמוּ אֶת פָּנָיו נִדְרֵיכֶם שַׁלְּמוּ
חֵלֶף שַׁי כֹּהֲנָיו אֲמָרֵיכֶם נַעֲמוּ
אִישׁ אִישׁ אֶת רְנָנָיו, הַבִּיטוּ וְטַעֲמוּ
כִּי כְצוּף נֹפֶת נָעֲמוּ אֲמָרֶיךָ אֲדֹנָי: