יֹאמַר יָיִן: עֹז אָזָרְתִּי / לִפְגָרִים נֶפֶשׁ הֶחְזָרְתִּי

אֵין לִתְמֹהַּ אִם לִי תִּכְרַע / כָּל־בֶּרֶךְ עַם־זוּ יָצָרְתִּי

כִּי רַבִּים מִמָּוֶת אֶגְאָל / וִימֵי רַבִּים כֵּן הִקְצָרְתִּי

זֶה חַסְדִּי עִם־רֵעַי כִּי כָל־ / מוֹצְאִי יֹאמַר “אַךְ עָשָׁרְתִּי”

וּבְעֵת מִמֶּנִּי יִשְׂבַּע אִישׁ / יֹאמַר “דָּבָר לֹא חָסָרְתִּי”

מִלֵּב אַסִּיר תּוּגָה אָסִיר / שִׂמְחָה וָגִיל לוֹ עוֹרָרְתִּי

וּלְהַגִּיעוֹ לִמְחוֹז חֶפְצוֹ / בִּמְשׁוֹטוֹת שִׂכְלִי חָתָרְתִּי

חָיוּ שֹׁכְנֵי עָפָר יוֹם עַל־ / לִבָּם טַל אוֹרֹת הִמְטָרְתִּי

אִישׁ לֹא שָׁתָה יַיִן יִעָף / יֹאמַר “כֹּחַ לֹא עָצָרְתִּי”

הָיִיתִי שִׂמְחַת הַיְצוּרִים / וּשְׁנַת טוֹבָתָם עִטָּרְתִּי

מִן־לִדָתִי טַל יַלְדוּתִי / אַזְקִין אָז תִּגְדַּל תִּפְאַרְתִּי

מִיּוֹם נֹחַ נָטַע כָּרֶם / לִמְלֹךְ עַל־תֵּבֵל נִכְתָּרְתִּי

בִּי יִתְהַלֵּל כָּל־מִתְהַלֵּל / עַל־כָּל־תַּעֲנוּגִים אֻשָּׁרְתִּי

וּלְהַרְאוֹת הָעַמִּים יָפְיִי / עַל־גִּלְדִּי שַׂק לֹא תָפָרְתִּי

עָרֹם יִרְאוּנִי לֹא אֵבוֹשׁ / לֹא חָפַרְתִּי כִּי נֶהְדָּרְתִּי

כָּל־אִישׁ יַחְשֹׁק אֶת־פִּי לִנְשֹׁק / וּבְעֵינֵי רוֹאַי יָקָרְתִּי

שָׂר עִם־סוֹחֵר פָּנַי שׁוֹחֵר / וּפְנֵי אַחֵר לֹא שִׁחָרְתִּי

אָסִיר שָׂפָה אֶל־נֶאְמָנִים / וּלְשׁוֹן נִלְעָגִים הִגְבָּרְתִּי

אַפְרִיד לִבּוֹת הַנִּצְמָדִים / חוֹשֵׁק עִם־עָפְרָה הֶחְבָּרְתִּי

וּבְתוּלוֹת גוֹבַבְתִּי וּבְיַד / הַחוֹשְׁקִים אוֹתָם הִסְגָּרְתִּי

כָּל־הַחוֹשְׁקִים לִי זִבֵּחוּ / אַף־קִטֵּרוּ אֶל־מִכְמַרְתִּי

כִּי בָהֵמָּה שָׁמַן חֶלְקָם / וּלְהַמְצִיא חֻקָּם מִהָרְתִּי

כָּל־דֶּרֶךְ אֶדְרֹךְ נָגַהּ אוֹר / יָקָם לִי אֹמֶר גָּזָרְתִּי

אִישִׁים חָשְׁבוּ לִקְבֹּר אוֹתִי / זֶה כַּמָּה אוֹתָם קָבָרְתִּי

אוֹתִי דִּמּוּ לַהְרֹג וּבְעֹז / יָדִי עַל־כֻּלָּם גָּבָרְתִּי

אֵת שֶׁהִתִּירוּ אָסַרְתִּי / אֵת שֶׁאָסָרוּ הִתָּרְתִּי

וּבְעֵת שָׂחְקוּ אָז בָּכִיתִי / וּבְעֵת בָּכוּ אָז שׁוֹרָרְתִּי

וּבְעֵת פָּרָצוּ בָּנִיתִי / וּבְעֵת בָּנוּ אָז סָתָרְתִּי

וּבְעֵת עָקָרוּ נָטַעְתִּי / וּבְעֵת נָטָעוּ עָקָרְתִּי

וּבְעֵת דִּבֵּרוּ הֶחְשֵׁיתִי / וּבְעֵת הֶחְשׁוּ אָז דִּבַּרְתִּי

וּבְעֵת שָׁמָרוּ הִשְׁלָכְתִּי / וּבְעֵת הִשְׁלִיכוּ שָׁמָרְתִּי

קֶשֶׁר אַמִּיץ אַתִּיר וּבְרִית / כָּרוּת בֵּין רֵעִים הֵפָרְתִּי

שׁוֹשֵׂתִי עִיר אַף־מַמְלָכוֹת / וּגְבוּלוֹת עַמִּים הֵסָרְתִּי

וִיסוֹדֵי עִיר גִּלִּיתִי אַף / אַבְנֵי־גִיר לַגַּי הִגָּרְתִּי

וּצְבָא־רוֹם בִּזְבוּל נִשְׁאָרְתִּי / וּלְבַדִּי נָבִיא נוֹתָרְתִּי

קָדְרוּ שֶׁמֶשׁ וּלְבָנָה אַךְ / אוֹרִי יָהֵל לֹא קָדָרְתִּי

בֵּין אִם יִהְיֶה בֵּין לֹא יִהְיֶה / בְּקָהָל רָב צֶדֶק בִּשָּׂרְתִּי

בָּטְחוּ אִישִׁים בִּנְדָרַי אַךְ / לֹא קִיַּמְתִּי שֶׁנָּדָרְתִּי

כֶּרֶם לֹא נָטַעְתִּי אֶבְצֹר / שָׂדֶה לֹא אֶזְרַע קָצָרְתִּי

עָלַי פָּצוּ פִיהֶם חַכְמֵי / עוֹלָם אָמְרוּ כִּי סָרָרְתִּי

וּלְעַוֵּר עֵינַי חָשָׁבוּ / אָכֵן עֵינֵיהֶם עִוָּרְתִּי

וּבְחָשְׁבָם כִּי אוֹתִי שָׁתוּ / עַל־חוּג רֹאשָׁם נִתְבַּצָּרְתִּי

חָשַׂפְתִּי מַצְפּוּן לִבּוֹתָם / וּבְקִרְבָּם סוֹד לֹא הִשְׁאָרְתִּי

בָּזוּנִי יַעַן נִמְכָּרְתִּי / שָׁכְחוּ כִּי אוֹתָם מָכָרְתִּי

אַשְׁכִּיר יוֹם יוֹם אִישִׁים אֵין־קֵץ / אַךְ מִיָּמַי לֹא שָׁכָרַתִּי

וּבְרַגְלֵיהֶם אִם נִרְמַסְתִּי / אֶזְכֹּר כִּי רַבִּים יִסָּרְתִּי

אִישִׁים הוֹצִיאוּ דִּבָּתִי / נָפְלוּ תּוֹךְ שַׁחַת חָפָרְתִּי

וּבְעֵת כִּי עָלֵי קָשְׁרוּ / תּוֹךְ לִבּוֹתָם אָז נִקְשָׁרְתִּי

לֹא הָיוּ לָהֶם יָדַיִם / יוֹם פָּנַי מֵהֶם הִסְתָּרְתִּי

שִׁבַּרְתִּי רָאשֵׁי תַנִּינִים / וּבְעֻזִּי הַיָּם פּוֹרָרְתִּי

לֹא נִמְלָטוּ מִיַּד רִשְׁתִּי / הֵם חָלָמוּ אַף־פָּתָרְתִּי

אֵמִים הִשְׁפַּלְתִּי עַד־אָרֶץ / שָׂרִים בֶּעָפָר עִפָּרְתִּי

וּבְשִׁבְתִּי בָדָד דּוּמִיָּה / בָּטַח לִבִּי אַף־נֶעְזָרְתִּי

אָמְנָם עֵת צָפוּ מַיִם עַל־ / רֹאשִׁי אָמַרְתִּי “נִגְזָרְתִּי”