– – ͝ – – – ͝ – – –
עֵת אֶחֱזֶה קִבְרֵי בְּנֵי הָעָם / יִמַּס לְבָבִי יַעֲמֹד נִפְעָם
כִּי־אֶזְכְּרָה הַשּׁוֹֽכְבִים שָׁמָּה / אֵיךְ הָיְתָה אָרְחָם וְגַם־רִבְעָם
אֶזְכֹּר יְמֵי שִׁבְתָּם בְּתֵבֵל אַף־ / אֶזְכֹּר נְסִבָּה סִבְּבָה נָסְעָם
בָּהֶם אֲנָשִׁים חָֽכְמוּ לִמְאֹד / עַד כִּי־לְמֶרְחָק נָֽשְׂאוּ דֵעָם
הַדּוֹֽרְשִׁים טוֹבָה אֱלֵי עַמָּם / הַדּוֹֽבְרִים שָׁלוֹם לְכָל־זַרְעָם
בָּם בַּהֲמוֹת שָׂדַי בְּתַבְנִית אִישׁ / וַיְשַׁלְּחֵם הָאֵל בְּיַד־פִּשְׁעָם
בָּם בַּעֲלֵי אַשְׁמָה כְּמוֹ אָמוֹן / אַף בַּעֲלֵי חַטָּאת כְּיָרָבְעָם
הָאוֹֽמְרִים לָעוֹֽבְרִים סוּרוּ / וּמְקַדְּשִׁים הָעָם בְּמַגָּעָם
יִתְהוֹלֲלוּ יִתְמֹלֲלוּ אֵימִים / אַף־הֻמְּכוּ לוּ שָׁמְעוּ שִׁמְעָם
נִלְאָה זְמָן לִרְפֹּא מְשׁוּבוֹתָם / כִּי־הֶחֱלִיף צִבְעָם וְלֹא טִבְעָם
לֹא־נָתְנוּ לִבָּם לְאַחְרִיתָם / הִטּוּ לְבָבָם אַחֲרֵי בִצְעָם
שָׁמָּה רְשָׁעִים חָדְלוּ רֹגֶז / שָׁם יוֹעֲצֵי אֶרֶץ בְּמַדָּעָם
שָׁמָּה עֲבָדִים מֵאֲדֹנֵיהֶם / חָפְשִׁים וְשָׁם כֵּהָה אֱמֶת נִגְעָם
שָׁמָּה יְגֵעִים בַּזְּמָן נָחוּ / שָׁם מָצְאוּ נָפְשָׁם וּמַרְגּוֹעָם
קָטָן וְגָדוֹל שָׁם וְכָל־הַיְקוּם / שָׁם רָבְדוּ עַרְשָׂם וּמַצָּעָם
יַחַד אֲסִירִים שַׁאֲנָנוּ שָׁם / לֹא שָֽׁמְעוּ נוֹגֵשׂ וְקוֹל רַעַם
לֹא־נִכְּרוּ שׁוֹעִים וְנִכְבָּדִים / לִפְנֵי חֲשֻׁכִּים מָלְאוּ זָעַם
הִתְיָאֲשׁוּ הֵם מֵֽרְאוֹת טוֹבָה / לֹא־עוֹד יְקַוּוּ לַחֲזוֹת נֹעַם
לִבִּי סְחַרְחַר בַּחֲזוֹת כָּל־זֹאת / לֹא־אֶשְׂמְחָה עֵת אֶחֱזֶה צַלְעָם
צַר־לִי וְאִם אֶהְיֶה כְמִתְעַלֵּם / יוֹם יוֹם אֲנִי הוֹלֵךְ לְמַסָּעָם
יַנְחֶה זְמָן אוֹתִי וְיִתְפַּלָּא / בִי כַּאֲשֶׁר נָחָם וְהִסִּיעָם
אֵרֵד שְׁאוֹל תַּחְתִּית וְאַגִּיעַ / בִּמְקוֹם אֲשֶׁר יָרָם וְהִגִּיעָם
יַשְׁקֶה זְמַנִּי לַעֲנָה וָרֹאשׁ / לִי כַּאֲשֶׁר הִשְׁקָם וְהִשְׂבִּיעָם
יַשְׁפִּיל גְּאוֹן לִבִּי וְיַכְנִיעַ / עָרְפִּי כְּהִשְׁפִּילָם וְהִכְנִיעָם
לוּלֵי אֲשֶׁר יָעַד אֱלֹהִים חַי / לָשׁוּב לְרַחֵם אֶת־אֲשֶׁר זָעָם
עֵת יִקְצוּ כָּל־שֹׁכְנֵי עָפָר / חַסְדוֹ וְעִזּוּזוֹ לְהוֹדִיעָם
וּלְהַחֲלִיץ עַצְמוֹת מְקֻדָּשָׁיו / אֶת־מַלְאֲכָיו יִשְׁלַח לְהַרְגִּיעָם
זֹאת בַּחֲזוֹתִי יִפְּלוּ פָנָי / יִמַּס לְבָבִי יַעֲמֹד נִפְעָם.