סימן: משה חוצין ח׳זק. מנגינה: באבא טאהר.

אוֹדֶה לָאֵל צוּר קְדוֹשִׁי

בְּכָל לִבִּי וּבְכָל נַפְשִׁי.

מְרוֹמָם שֵׁם כְּבוֹדֶךָ

עַל כָּל תְּהִלָּה וּבְרָכָה

נִשְׂבְּעָה בְטוּב בֵּיתֶךָ

נִכְסְפָה גַם כָּלְתָה נַפְשִׁי.

שְׁעֵה שַׁוְעַת דּוֹפֵק עַל דַּל

רַחֲמֶיךָ שׁוֹאֵל כַּדַּל

מִבּוֹר שַׁחַת יוֹנָתְךָ דַּל

הוֹצִיאָה מִמַּסְגֵּר נַפְשִׁי.

אוֹדֶה לָאֵל

הַקְשִׁיבָה לִי וַעֲנֵנִי

וּתְהִי יָדְךָ לְעָזְרֵנִי

מִכָּל צָרָה הַצִּילֵנִי

פֶּן יִטְרֹף הָאַרְיֵה נַפְשִׁי.

אוֹדֶה לָאֵל

חַטֹּאת נְעוּרַי לִי מְחֹל

כִּי אֶסְפְּרֵם יִרְבּוּ מֵחוֹל

תַּהְפוֹךְ יְגוֹנִי לְמָחוֹל

כִּי דָלְפָה מִתּוּגָה נַפְשִׁי.

אוֹדֶה לָאֵל

חֲמֹל עָלַי שׁוֹכֵן רוּמָה

וּשְׁפֹךְ זַעַם אַף וְחֵמָה

אֶל הַגּוֹיִם אֲשֶׁר הֵמָּה

לְשׁוֹאָה יְבַקְּשׁוּ נַפְשִׁי.

אוֹדֶה לָאֵל

וְאַל יִשְׂמְחוּ אוֹיְבַי לִי

עַל פִּי … תגלי

הִנֵּה אֱלֹהִים עוֹזֵר לִי

ה׳ בְּסוֹמְכֵי נַפְשִׁי.

אוֹדֶה לָאֵל

צוּר מִתְנַשֵּׂא לְכָל רֹאשׁ

שְׁפֹךְ חֲמָתְךָ עֲלֵי רֹאשׁ

זָרִים כִּי הִשְׁקוּנִי מֵי רֹאשׁ

כִּי שָׂבְעָה בְרָעוֹת נַפְשִׁי.

אוֹדֶה לָאֵל

יִמָּלֵא פִי צִדְקָתֶךָ

וְדִבְרֵי נִפְלְאוֹתֶיךָ

אָגִילָה בִישׁוּעָתֶךָ

כָּלְתָה לִתְשׁוּעָתְךָ נַפְשִׁי.

אוֹדֶה לָאֵל

נַחֵם צִיּוֹן הָעֲלוּבָה

וּבִרְצוֹנְךָ חִישׁ הֵטִיבָה

בְּרֹב רַחֲמֶיךָ שׁוּבָה

ה׳ חַלְּצָה נַפְשִׁי.

אוֹדֶה לָאֵל

חַזֵּק צוּרִי אֶת חֻלְשָׁתִי

וְקוּמָה נָא לְעֶזְרָתִי

כִּי לִישׁוּעָתְךָ קִוִּיתִי

ה׳ קִוְּתָה נַפְשִׁי.

אוֹדֶה לָאֵל.