ירעני זמן לא בן לרעי / ר' משה אבן-עזרא
יְרֹעֵנִי זְמָן לֹא־בָּן לְרֵעַי / וְיָקָם־בִּי בְלִי־פֶשַׁע כְּקָמִי
עֲדֵי בִידֵי מְגִנָּתִי יְמַגֵּן / יְחִידָתִי וְיִטְפֹּל עַל־אֲשָׁמִי
מְנָתִי מִשְּׂכִיּוֹת מַתְּנוֹתָיו / מְנָתִי מִנְּדִיב נוֹכֵל כְּנוּמִי
וְחַטָּאתִי בְּעֵינֵי כָל־אֲנָשָׁיו / עֲדוֹת עֶדְיֵי תְעוּדָתִי וְתֻמִּי
וְהֵם פִּקְחִים וְאַךְ לֹא־יֶחֱזוּ מִ־ /תְּהִלּוֹתַי לְבַד גָּלְמִי וְצַלְמִי
לְזֹאת אֶשְׁתֶּה דְמֵי לִבִּי וְאֹכַל / שְׁאֵר גּוּפִי מְקוֹם יֵינִי וְלַחְמִי
וְקֹדֵר אֶעֱבֹר בָּם כַּאֲבֶל־אֵם / וְכִמְעַט קָט וְאֶעְטֶה עַל־שְׂפָמִי
תְּנוּבָתִי תְבוּנָתִי וְדָתִי / וְעָרְמָתִי תְּכַסֶּה מַעֲרֻמִי
בְּאָזְנַי עֵט כְּפִי־עַיִט יְצַפְצֵף / וְדַיִּי בַדְּיוֹ מוֹרִי וּבָשְׂמִי
וְלוּ אֶסְכַּל אֲזַי אֶשְׂכַּל וְיִקְרָא / זְמַנִּי זֶה לְבַד יַעְצֹר בְּעַמִּי
אְנִי גֹלֶה בְּלֵב חֹלֶה וְאֹלֶה / לְמִי אֶצְרַח וְאָן אֶבְרַח וְאֶל־מִי
תְּבוֹאֵנִי אֲחוֹת חֹלִי בְּלַיְלָה / וְתֵבוֹשׁ מֵֽרְאוֹת פָּנַי בְּיוֹמִי
אֲיַחֵל לָהּ וְלֹא מֵאַהֲבָה כִּי / תְחַל פָּנַי וְלֹא לִדְרֹשׁ שְׁלוֹמִי
וְתָשׁוּר כָּל־בְּנוֹת יָמִים בְּחֵיקִי / וְהִיא תָתוּר לְהִתְגּוֹרֵר בְּעַצְמִי
וְתִמְצֶה מִבְּלִי־פֶה דַּם לְבָבִי / וְתֹאכַל מִבְּלִי־שֵׁן אֶת־לְחוּמִי
וְיוֹם הַחֹם לְקָרָתִי כְּשֶׁלֶג / וְלֵיל הַקֹּר כְּגַחֶלֶת לְחֻמִּי
וְאָזוּעַ לְמֵי זֵעָה וְאֵיכָה / אֱחִי בֵּינוֹת שְׁבִיב אִשִּׁי וְגִשְׁמִי
נְדוּד נוּמָה אֲחִי־רַעַד וְאֵימָה / שְׁתֻם עַיִן רְעוֹת כּוֹכְבֵי מְרוֹמִי
וְדַלֹּתִי וְאֵין מַכִּיר דְּמוּתִי / עֲלֵי עַרְשִׂי עֲדֵי יִשׁמַע נְאֻמִי
וְהַלַּיִל כְּמוֹ־רֶשֶׁת לְשַׁחַר / וּמִי־יִתֵּן וְיִלָּכֵד בְּחֶרְמִי
יְחִתּוּנִי בְּעֵת שִׁכְבִי חֲלֹמוֹת / וּפִתְרֹנָם יְבַעְתֵּנִי בְקוּמִי
וְכָל־רֹפֵא אֱלִל נַפְשִׁי יְנַחֵם / לְחַיּוֹתִי וְלֹא יֵדַע עֲלֻמִי
לְמַעַן רָחֲקוּ מֵהֶם חֲפָצַי / כְּרֹחַק צַד צְפוֹנִי מִדְּרוֹמִי
וְלֹא תָכִיל אֲדָמָה רַעֲיוֹנַי / וְאֵיךְ חֶדֶר לְבָבָם הַפְּנִימִי
וְנֶחְלֵיתִי וְלֹא־חָלוּ שְׂעִפַּי / וְנִהְיֵיתִי וְלֹא נִהְיָה זְמָמִי
וְלוּ אֶרְאֶה אֲחִי מוּסָר דְּבָרוֹ / יְהִי מִמַּחֲלָתִי מַחֲלִימִי
הֲשָׁכְחוּ אַחֲוָתִי כָל־מְתֵי־תֹם / וְאִם־תָּעוּ וְלֹא־יָדְעוּ מְקוֹמִי
וְאִם חַבְלֵי תְנוּמוּת לַתְּמוּנוֹת / אֱהִי פֹרֵשׂ רְאוֹת צַלְמָם בְּצַלְמִי
יְצַוּוּ עַל־יְצֻרֵיהֶם לְבִלְתִּי / יְבֹאוּנִי בְּלֵילִי בַחֲלוֹמִי.