אִם־אָהֳלֵי דוֹדַי בְּנַפְשִׁי צָעֲנוּ/ אֵיכָה בתוֹחַלְתִּי בְעִירָם טָעֲנוּ

שִׂבְרִי וְשִׂמְחָתִי וְחֶבְרַת אֹהֲבַי/ מִיּוֹם לְיוֹם יִסְעוּ וְאַךְ לֹא־יַחֲנוּ

צַר־לִי עֲלֵי חֹשְׁקִים בְּדִמְעָה יִבְטְחוּ/ וּבְיוֹם כְּאֵב עַל־הַדֳּמִי יִשָּׁעֲנוּ

בָּרָק יְנִדֵמוֹ לְהִתְנוֹדֵד וְקוֹל/ יוֹנִים בְּעַנְפֵי הַהֲדַסִּים קוֹנֲנוּ

יִנָּחֲמוּ כִּי־נִפְרְדוּ מֵהֶם וְעַל/ חֹרֶב בְּסִפָּם חָל בְּחִיל יִתְאוֹנֲנוּ

הִתְאַבְּקוּ יַחַד בְּרָבְעֵיהֶם וְאֶת־/ עַפְרוֹת מְעוֹנֵיהֶם יְמֵי־עַד חוֹנֲנוּ

אֶבְכֶּה וְיִתְחַמֵּץ לְבָבִי בַּעֲדָם/ אֶהְמֶה וְכִלְיוֹתַי מְאֹד יִשְׁתּוֹנֲנוּ

אֶשְׁתֶּה דְמֵי עֵינַי עֲלֵי נוּדָם יְמֵי־/ הֶם בַּעֲסִיסֵי צָהֳלָה הִתְרוֹנֲנוּ

אִם־לֹא בְנִגְעִי יַאֲמִינוּ שׁוֹרֲרַי/ חָלְיִי וְדִמְעִי הֵם אֲשֶׁר יֵאָֽמְנוּ

אִם הַמְּרִיבִים נִדְבְּרוּ בִי אֶקְרְאָה/ יִצָּֽרְפוּ אָבִי וְנָא־יִבָּחֲנוּ

אֵיךְ חָֽרְדוּ רֵעִים וְרָעִים שָֽׁקְטוּ/ אֵיךְ אֹהֲבִים גָּלוּ וְצָרִים שָֽׁכְנוּ

הֵמָּה אֲשֶׁר חִנָּם לְחוּמִי יִלְחֲמוּ/ וּבְאָהֳלֵיהֶם בַּעֲדִי יֵרָֽנְנוּ

הוֹרוּ בְמוֹ־אֹפֶל לְיִשְׁרֵי־לֵב בְּחֵץ/ אֵיבָה עֲלֵי־יֶתֶר כְּזָבִים כּוֹנֲנוּ

פֹּתִים אֲשֶׁר אֵשֶׁת כְּסִילוּת בָּעֲלוּ/ וּלְבַעֲלֵי חָמָס וְתוֹךְ הִתְחַתְּנוּ

רָעוֹת בְּפִיהֶם מָֽתְקוּ תָמִיד וְאֵשׁ/ קִנְאָה בְּמוֹרָשֵׁי לְבָבָם צָֽפְנוּ

רֵקִים אֲשֶׁר הוֹנָם מְקוֹם אֵל עָֽבְדוּ/ מֵהָאֱנוֹשׁ וּפְנֵי עֲנִיִּים טָחֲנוּ

מִתֹּם וּמִשֶּׂכֶל כְּחֶרֶשׂ יָֽבְשׁוּ/ מִשֹּׁד וּמִכֶּסֶל כְּפָרִים שָֽׁמְנוּ

טָמְאוּ וְלוּ יוּבְאוּ בְאֵשׁ וּבְמֵי תְהוֹם/ אָז יַעֲלֶה בָאְשָׁם וְלֹא־יִתְלַבְּנוּ

בָּקְעוּ עֲצֵי כֶסֶל וְהִסְכִּילוּ הֲכִי/ לֹא־יִסְכְּנוּ בָהֶם אֲבָל יִסָּֽכְנוּ

תֵּצַר אֲדָמָה מִנְּשׂוֹא כִסְלָם עֲדֵי/ אַפֵּי שְׁחָקִים בַּחֲזוֹתָם עָֽשְׁנוּ

רָאוּ בְעֵינֵיהֶם תְּמוּנָתִי וְלֹא/ שָׂכְלוּ תְבוּנָתִי וְלֹא־הִתְבּוֹנֲנוּ

לוּ עֵין מְזִמָּתָם לְטוּשָׁה הָֽיְתָה/ חָסוּ בְצֵל שִׂכְלִי וּבוֹ הִתְלוֹנֲנוּ

אַל־תִּדְאֲגִי נַפְשִׁי לְדִבְרֵיהֶם הֲכִי/ הֵם הֵם בְּעֵינֵי כֹל וְנַחְנוּ נָֽחְנוּ.