וְנָחוֹר אֲחִי אַבְרָהָם וְתֶרַח אָבִיו וְכָל אֲשֶר לָהֶם הִתְיַשְבוּ בְחָרָן, כִּי לֹא בָאוּ עִם אַבְרָהָם אַרְצָה כְּנָעַן. וַיִוָלְדוּ לְנָחוֹר בָּנִים, אֲשֶר יָלְדָה לוֹ מִלְכָּה בַּת הָרָן אֲחוֹת שָׂרָה אֵשֶת אַבְרָהָם, וְאֵלֶה שְמוֹתָם: עוּץ וּבוּז וּקְמוּאֵל וָכֶשֶׂד וַחֲזוֹ וּפִלְדָש וְיִדְלָף וּבְתוּאֵל. וּפִילַגְשוֹ וּשְמָהּ רְאוּמָה יָלְדָה לוֹ אֶת טֶבַח וְגַחַם וְתַחַש וּמַעֲכָה. וַיִהְיוּ כָּל בְּנֵי נָחוֹר י"ב נֶפֶש, מִלְבַד בְּנוֹתָיו, וַיִוָלְדוּ גַם לָהֶם בָּנִים וּבָנוֹת לְמִשְפְּחוֹתָם וְתוֹלְדוֹתָם. וּבְנֵי בְתוּאֵל: שָׂכָר וְלָבָן וְרִבְקָה אֲחוֹתָם. וַיֵלֶךְ אֲרָם בֶּן קְמוּאֵל וּרְחוֹב אָחִיו מֵהָלְאָה לְחָרָן, וַיִמְצְאוּ לָהֶם בִּקְעָה עַל נְהַר פְּרָת וַיִבְנוּ שָם עִיר וַיִקְרְאוּ אֶת שְמָהּ כְּשֵם פְּתוֹר בֶּן אֲרָם – הִיא אֲרַם נַהֲרַיִם עַד הַיוֹם הַזֶה. וּבְנֵי כֶשֶד הָלְכוּ גַם הֵם לָגוּר בַּאֲשֶר יִמְצָאוּ, וַיֵלְכוּ וַיִמְצְאוּ לָהֶם בִּקְעָה מִנֶגֶד לְאֶרֶץ שִנְעָר, וַיִבְנוּ שָם עִיר וַיִקְרְאוּ אֶת שְמָהּ כֶּשֶׂד כְּשֵם אֲחִיהֶם, הִיא אֶרֶץ הַכַּשְׂדִים עַד הַיוֹם. וַיֵשְבוּ הַכַּשְׂדִים בָּאָרֶץ הַהִיא וַיִפְרוּ וַיִרְבּוּ מְאֹד וְתֶרַח לָקַח לוֹ עוֹד אִשָה לְעֵת זִקְנָתוֹ וּשְמָה פְּלִילָה, וַתֵּלֶד לוֹ בֵּן וַיִקְרָא אֶת שְמוֹ צוֹבָא. וַיְחִי תֶרַח אַחֲרֵי הוֹלִידֹו אֶת צוֹבָא עֶשְׂרִים וְחָמֵש שָנָה וַיָמָת בִּשְנַת הַמָאתַיִם וְחָמֵש לִימֵי חַיָיו, וַיִקָבֵר בְּחָרָן. וְלַאֲרָם בֶּן צוֹבָא בֶּן תֶּרַח הָיוּ נְכָסִים רַבִּים. וַיִסַע הוּא וּמִקְצָת אָחִיו וְכָל בְּנֵי בֵיתוֹ מֵחָרָן לָגוּר בַּאֲשֶר יִמְצָאוּ, כִּי לֹא יָכְלוּ לָשֶבֶת יַחְדָו. וַיִמְצְאוּ לָהֶם כִּבְרַת אֶרֶץ מֵהָלְאָה לְאֶרֶץ־הַקֶדֶם וַיֵשְבוּ שָם. וַיִבְנוּ גַם הֵם עִיר וַיִקְרְאוּ אֶת שְמָהּ כְּשֵם אֲחִיהֶם הַבְּכוֹר, הִיא אֲרַם־צוֹבָא עַד הַיוֹם.